މާޝަލް ލޯ އިއުލާނުކުރުމާއި އެކު ދެކުނު ކޮރެއާ ބޮޑު ހަލަބޮލިކަމެއްގެ ތެރޭގައި!

ކުއްލި ގޮތަކަށް މިރޭގެ ވަގުތެއްގައި އިއުލާނުކުރި މާޝަލް ލޯ އާއި އެކު ދެކުނު ކޮރެއާ ހަލަބޮލިވެއްޖެ އެވެ.

ޑޮމޮކްރަސީގެ ނިޒާމެއް އޮތް ދެކުނު ކޮރެއާގައި މާޝަލް ލޯ ހިންގަން ނިންމައި އެކަން ހާމަކުރެއްވީ އެގައުމުގެ ރައީސް ޔޫން ސުކް ޔޯލް ދެއްވި ކުއްލި ޓީވީ ބަސްދީގަތުމެއްގައި އެވެ.

މި އިއުލާނާއި އެކު މާޝަލް ލޯ ކޮމާންޑަރަކަށް އެގައުމުގެ އަސްކަރިއްޔާގެ އިސްވެރިޔާ ޕާކް އެން-ސޯ އައްޔަނުކުރުމާއި އެކު އޭނާ ވަނީ އެގައުމުގެ މާޝަލް ލޯ އަމުރު ނެރުއްވާފައި އެވެ. އެމައުރުގައި ވާގޮތުން ނަމަ އެގައުމުގެ ރައްޔިތުންނަށް ހިޔާލު ފާޅުކުރުމުގެ މިނިވަންކަން މިހާރު މާޝަލް ލޯގެ ދަށުން އޮތީ ބަންދުވެފައި އެވެ. އަދި އެގައުމުގެ މީޑީއާތަކުގެ ކޮންޓްރޯލްވެސް މިވަގުތު އޮތީ އަސްކަރިއްޔާގެ ބެލުމުގެ ދަށުގައި އެވެ.

މާޝަލް ލޯ ގެ އަމުރުގައި ވާގޮތުން ނަމަ އެގައުމުގެ ގާނޫނު ހަދާ މަޖިލީހާއި އެހެނިގެން ހުރިހާ ބާރެއް ވަގުތީ ގޮތުން އޮތީ ސަސްޕެންޑު ކޮށްފައެވެ. ނަމަވެސް އެގައުމުގެ ގާނޫނު ހަދާ މަޖިލީހުން މިރޭ ވަނީ ކުއްލި ބައްދަލުވުމެއް ބާއްވައި މާޝަލް ލޯ ގެ އަމުރު ބާތިލުކުރަން ފާސްކޮށްފައި އެވެ.

މި ނިންމުން ނިންމިތާ މާގިނަ އިރުތަކެއް ނުވަނީސް އެގައުމުގެ އަސްކަރިއްޔާއިން ވަނި އެގައުމުގެ ގާނޫނު ހަދާ މަޖިލީހަށް ބަރު ހަތިޔާރާއި އެކު ވަދެގެންފައި އެވެ. މި ހަބަރު އެގައުމުގައި ފެތުރުމާއި އެކު ސަރުކާރާއި ދެކޮޅަށް އަޑުއުފުލުމަށް ދެކުނު ކޮރެއާގެ ގިނަ އަދަދެއްގެ ރައްޔިތުންތަކެއް މިހާރު ވަނި ގާނޫނު ހަދާ މަޖިލީސް ކައިރިއަށް އެއްވެފައި އެވެ.

އަދި އެގައުމުގެ ފުލުހުން މިހާރު ވަނީ އެމަޖެންސީ ސްޓޭޓަން ލެވެލް 2 އެމަޖެންސީއަށް ބަދަލުކޮށްފައި އެވެ.