އިޖްތިމާއީ މަޝްރޫއު ހިންގަން އެހީ ދިނުުމުގެ ތިން ވަނަ ފޭސްގެ އެއްބަސްވުމުގައި އިންޑިއާއާއިއެކު ސޮއިކޮށްފި

ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓްސް (އެޗްއައިސީޑީޕީ) ހިންގުމާއި ގުޅޭ އެމްއޯޔޫ އެއްގައި އިންޑިއާއާ އެކު ސޮއިކޮށްފިއެވެ.

މި އެއްބަސްވުމުގައި ސޮއިކުރުމުގެ ރަސްމިއްޔާތު އޮތީ މިހާރު ރާއްޖޭގެ ފޮރިން މިނިސްޓަރ ޑރ އަބްދުالله ހަލީލް އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު އިންޑިއާގެ އެކްސްޓާނަލް އެފެއާޒް މިނިސްޓްރީގައި އެވެ.

އެގޮތުން މި އެއްބަސްވުމުގައި ދިވެހި ސަރުކާރުގެ ފަރާތުން ފޮރިން މިނިސްޓަރު ހަލީލް ސޮއިކުރެެއްވި އިރު އިންޑިއާ ސަރުކާރުގެ ފަރާތުން ސޮއިކުރެއްވީ އެގައުމުގެ އެކްސްޓާނަލް އެފެއާޒް މިނިސްޓަރު ޑރ ޖައިޝަންކަރެވެ.

މި އީ އިންޑިއާއިން ރާއްޖެއަށް ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓްސް (އެޗްއައިސީޑީޕީ) ހިންގުމަށް އެހީވާ ތިން ވަނަ ފަހަރެވެ.

މިއަދު ސޮއިކުރި އެމްއޯޔޫގެ ދަށުން ރާއްޖޭގެ އެކި ރަށު އަދި ސިޓީ ކައުންސިލްތަކުގެ ދަށުން ހިންގުމަށް ހަމަޖެހިފައިވާ ހައި އިމްޕެކްޓް މަޝްރޫއުތަކަށް އިންޑިއާއިން މާލީ އެހީދޭނެ އެވެ. އިޖްތިމާއީ އަދި އިގްތިސާދީ ތަރައްގީއަށް މަގުފަހި ކުރުވާ މި މަޝްރޫއުތަކުގެ ތެރޭގައި ތައުލީމީ ދާއިރާއަށް ބޭނުންވާ އުމްރާނީ ތަރައްގީއާއި ސިއްހަތާއި ކޮމިއުނިޓީ ޑިވެލޮޕްމެންޓާއި ތިމާވެއްޓާއި ސަގާފީ ތަރިކަ ހިމާޔަތް ކުރުމާއި، އަންހެނުން ބާރުވެރިކުރުވުމާއި، ކުޑަކުދިންގެ ވެލްފެއާއާ ގުޅުން ހުރި ކަންކަން ހިމެނެއެވެ.