ހަސަން ލަތީފު އެމްޑީއާއި ގުޅިވަޑައިގެންފި

ކުރީގެ ރައީސް މުހައްމަދު ނަޝީދު އިސްވެހުންނަވައި އުފެއްދެވި ދަ ޑިމޮކްރެޓްސް ރައީސްކަމުން އިއްޔެ އިސްތިއުފާ ދެއްވި ހަސަން ލަތީފު އިދިކޮޅު އެމްޑީޕީއާއި ގުޅިވަޑައިގެންފި އެވެ.

މައުލޫމާތު ލިބިފައިވާގޮތުގައި ހަސަން ލަތީފު އެމްޑީއާއި ގުޅިވަޑައިގެންނެވީ މިއަދުގެ ހެނދުނުގެ ވަގުތެއްގައި އެވެ. އެގޮތުން އެމްޑީޕީގެ މެމްބަރޝިޕް ފޯމު މިހާރު ހަސަން ލަތީފު ވަނީ ޕާޓީގެ އިދާރާއަށް ހުށަހަޅުއްވާފައި އެވެ.

އެމްޑީޕީއިން ވެސް މިއަދު ވަނީ ހަސަން ލަތީފު އެމްޑީޕީއާއި ގުޅިވަޑައިގެންނެވިކަން ރަސްމީކޮށް ހާމަކުރައްވައި އޭނާއަށް މަރުހަބާ ދަންނަވާފައި އެވެ.

ހަސަން ލަތީފު އަކީ އެމްޑީޕީގެ ކުރީގެ ޗެއާޕާސަންކަންވެސް ކުރެއްވި ބޭފުޅެކެވެ. ނަމަވެސް ރައީސް ނަޝީދު އާއި ރައީސް އިބްރާޙިމް މުހައްމަދު ސޯލިހް އާއި ދެމެދު އުފެދުނު ދެބަސްވުންތަކެއްގައި އެމްޑީޕީގެ ދެބައިވެ ރައީސް ނަޝީދުއާއި އެކު ހަސަން ލަތީފު އެޕާޓީ ދޫކުރެއްވީ 2023 ވަނަ އަހަރުގެ ތެރޭގައި އެވެ. އެޔަށްފަހު ނަޝީދުގެ ލަފައަށް ދަ ޑޮމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދެވުމުގައި އިސްކޮށް ހުންނެވީ ހަސަން ލަތީފު އެވެ. އެގޮތުން އެޕާޓީގެ ފުރަތަމަ ރައީސް އަކަށް ވެވަޑައިގެންނެވީ ހަސަން ލަތީފު އެވެ.

ހަސަން ލަތީފުގެ އިތުރުންވެސް ޑިމޮކްރެޓްސްގެ އިސް ފަރާތްތަކުން ވަނީ އެމްޑީޕީއާއި އަލުން ގުޅިވަދައިގެންފައި އެވެ. އޭގެ ތެރޭގައި ޑިމޮކްރެޓްސްއިން 2023 ވަނަ އަހަރު ރިޔާސީ އިންތިހާބުގައި ވާދަކުރެއްވި އިލްޔާސް ލަބީބްގެ ރަނިންގ މޭޓު ހުސެއިން އަމުރުވެސް ހިމެނިވަޑައިގަންނަވައެވެ. އަދި ރައީސް އޮފީހުގެ ކުރީގެ މިނިސްޓަރު މުހައްމަދު ޝިފާޒު އާއި ރައްޔިތުންގެ މަޖިލީހުގެ މެދުހެންވޭރު ދާއިރާގެ ކުރީގެ މެންބަރު އަލީ އާޒިމް ވެސް ހިމެނިވަޑައިގަންނަވައެވެ.