މިނިސްޓަރު ޑރ ހަލީލް އިންޑިއާގެ ޖައިޝަންކަރާއި ބައްދަލުކުރައްވައިފި

ރާއްޖޭގެ ޚާރިޖީ ވަޒީރު ޑރ.ޢަބްދުالله ޚަލީލް، އިންޑިއާގެ އެކްސްޓާނަލް އެފެއާޒް މިނިސްޓަރ ޑރ.އެސް ޖައިޝަންކަރާއި މިއަދު ބައްދަލުކުރައްވައިފިއެވެ.

ފޮރިން މިނިސްޓްރީން ބުނީ މި ބައްދަލުކުރެއްވުމުގައި ރައީސް ޑރ މުޙައްމަދު މުޢިއްޒު 2024 ވަނަ އަހަރުގެ އޮކްޓޫބަރު މަހު އިންޑިޔާއަށް ކުރެއްވި ފުރަމާނަ ދަތުރުފުޅުގައި ދެޤައުމުގެ ލީޑަރުން އިސްކަންދެއްވަން ނިންމެވި ދާއިރާތަކާއި، ދެގައުމުގެ ގުޅުމާއި ބެހޭ އެންމެހާ ކަންކަމާ ބެހޭގޮތުން މަޝްވަރާކުރެއްވި ކަމަށެވެ.

މި ބައްދަލުކުރެއްވުމުގައި ދެވަޒީރުން ދެއްކެވި ވާހަކަފުޅުގައި، ދެޤައުމުގެ މަސްލަހަތު ހިމެނޭ ދާއިރާތަކުން ދެޤައުމުގެ ގުޅުން އިތުރަށް ބަދަހިކުރެއްވުމަށް މަސައްކަތްކުރައްވާނެކަމުގެ ޔަޤީންކަން ދެއްވިއެވެ.

އިންޑިއާގެ ވެރިރަށް ނިއުދިއްލީގައި ބޭއްވެވި ރަސްމީ މަޝްވަރާތަކުގައި، އިޤްތިޞާދީ ޕާޓްނަރޝިޕާއި، އިންޑިޔާގެ ހިލޭ އެހީއާއި ލައިން އޮފް ކްރެޑިޓް އިނީޝިއޭޓިވްސްގެ އެހީގައި ކުރިއަށްގެންދަވާ މަޝްރޫޢުތައް ކުރިއަށްދާގޮތް ދެވަޒީރުން ވެސް ފާހަގަކުރެއްވިއެވެ.

މި ބައްދަލުވުމުގައި މިނިސްޓަރު ޚަލީލް ދެއްކެވި ވާހަކަފުޅުގައި، މިހާރު ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށް އިންޑިއާއިން ވެދެއްވަމުން ގެންދަވާ އެއްބާރުލެއްވުމާއި އެހީތެރިކަމަށް ޓަކައި ދިވެހި ސަރުކާރަށް ޝުކުރު އަދާކުރެއްވިއެވެ. އަދި ދެޤައުމުގެ ދެމެދުގައި އިޤްތިޞާދީ، ވިޔަފާރީގެ އަދި އިންވެސްޓްމަންޓްގެ ގުޅުން އިތުރަށް ބަދަހިކުރުމަށާއި، ރާއްޖޭގެ އިޤްތިޞާދީ އަދި އިޤްތިޞާދީ ކުރިއެރުމުގައި އިންޑިޔާއިން އަދާކުރަމުންދާ ދައުރު ފާހަގަކުރައްވާ މިނިސްޓަރ ވަނީ ދެޤައުމުގެ ދެމެދުގައި އޮތް ގާތް ގުޅުން ފާހަގަކުރައްވާފައެވެ.

މި ބައްދަލުކުރެއްވުމުގައި ދެވަޒީރުން ދެއްކެވި ވާހަކަފުޅުގައި، ރާއްޖެއާއި އިންޑިޔާއާ ދެޤައުމުގެ ގުޅުން އިތުރަށް ބަދަހިކުރެއްވުމަށް އިތުރު މަގުތައް ހޯއްދެވުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.