ހެޕިނަސް އިންޑެކްސް އެކުލަވައިލުމަށް ކުރަމުންދާ މަސައްކަތުގެ ތެރެއިން ޕީ.އެސް. އެމް އާއެކު ބައްދަލުވުމެއް ބާއްވައިފި

ދިވެހިންގެ އުފާވެރިކަން ވަޒަންކުރުމަށް ހެޕިނަސް އިންޑެކްސްއެއް އެކުލަވައިލުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތާއި ބެހޭ ވުޒާރާއިން އިސްނަގައިގެން ކުރަމުންދާ މަސައްކަތުގެ ތެރެއިން ދައުލަތުގެ މީޑިއާ ޕީ.އެސް. އެމްގެ ވެރިންނާއެކު މުހިންމު ބައްދަލުވުމެއް ބާއްވައިފިއެވެ.

އެވުޒާރާއިން ބުނީ ޤައުމެއްގެ ކުރިއެރުމާއި، ކާމިޔާބީ މިންކުރާ ހަމައެކަނި މިންގަނޑަކީ އެ ޤައުމަކުން ފެންނަ ޢުމްރާނީ ތަރައްޤީއާއި، ލިބެން ހުންނަ ޚިދުމަތްތަކުގެ ޢަދަދާއި، ފެންވަރު ނޫން ކަމުން ރައްޔިތުންގެ ހިތްހަމަޖެހުމާއި، އުފާވެރިކަން ހުރި ނެތް މިންވަރު ވަޒަންކުރުމަށް، އެކުލަވައިލާ "ހެޕިނަސް އިންޑެކްސް" އާއި ގުޅޭ މަޢުލޫމާތު ދައުލަތުގެ ޓީވީ އަދި ރޭޑިއޯ ޗެނަލްތަކުން ރައްޔިތުންނަށް ފޯރުކޮށްދިނުމަށް ގުޅިގެން މަސައްކަތްކުރުމަށް، އެ ބައްދަލުވުމުގައި މަޝްވަރާކުރެވުނު ކަމަށެވެ.

މި ބައްދަލުވުމުގައި ޕީއެސްއެމްގެ ޗެއާޕާސަންއާއި އެމްޑީ ހިމެނޭހެން އެކުންފުނީގެ ބައެއް އިސްވެރިން ވަނީ ބައިވެރިވަޑައިގެންފައި އެވެ.

ހެޕިނެސް އިންޑެކްސް އެކުލަވައިލުމުގެ މަސައްކަތް ހަވާލުކޮށްފައިވާ އިސްލާމިކް ޔުނިވަސިޓީ އޮފް މޯލްޑިވްސްއާ އެވެ.

ހެޕިނެސް އިންޑެކްސްއަކިީ އެ ގައުމެއްގައި ދިރިއުޅޭ ރައްޔިތުންގެ ދިރިއުޅުމަށް ބަލައި، އުފާވެރިކަން އޮތް ވަރު ދެނެގަތުމަށް ހަދާ އިންޑެކްސްއެކެވެ. ހެޕިނެސް އިންޑެކްސް އާންމުކުރުމަކީ މިހާރަކަށް އައިސް ދުނިޔޭގައި އާންމުކޮށް ކޮންމެ އަހަރަކު ކުރަމުން އަންނަ ކަމެކެވެ. އާންމުކޮށް ދުނިޔޭގައި މި ކަން ބަލައި އުޅެނީ 10 ދާއިރާއަކަށް ބަލައިގެންނެވެ. ދުނިޔޭގެ ހެޕިނެސް އިންޑެކްސްގައި މި ވަގުތު އެންމެ ކުރީގައި އޮތީ ފިންލެންޑެވެ.