ދެކުނު ކޮރެއާގެ ފުލުހުން ޖެޖޫ އެއާގެ ވެރިޔާ ގައުމުން ބޭރަށް ފުރުން މަނާކޮށްފި

ދެކުނު ކޮރެއާގައި މިހާތަނަށް ހިނގި އެންމެ ނުރައްކާތެރި ވައިގެ ކާރިސާގެ ތަހުގީގެއް ކުރަމުން ދަނިކޮށް ޖެޖޫ އެއާގެ ޗީފް އެގްޒެކެޓިވް ކިމް އީ-ބޭ ގައުމުން ބޭރަށް ދިއުން އެ ގައުމުގެ ފުލުހުން މަނާކޮށްފި އެވެ.

މިދިޔަ ބުރާސްފަތި ދުވަހު ޖެޖޫ އެއާގެ ފްލައިޓް 2216 ގައި ހިނގި ނުރައްކާތެރި އެކްސިޑެންޓްގައި 181 މީހުންގެ ތެރެއިން 179 މީހުން މަރުވި ސަބަބު އޭވިއޭޝަން އޮތޯރިޓީން ތަހުގީގު ކުރަމުން ދަނިކޮށް ފުލުހުން ނެރުނު ބަޔާނެއްގައި ބުނެފައި ވަނީ އެކްސިޑެންޓް ހިނގަން މެދުވެރިވި ސަބަބާއި ޒިންމާ "އަވަސް އަދި ހަރުދަނާ ގޮތެއްގައި ކަނޑައެޅުމުގެ ވިސްނުން ގެންގުޅޭ" ކަމަށެވެ.

މިއަދު ހެނދުނު ޖިއޮނަމް ޕްރޮވިންޝަލް ޕޮލިސް އެޖެންސީން ވަނީ ފްލައިޓް 2216 ވެއްޓުނު މުއާން އެއާޕޯޓާއި ހުޅަނގު ދެކުނު ސިޓީގައި ހުންނަ އެ އެއާލައިންގެ ރީޖަނަލް އޭވިއޭޝަން އޮފީހާއި ވެރިރަށް ސޯލްގައި ހުންނަ ޖެޖޫ އެއާގެ އޮފީހުގައި "ސާޗް އެންޑް ސީޒަރ އޮޕަރޭޝަންސް" ކުރިއަށް ގެންގޮސްފައެވެ.

ދެކުނު ކޮރެއާގެ ކަމާބެހޭ ފަރާތްތަކުން ބުދަ ދުވަހު ބުނީ ބޯއިން 737-800 މަރުކާގެ ދެ ކަޅު ފޮށީގެ ތެރެއިން އެއް ފޮށިން އިބްތިދާއީ ޑޭޓާ ނެގި ކަމަށާއި އަނެއް ފޮށި އެނަލިސިސް ކުރުމަށް އެމެރިކާއަށް ފޮނުވަން ނިންމާފައި ވަނީ އެ ބޯޓު ވެއްޓުނު ހާދިސާގައި ލިބުނު ގެއްލުމުގެ ސަބަބުން ކަމަށެވެ.

ދެކުނު ކޮރެއާގެ އޮފިޝަލުން ވަނީ ބޯއިން 737-800 މަރުކާގެ ހުރިހާ މަތިންދާ ބޯޓުތައް އިންސްޕެކްޓް ކުރުމުގެ އިތުރުން އެ ގައުމުގެ އެހެނިހެން ހުރިހާ އެއާލައިންތަކެއްގެވެސް ފުޅާ އިންސްޕެކްޝަނެއް ފަށާފައި އެވެ.