ހާލުގައި ޖެހުނު އުމްރާވެރިން ހޮނިހިރު ދުވަހު ރާއްޖެ ގެންނަނީ

އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑުގެ ބެލުމުގެ ދަށުން އުމްރާގެ އަޅުކަމަށް ސައުދީއަށް ދިޔަ އުމްރާވެރިން އުމްރާ ފުރިހަމަކުރުމަށްފަހު ރާއްޖެ ނާދެވި ތާށިވުމާއި ގުޅިގެން އެ އުމްރާވެރިން އަންނަ ހޮނިހިރު ދުވަހު ރާއްޖެ ގެނައުމަށް ސަރުކާރުން އެހީތެރިކަން ފޯރުކޮށްދީފި އެވެ.

މިކަން ހާމަކުރައްވައި އިސްލާމީ ކަންތައްތަކާއި ބެހޭ ވަޒީރު ޑރ ޝަހީމް އަލީ ސައީދު ވިދާޅުވީ ހިޖުރަ ކުންފުނީގެ ޙަވާލުގައި ދިޔަ އުމްރާވެރިން މިހާރުވަނީ، މިނިސްޓްރީގެ އިރުޝާދުގެ ދަށުން ޙައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައި ކަމަށެވެ.

އަދި އެ އުމްރާވެރިން 11 ޖެނުއަރީ ވާ ހޮނިހިރު ދުވަހު ގެ ހެނދުނު 8.10 ގައި ޤަތަރު އެެއަަވޭސް އިން މާލެ ގެނެވޭނެ ކަންވެސް ޝަހީމް ހާމަކުރެއްވި އެވެ.

އަލްހިޖުރަ ގްރޫޕުން ބުނާގޮތުގައި އުމްރާވެރިން ރާއްޖެ ނުގެނެވުނީ އެކުންފުންޏަށް ދިމާވި މާލީ ހާލަތަކާއި ގުޅިގެންނެވެ. ނަމަވެސް މައުލޫމާތު ލިބޭގޮތުގައި އުމްރާވެރިން އުމްރާއަށް ދިޔުމަށް އެގްރޫޕަށް ފައިސާ ދެއްކީ ދެކޮޅު ޓިކެޓު ހިމެނޭހެނެވެ. މިކަމާއި ގުޅިގެން އެ ގްރޫޕަށް އިސްލާމީ ކަންތައްތަކާއި ބެހޭ ވުޒާރާއިން ވަނީ ފިޔަވަޅު އަޅަން ނިންމާފައި އެވެ.

އެކަމާއި ގުޅިގެން އިސްލާމީ ކަންތައްތަކާއި ބެހޭ ވުޒާރާއިން މިއަދު ނެރުނު ބަޔާނެއްގައި ބުނީ އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑުގެ ފަރާތުން، އެ ކުންފުނީގެ 2024 ޑިސެމްބަރު ޢުމްރާ ދަތުރުގައި ދިއުމަށް ހަމަޖެހިފައިވާ ޢުމްރާވެރިން ދަތުރަށް ފައިސާ ދައްކާފައި ވީނަމަވެސް އެ ފައިސާއިން ޢުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާކަމަށް އެ ކުންފުނިން އިޢުތިރާފުވެފައިވާ ކަމަށެވެ.

އަދި އެއުމްރާވެރިން މައްކާއިން ރާއްޖެ އައުމަށް ޓިކެޓު ނަގާފައި ނެތުމުގެ ސަބަބުން ރާއްޖެ ނާދެވިގެން އެ ޢުމްރާވެރިން މިނިސްޓްރީ އޮފް އިސްލާމިކް އެފެއާޒްގެ އެހީތެރިކަމަށް އެދިފައިވުމާ އެކު، ހާލުގައި ޖެހިފައި ތިބި 23 ޢުމްރާވެރިން ވަނީ 09 ޖަނަވަރީ 2025 ގައި، މިނިސްޓްރީ އޮފް އިސްލާމިކް އެފެއާޒްގެ އިރުޝާދުގެ ދަށުން މޯލްޑިވްސް ޙައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް ގެނެވިފައި ކަމަށް ބަޔާނުގައި ބުނެފައި އެވެ.

މީގެ އިތުރުން އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑުގެ ފަރާތުން، އުސޫލު ނަންބަރު: 30-ޖީ/2024 (ދިވެހިރާއްޖެއިން ޢުމްރާއަށް މީހުން ގެންދިޔުމާބެހޭ އުސޫލު)އާ ޚިލާފުވެފައިވާތީ މި އުޞޫލުގެ ދަށުން "އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑް"އާ މެދު ބޮޑެތި ފިޔަވަޅުތައް އެޅުމަށް މިނިސްޓްރީ އޮފް އިސްލާމިކް އެފެއާޒްއިން ވަނީ ނިންމާފައި އެވެ.

އަޅަން ނިންމި ފިޔަވަޅުތަކުގެ ތެރޭގައި

• ދިވެހިރާއްޖެއިން ޢުމްރާއަށް މީހުން ގެންދިއުމަށް މިނިސްޓްރީން، އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑްއަށް ދޫކޮށްފައިވާ ހުއްދަ ހިފެހެއްޓުން
• އެއްލައްކަ (-/100،000) ދިވެހި ރުފިޔާއިން އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑް ޖޫރިމަނާކުރުން
• އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑަށް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް ޢުމްރާއަށް މީހުން ގެންދިޔުމުގެ ހުއްދަނުދިނުން
• އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑްގެ ފަރާތުން ޢުމްރާއަށް ގެންގޮސް ޙާލުގައި ޖެހުނު މީހުން ރާއްޖެ ގެނައުމަށް މިނިސްޓްރީ އޮފް އިސްލާމިކް އެފެއާޒްއިން ކުރި ޚަރަދު އެ ކުންފިން ހޯދުން
• އަލްހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑްގެ ފަރާތުން "ޢުމްރާއަށް ގެންދިޔުމުގައި ދިވެހިރާއްޖެއިން ޢުމްރާއަށް މީހުން ގެންދިޔުމާބެހޭ އުސޫލު"އާ ޚިލާފުވެފައިވާތީ މި މައްސަލަ ތަޙްޤީޤުކޮށް ޤާނޫނީ ފިޔަވަޅު އެޅުމަށް މޯލްޑިވްސް ޕޮލިސް ސަރވިސްއަށް ހުށައެޅުން.