ފަހަތުން އަރައި ރައިޒިން ބްލޫމްސް ބަލިކޮށް ފައިނަލްގެ ދެވަނަ ޖާގަ ކަނޑުހުޅުދޫއަށް

ގައްދޫ ކައުންސިލުން މުޅި ހުވަދޫއަތޮޅަށް ހުޅުވާލައިގެން ކުރިޔަށްގެންދާ " ބީ ބޯލްޑް ހުވަދޫ ވަތަބަނޑޭރި ވޮލީބޯލް ޗެލެންޖް 2024" ގެ އަންހެން ޑިވިޝަންގައި މިއަދު ހަވީރު ކުޅުނު ޕްލޭއޮފް މެޗުގައި ފަހަތުން އަރައި 3-1 ގެ ނަތީޖާއަކުން ރައިޒިން ބްލޫމްސް ބަލިކޮށް ކަނޑުހުޅުދޫ އިން މުބާރާތުގެ ފައިނަލްގެ ދެވަނަ ޖާގަ ކަށަވަކޮށްފިއެވެ.

މުބާރާގެ ސެމީފައިނަލް ފުރަތަމަ މެޗުގައި ޑީއެސްއާރުސީ ރަނިން އަތުން ސީދާ ތިން ސެޓުން ކަނޑުހުޅުދޫ ބަލިވިއިރު، ސެމީފައިނަލް ދެވަނަ މެޗުގައި ރައިޒިން ބްލޫމްސް ވަނީ 3-2 ގެ ނަތީޖާއަކުން ގެމަނަފުށި ބަލިކޮށްފައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ސެޓް 23-25 ގެ ނަތީޖާއަކުން ކާމިޔާބުކުރީ ރައިޒިން ބްލޫމްސް އެވެ. އަދި ޖެހިގެންއައި ދެވަނަ ސެޓް 22-25 ގެ ނަތީޖާއަކުން ކަނޑުހުޅުދޫ ކާމިޔާބުކުރިއިރު، މެޗުގެ ތިނަވަނަ ސެޓް ވަރަށް ވާދަވެރި ކުޅުމަކަށްފަހު ކަނޑުހުޅުދޫ އިން ކާމިޔާބުކުރީ 26-28 ގެ ނަތީޖާއަކުންނެވެ.

މީގެ އިތުރުން މެޗުގެ ހަތަރުވަނަ ސެޓް ހަތަރު ޕޮއިންޓްގެ ލީޑަކާއެކު 21-25 ގެ ނަތީޖާއަކުން ކަނޑުހުޅުދޫ ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ ކަނޑުހުޅުދޫ ޓީމުގެ ޝިފްޒާ އަބްދުއް ސަމަދު އެވެ.

ގައްދޫ ކައުންސިލްގެ ފަރާތުން އިންތިޒާމްކޮށް މުޅި ހުވަދު އަތޮޅަށް ހުޅުވާލައިގެން ބާއްވާ މިމުބާރާތުގެ އަންހެން ޑިވިޝަނުގައި މިއަހަރު އަށް ޓީމަކުން ވާދަކުރިއިރު، އޭގެ ތެރޭގައި ގައްދޫ ކައުންސިލްގެ ޚާއްސަ ދައުވަތަކަށް ފުވައްމުލަކު ސިޓީ އިން ބައިވެރިވި އަންހެން ދެޓީމު ވެސް ހިމެނެއެވެ.

މިމުބާރާތުގެ އަންހެން ޑިވިޝަނުގެ މެޗުތައް ކުރިއަށް ގެންގޮސްފައި ވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ މެދުގައި ކުޅެވޭ ސެމީފައިނަލް ފުރަތަމަ މެޗުން މޮޅުވާ ޓީމަށް މުބާރާތުގެ ފައިނަލުން ޖާގަ ލިބިގެންދާނެއެވެ.

މީގެ އިތުރުން ދެގުރޫޕުން ވެސް ދެވަނަ ހޯދި ދެޓީމުގެ މެދުގައި ކުޅެވޭ ސެމީފައިނަލުގެ ދެވަނަ މެޗުން މޮޅުވާ ޓީމެއް ޕްލޭއޮފް މެޗުގައި ވާދަކުރަންޖެހޭނީ ސެމީފައިނަލް ފުރަތަމަ މެޗުން ބަލިވި ޓީމާއި ދެކޮޅަށެވެ. އަދި ޕްލޭއޮފް މެޗުން މޮޅުވާ ޓީމަށް މުބާރާތުގެ ފައިނަލުގެ ދެވަނަ ޖާގަ ލިބިގެންދާނެއެވެ.

23 ޑިސެންބަރު 2024 އިން 3 ޖެނުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 55،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައި ވާއިރު، މުބާރާތުގެ ޓައިޓަލް ސްޕޮންސަރ އަކީ ބީ ބޯލްޑް ޕްރައިވެޓް ލިމިޓެޑެވެ. އަދި މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރުމަށް ހަމަޖެހިފައިވާއިރު، މުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.