މާލެއަށް ކުރަމުން އަންނަ ވިއްސާރައާއި އެކު މިހާތަނަށް 32 މީހަކަށް ވަގުތީ ބޯހިޔާވަހިކަން ފޯރުކޮށްދީފި

ރެއިން ފެށިގެން މާލެއަށް ކުރަމުން އަންނަ ވިއްސާރައިގައި ގެތަކަށް ފެން ވަނުމުގެ ސަބަބުން 32 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް ނޭޝަނަލް ޑިޒާސްޓާރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

ރެއިން ފެށިގެން ވެރިރަށް, މާލެއަށް ބޯކޮށް ވާރޭވެހުމުގެ ސަބަބުން މާލެގެ ބޮޑު ސަރަހައްދެއް މިހާރުވެސް އޮތީ ފެނުއަޑީގައި އެވެ. އަދި ބައެއް ގެތަކަށް ފެން ވަންނަމުންދާތީ ދިވެހި ސިފައިން ދަނީ މަގުތަކުގައި އެހީތެރިވުމަށް ހަރަކާތްތެރިވަމުންނެވެ.

މި ވިއްސާރައާއި ގުޅޭ އަދާހަމަ މައުލޫމާތު ހިއްސާކުރަމުން އެންޑީއެމްއޭއިން ބުނީ ފެންބޮޑުވުމުގެ ހާދިސާއާއި ގުޅިގެން އެއޮރިޓީއާއި ފުލުހުންނާއި ސިފައިން އަދި ރެޑްކްރެސެންޓުގެ ހޮޓްލައިންތަކަށް 101 ކޯލް ލިބުނު ކަމަށެވެ. އެގޮތުން ގެތަކަށް ފެންވަނުން ކޮންޓްރޯލް ކުރުމަށް ސިފައިންނާއި ސިޓީ ކައުންސިލް ގުޅިގެން 47 ތަނެއްގައި 229 ގެއެއްގައި ވެލި ބަސްތާ ވަނީ ޖަހާފައިކަން އެންޑީއެމްއޭއިން ބުނެއެވެ.

މީގެ އިތުރުން ވަގުތުން އެހީތެރިކަން ބޭނުންވާ 12 ގޭބީސީއެއްގެ ރެޕިޑް އެސެސްމަންޓް ރެޑްކްރެސެންޓުގެ އެހީތެރިކަމާއެކު ހަދައިފައިވާއިރު، 8 ގޭބީސީއެއްގެ 32 މީހަކަށް އެއްދުވަހުގެ މުއްދަތަކަށް ބޯހިޔާވަހިކަމާއި ކެއުން ދީފައިވާ ކަމަށް ވެސް އެންޑީއެމްއޭއިން ވަނީ ހާމަކޮށްފައެވެ.

ފެންބޮޑުވެގެން އެންޑީއެމްއޭއާއި ކަމާބެހޭ ފަރާްތަކަށް އެންމެ ގިނައިން ރިޕޯޓުކޮށްފައިވަނީ މާފަންނާއި ގަލޮޅުން ކަމަށްވެސް އެންޑީއެމްއިން ބުނެއެވެ.

މޫސުމާއި ބެހޭ ގައުމީ އިދާރާގެ ތަފާސްހިސާބުތަކުން ދައްކާގޮތުގައި މިއަދުގެ ހެނދުނު 8 އާއި ހަމައަށް 24 ގަޑިއިރުގެ ތެރޭގައި އެންމެ ބޯކޮށް ވާރޭވެހުނީވެސް މާލެ ސަރަހައްދަށެވެ. އެގޮތުން މާލެއަށް 134 މިލިލީޓަރުގެ ވާރޭ ވެހުނު އިރު ހުޅުލެއަށް 117 މިލިލީޓަރު އަދި ހުޅުމާލެ އަށް 62 މިލިމީޓަރުގެ ވާރޭ ވަނީ ވެހިފައި އެވެ.