ޑިޖިޓަލް ކަލަންޑަރު އަޕްޑޭޓާއެކު އެސްޓިއޯއިން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ކުރާ ވައުދު ވަރުގަދަކޮށްފި

ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން ވިޔަފާރީގަޔާއި ކުންފުނީގެ އާންމު ހިންގުމުގައި ގެންގުޅޭ ސަސްޓެއިނަބިލިޓީ، އިނޮވޭޝަން ،އަދި ޑިޖިޓަލް ޓްރާންސްފޯމަޝަން ވިސްނުމުގެ ދަށުން، 2024 ވަނަ އަހަރު ތައާރަފްކުރެވުނު އޮފީސް މޭޒުތަކާއިގޭތެރޭގައި ބެހެއްޓުމަށްވެސް މަގުބޫލު 'އެސްޓީއޯ ޑިޖިޓަލް ކަލަންޑަރު' ވެގެން ދިޔައީ އެޅުނު ބިންގަލަކަށެވެ.

މިބިންގަލާއެކު އެސްޓީއޯއިން ކުރީ އަހަރުތަކާ ހިލާފަށް 2025 ވަނައަހަރަށް ވަނީ މި ކަލަންޑަރު ސޮޕްޓްވެއާރ އަޕްޑޭޓާއެކު 'ރިޔޫސް' ކުރުމަށް ނިންމާފައެވެ.

އެކުންފުނިން ބުނީ މި ނިންމުމަކީ އެކުންފުނި ހިންގުމުގައި ގެންގުޅޭ ދެމެހެއްޓެނިވި ވިސްނުންތަކާއި އުސޫލުތަކާއެކު، އެސްޓީއޯގެ ޕޭޕަރލެސް ޕޮލިސީގެ ދަށުން ތިމާވެއްޓަށް ކުރާ އަސަރު ކުޑަކުރުމަށް ކުރަމުންދާ މަސައްކަތްތަކަށް އިތުރު ބާރުދިނުމަށް ނިންމާފައިވާ ނިންމުއް ކަމަށެވެ. އަދި 2025 ވަނަ އަހަރުގެ ސޮފްޓްވެއާރ އަޕްޑޭޓާއެކު މިފަހަރުވެސް އެސްޓީއޯ ޑިގިޓަލް ކަލަންޑަރު ވެގެންދާނީ އިތުރު ފަސޭހަތަކެއް ލިއްބައިދޭ, މަގުބޫލު ވަސީލަތަކަށް ކަމުގައި އެކުންފުނިން ދެކެއެެވެ.

“ރީޔޫސް، އަޕްޑޭޓް، ޓްރާންސްފޯމް” ގެ ދަށުން އެކުންފުނިން ކޮށްފައިވާ ބައެއް މަސައްކަތަކާއި ގުޅޭގޮތުން އެކުންފުނިން ބުނީ ކަރުދާހަށް ކުރާ ހޭދަ ކުޑަކުރުމުގެ ސިޔާސަތުގެ ދަށުން ކުންފުނީގެ ހިންގުމުގައި ކަރުދާސް ބޭނުންކުރާ މިންވަރު ވަނީ ވަރަށް ބޮޑުތަނުން ދަށްކުރެވިފައި ކަމަށެވެ. ވަކިން ޚާއްސަކޮށް ޕްރިންޓްކުރެވޭ ކަލަންޑަރުތައް އުފެއްދުމާއި އުފުލުމުގައި ކާބަން ބޭރުވާ މިންވަރު ހީވެސް ނުކުރާހާ މަތި ކަމަށާއި މީގެ ކުރިން އެސްޓީއޯއިން އައީ އަހަރެއްގެ މައްޗަށް އާންމުކޮށް އަށެއްކަހާސް ކަލަންޑަރު ޕްރިންޓު ކުރަމުންކަން އެކުންފުނިން ފާހަގަކުރެއެވެ. ނަމަވެސް ޑިޖިޓަލް ކަލަންޑަރުގެ ސަބަބުން އަލުން ޕްރިންޓްކުރަން ނުޖެހި، ކުނި އުފެދުމާއި ތިމާވެއްޓަށް ދެވޭ ގެއްލުން ވަރަށް ބޮޑަށް ކުޑަކުރެވޭ ކަމަމަށް އެކުންފުނިން ބުނެއެވެ.

މިކަންކަމުގެ ސަބަބުން ތިމާވެއްޓަށް ލިބޭ ބައެއް ފައިދާތަކުގެ ތެރޭގައި ގަސްތައް ސަލާމަތްވުމާއި ކުނިގޮނޑުތަކަށް އުކާލެވޭ ކުނި މަދުވުމުގެ އިތުރުން ކާބަން ފުޓްޕްރިންޓް ކުޑަވެގެންދާނެ ކަމަށް އެސްޓީއޯއިން ބުނެއެވެ. ކޮންމެ އަހަރަކު ކަލަންޑަރު ޕްރިންޓްކުރުމަށް ގިނަ އަދަދެއްގެ ކަރުދާހާއި ދެލި ބޭނުން ކުރުމުގެ ސަބަބުން ގަސްކެނޑުމާއި ތިމާވެށި ތަޣައްޔަރުވުމަށް މަގުފަހިވާ ކަމަށާއި ކޮންމެ އަހަރަކު އައު ކަލަންޑަރެއް ތައާރަފްކުރުމަށް އެތަކެއް ވަގުތާއި ވަސީލަތަށް ހޭދަވާކަން ފާހަގކޮށް އެކުންފުނިން ބުނީ ރިޔޫސް ކުރެވޭ ޑިޖިޓަލް ކަލަންޑަރުގެ ސަބަބުން މިލިއަނުން ސަލާމަތްކުރެވި، އެހެނިހެން ކަންކަމަށް މިވަސީލަތްތައް ރިލޮކޭޓްކުރެވިފައިވާ ކަމަށެވެ.

މި އިސްނެގުމުގެ މައިގަނޑު އެއް ބޭނުމަކީ އިސްރާފު މަދުކުރުމުގެ އިތުރުން ދެމިއޮންނަ އަގު އުފެއްދުމަށް އެސްޓީއޯއިން ކުރާ މަސައްކަތެވެ.

މިގޮތުން އަޕްޑޭޓް ކުރެވިފައިވާ ޑިޖިޓަލް ކަލަންޑަރުގައި ހިމެނޭނީ:

1. 2025 ވަނަ އަހަރުގެ ރަސްމީ ބަންދު ދުވަސްތަކާއި އެސްޓީއޯއަށް ހާއްސަ އިވެންޓްތަކުގެ މުހިންމު ތާރީހުތަކާއި ހަރަކާތްތަކުގެ މައުލޫމާތު
2. އާ ތީމްތަކާއި ވިޝުއަލްސްގެ އިތުރުން ކަސްޓަމް ރިމައިންޑަރސް، އަދި އެސްޓީއޯގެ ބައެއް ބްރޭންޑްތަކުގެ މައުލޫމާތު.

އެސްޓީއޯއިން ބުނީ 2025 ވަނަ އަހަރުގެ ސޮފްޓްވެއާރ އަޕްޑޭޓްކުރަން ފަސޭހަވާނެ ކަމަށާއި މިކަމުގެ މައުލޫމާތާ އިރުޝާދު އެސްޓީއޯ ވެބްސައިޓާސޯޝަލްމީޑިއާ މެދުވެރިކޮށް ދާދި އަވަހަށް ހިއްސާކުރެވޭނެ ކަމަށެވެ. އަދި އައު ސޮފްޓްވެއާރގައި އިނޮވޭޝަނާ ޔޫޒަރ އެކްސްޕީރިއަންސަށް އަހައްމިއްޔަތުކަން ދެވިފައިވާނެ ކަމަށާއި ފަސޭހައިން ސޮފްޓްވެއަރ އަޕްޑޭޓް ކުރެވުމުގެ އިތުރުން، ޑިޖިޓަލް ޓޫލްތަކާ ގުޅުވުމާ, ބޭނުންހިފޭ އިތުރު ކަންކަންހިމެނިގެންދާނެކަން އެކުންފުނިން ވަނީ ފާހަގަކޮށްފައެވެ.

އެސްޓީއޯއިން ބުނީ މި އިސްނެގުމަަަކީ ކޯޕަރޭޓް ޑިޖިޓަލައިޒޭޝަންގައި އެސްޓީއޯގެ ލީޑަޝިޕުން ދައްކުވައިދޭ ލާމަސީލު މިސާލެއް ކަމަށެވެ.

އެސްޓީއޯއިން ވަނީ ކޮންމެ އަހަރަކު އައު ކަލަންޑަރެއް އުފެއްދުމަށް ބޮޑެތި ވަސީލަތްތައް ހޭދަކުރުމުގެ ބަދަލުގައި އެއްފަހަރަށްވުރެ ގިނަފަހަރުބޭނުންކުރެވޭ އޯލްޓަނޭޓިވްތައް އިހްތިޔާރުކުރުމަށް އެހެން ފަރާތްތަކަށްވެސް ހިތްވަރުދީ ގޮވާލާފައި އެވެ.