މިދިޔަ އަހަރު މުދަލު ޒަކާތުގެ ގޮތުގައި 100 މިލިޔަނަށްވުރެ ގިނަ ރުފިޔާ!
އަހުމަދު ޝުރާއު
1/13/2025, 6:30:45 AM
--
މުދަލު ޒަކާތުގެ ގޮތުގައި 2024 ވަނަ އަހަރު 100 މިލިޔަނަށް ވުރެ ގިނަ ރުފިޔާ ލިބިއްޖެއެވެ.
މިއީ ދިވެހިރާއްޖޭގެ ތާރީޚުގައިވެސް އެއް އަހަރެއްގެ ތެރޭގައި މުދަލު ޒަކާތުގެ ގޮތުގައި 100 މިލިއަނަށްވުރެ ގިނަ ރުފިޔާ ލިބުން ފުރަތަމަ ފަހަރެވެ,
އިސްލާމީ ކަންތައްތަކާއި ބެހޭ ވުޒާރާއިން ބުނީ 2023 ވަނަ އަހަރުގެ ޑިސެމްބަރ މަހުގެ 18 ވަނަ ދުވަހު ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު އުފައްދަވާފައިވާ ދިވެހިރާއްޖޭގެ ޒަކާތު ހައުސް 2024 ވަނަ އަހަރުގެ ޖަނަވަރީ މަހުގެ 2 ވަނަ ދުވަހު އިފްތިތާޙު ކުރެވިގެން ދިއުމަކީ ދިވެހިރާއްޖޭގެ ޒަކާތުގެ ނިޒާމު ހަރުދަނާކޮށް ތަރައްޤީކުރުމަށް އެޅިގެން ދިޔަ ހަރުދަނާ ފިޔަވަޅެއް ކަމަށެވެ.
އެގޮތުން ނިމިދިޔަ 2024 ވަނަ އަހަރުގެ ތެރޭގައި ދިވެހިރާއްޖޭގެ ޒަކާތު ހައުސްގެ ފަރާތުން ދިވެހި ރައްޔިތުން ޒަކާތާ ގުޅުންހުރި ކަންކަމަށް އަހުލުވެރިކޮށް ހޭލުންތެރި ކުރުމަށްޓަކައި ތަފާތު ހަރަކާތްތަކެއް ކުރިޔަށް ގެންދެވިފައިވާކަން އެވުޒާރާއިން ފާހަގަކުރެއެވެ.
ނަތީޖާއެއްގެ ގޮތުން ދިވެހި ރައްޔިތުން ޒަކާތުގެ ކަންކަމަށް ފަރުވާތެރިވާ މިންވަރު އިތުރުވެފައިވާކަން މޯލްޑިވްސް އިންލޭންޑް ރެވެނިއު އިން އެކުލަވައިލާފައިވާ ހިސާބުތަކުން ދައްކާ ކަމަށާއި އެގޮތުން 2024 ވަނަ އަހަރުގެ ތެރޭގައި މުދަލު ޒަކާތުގެ ގޮތުގައި ޖުމުލަ 101,939,070.15 (ސަތޭކަ އެއްމިލިޔަން ނުވަލައްކަ ތިރީސް ނުވަހާސް ހަތްދިހަ ރުފިޔާ ފަނަރަ ލާރި) ވަނީ ލިބިފައި ކަމަށް ވުޒާރާއިން ބުނެއެވެ.
މިކަން ފާހަގަކޮށް ވުޒާރާއިން ނެރުނު ހާއްސަ ބަޔާނުގައި ވަނީ ދިވެހި ރައްޔިތުންގެ ތެރޭގައި ތިއްބެވި ތަނަވަސްކަމުގެ އަހުލުވެރިން ޒަކާތުގެ ކަންކަމަށް ދެއްވާ އަހައްމިއްޔަތު ފާހަގަކޮށް އެފަރާތްތަކަށް ޝުކުރު އަދާކުރައްވާފައެވެ. އަދި ޒަކާތުގެ ގޮތުގައި ލިބޭ ފައިސާ އަބަދުވެސް ޚަރަދު ކުރެވެމުންދަނީ ޝަރުޢީ އުސޫލުތަކާއި މިންގަނޑުތަކުގައި ކަނޑައަޅާފައިވާ ގޮތުގެ މަތީން އޭގެ ޙައްޤުވެރިންގެ މައްޗަށްކަމުގެ ޔަޤީންކަން ދިވެހި ރައްޔިތުންނަށް އަރުވާފައިވެއެވެ.