ކައުންސިލުތަކަށް އޮންނަ ހިއްސާއާ ދައުރު މިހާރަށް ވުރެ ވެސް ބޮޑުކުރުމަކީ އުއްމީދެއް - އާދަމް ޝަރީފް

ކައުންސިލުތަކަށް އޮންނަ ހިއްސާއާ ދައުރު މިހާރަށް ވުރެ ވެސް ބޮޑުވުމަކީ، ދެކެން ބޭނުންވާ މަންޒަރާއި، އުންމީދުކުރާ ދުވަސް ކަމަށް ސިޓީތަކާއި އިދާރީ ދާއިރާތައް ހިންގުމައި، އާންމު މަސައްކަތްތަކައި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައިދެއްވުމަށް ކޮޅުމަޑުލުގެ ވެރިރަށް ވޭމަންޑޫގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

މި މޭރުމުން ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި ސަރުކާރުގެ ފަރާތުން ކުރާ ކޮންމެ ކަމެއް ކުރުމުގައި ރައްޔިތުންނާ ހަމައަށް އައިސްގެން އެ ކަމެއް ކުރާ ކަމަށް ވާނަމަ، އެ ކަމެއްގައި ރަށްރަށުގެ ކައުންސިލްގެ ދައުރު އޮންނަންޖެހޭ ކަމަށާއި، ކައުންސިލުގެ ހިއްސާ އިތުރުވާންޖެހޭ ކަމަށާއި، އަދި އިތުރު ކުރަންޖެހޭ ކަމަށް ވެސް ވިދާޅުވިއެވެ.

ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައި ދެއްވާ ވަޒީރު އާދަމް ޝަރީފު ޢުމަރު ދެއްކެވި ވާހަކަފުޅުގައި، މިހާރު ހިނގަމުން މިދާ ލާމަރުކަޒީ ނިޒާމު ތަޢާރަފުކުރެވިގެން ދިޔައީ ވެސް، އަދި މިހާ ހިސާބަށް މި އައިއިރު ވެސް ލާމަރުކަޒީ ނިޒާމަށް ބަދަލުގެނައުމަށް ޓަކައި ޤާނޫނު އަސާސީ ވެސް ބަދަލުކޮށްފި ކަމަށް ވިދާޅުވިއެވެ. އަދި ލާމަރުކަޒީ ޤާނޫނަށް ވެސް ގިނަ އިޞްލާޙުތަކެއް މިހާރު ވެސް ގެނެވިއްޖެ ކަމަށް ވިދާޅުވިއެވެ.

އިތުރަށް އެ މަނިކުފާނު ވިދާޅުވީ، ލާމަރުކަޒީ ނިޒާމު ރަނގަޅުކުރުމަށް ޓަކައި ކޮންމެ ސަރުކާރަކުން ވެސް ގިނަ މަސައްކަތްތަކެއް ކުރައްވާފައިވާ ކަމަށާ، މި ނިޒާމު ފުރަތަމަ ތަޢާރަފުކުރެވުނު އިރުގައި ވެސް ނިޒާމުގައި ރަނގަޅުކުރަންޖެހޭ އެތައް ކަމެއް ހުރިކަމަށެވެ. އެހެންނަމަވެސް އެ މަނިކުފާނު ވިދާޅުވީ ރައްޔިތުން ވޯޓުދީގެން، ރައްޔިތުންގެ ޙައްްޤުގައި ބަސްބުނަން ތިއްބެވި ބޭފުޅުންނަކީ ކައުންސިލަރުން ކަމަށް ވާތީ، ރައްޔިތުންގެ ހައްޤުގައި ވަކާލާތު ކުރުމުގެ ފުރުޞަތާއި، ރައްޔިތުން ބޭނުންވާ ކަންތައްތައް ވިދާޅުވުމުގެ ފުރުޞަތު ކައުންސިލަރުން އެބަ އޮތް ކަމަށެވެ. އަދި މިއަދު ކޮންމެ ނިންމުމެއް ނިންމަނީ މާލޭން ނޫން ކަމަށް ވެސް ވަޒީރުގެ ވާހަކަފުޅުގައި ވިދާޅުވިއެވެ.

ކޮޅުމަޑުލު އިސްވާރުންގެ މަހާސިންތާ 2024 ގައި ކޮޅުމަޑުލުގެ ރަށްރަށުގެ ކައުންސިލްތަކުގެ ރައީސުންނާއި، ސެކްރެޓަރީ ޖެނެރަލުންނާއި، އަތޮޅުގެ ކަންކަން ބަލަހައްޓަވައި ދައުލަތުގެ މުއައްސަސާތަކުގެ ވެރިންނާއި ޚާއްޞަ މަންދޫންނާއެކު ގާތްގަނޑަކަށް ސާޅީހަކަށް ބޭފުޅުން ބައިވެރިވެވަޑައިގަންނަވައެވެ.