ވީއައިއޭ މާދަމާ ބާރުބޮޑުވާނެ: އެމްއޭސީއެލްގެ އިލްތިމާސްއެއް ފުރާ ޕަސެންޖަރުންނާއި ޓެކްސީ ޑްރައިވަރުންނަށް!

ރާއްޖޭގެ މައި އެއާޕޯޓު ވެލާނާ އިންޓަނޭޝަނަލް އެއާޕޯޓު މާދަމާ ބާރު ބޮޑުވާނެތީ އެކަމަށް ސަމާލުވުމަށް އެއާޕޯޓު ހިންގާ އެމްއޭސީއެލުން އިލްތިމާސްކޮށްފި އެވެ.

އެމްއޭސީއެލުން މިއަދު ނެރުނު ބަޔާނެއްގައި ބުނީ އުމްރާގެ އަޅުކަމަށް ދިޔަ ގިނަ ބަޔަކު މާދަމާ އެނބުރި ރާއްޖެ އަންނަން ހަމަޖެހިފައިވާ އެއާޕޯޓު މަގުތަކާއި ޓާމިނަލް ސަރަހައްދުތަކުގައި ޓްރެފިކް ބޮޑުވާނެ ކަމަށް ލަފާ ކުރެވޭ ކަމަށެވެ.

އެހެންކަމުން ދަތުރުކުރައްވާ ޕަސެންޖަރުން އެކަމަށް ސަމާލުވެ ދަތުރުފަތުރުގެ ތަޖުރިބާ ފަސޭހަކަމާ އެކު ކުރިއަށް ގެންދިއުމަށް ޓަކައި ފުރުމުގެ މަދުވެގެން ތިން ގަޑިއިރު ކުރިން އެއާޕޯޓަށް އައުމަށް އެމްއޭސީއެލުން ވަނީ އިލްތިމާސްކޮށްފައެވެ.

މީގެ އިތުރުން އެމްއޭސީއެލް އިން ވަނީ ޕީކް ވަގުތުތަކުގައި ހުރިހާ ޓެކްސީ ސެންޓަރުތަކާއި ޑްރައިވަރުން ޓްރެފިކަަށް ސަމާލުވެ އެއްބާރުލުންދިނުމަށްވެސް އެދިފައި އެވެ.

އެގޮތުން އެންމެ ބާރު ބޮޑުވާނެ ކަމަށް އެމްއޭސީއެލުން ލަފާކުރަނީ ހެނދުނު 06:00 އިން 09:00 އަށެވެ. އެވަގުތު ޖުމުލަ 2678 ޕަސެންޖަރުން އަންނާނެ ކަމަށް ލަފާކޮށްފައިވާއިރު އޭގެ ތެރޭގައި 618 އުމްރާވެރިންވެސް ހިމެނޭ ކަމަށް އެމްއޭސީއެލުން ބުނެއެވެ. އަދި އެވަގުތު 1372 ޕަސެންޖަރުން ފުރަން ހަމަޖެހިފައިވާކަންވެސް ވަނީ ފާހަގަކޮށްފައެވެ.

އޭގެ އިތުރުން މެންދުރު 14:00 އިން 16:00 އަށް 452 އުމްރާވެރިން ހިމެނޭހެން 2071 ޕަސެންޖަރުން އަންނާނެ ކަމަށް ލަފާކޮށްފައިވާއިރު 1091 ޕަސެންޖަރުން ފުރުމަށްވެސް ހަމަޖެހިފައިވާކަމަށްވެސް އެމްއޭސީއެލުން ބުނެއެވެ.

އަންނަ ހަފްތާއަކީ ސްކޫލު ޗުއްޓީ ނިމި ސްކޫލުތައް ހުޅުވޭ ހަފްތާކަމުން މި ހަފްތާ ބަންދުގައި ގިނަ ބަޔަކު ރަށްރަށަށް ފުރަން ވަނީ ހަމަޖެހިފައި އެވެ. އަދި އާ އަހަރާއި ގުޅިގެން ރާއްޖެއައި ގިނަ އަދަދެއްގެ ފަތުރުވެރިންވެސް މި ހަފްތާ ބަންދުގައި ފުރާނެކަމަށް ބެލެވެއެވެ.