ގދ.އަތޮޅު ކައުންސިލް ބެޑްމިންޓަން މުބާރާތުގެ ގުރުލުން ބާއްވައިފި

ހުވަދޫ ބެޑްމިންޓަން ކުލަބުގެ ފަރާތުން އިންތިޒާމުކުރާ ގދ.އަތޮޅު ކައުންސިލް ބެޑްމިންޓަން މުބާތް 2024 ގެ ގުރުލުން މިރޭ ބާއްވައިފިއެވެ.

ތިނަދޫ ސިޓީ ޒުވާނުންގެ މަރުކަޒުގައި މިރޭ ބޭއްވި ގުރުލުމުގެ ރަސްމިއްޔާތުގައި ކުލަބުގެ އިސްވެރިންނާއި މުބާރާތުގައި ވާދަކުރާ ޓީމުތަކުގެ އޮފިޝަލުން އަދި ޓީމު ތަކުގެ ކުޅުންތެރިން ބައިވެރިވެފައިވެއެވެ.

2024 ޑިސެންބަރު 20 އިން 21 އަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި ޖުމްލަ ހަތަރު ޓީމަކުން ބައިވެރިވެފައިވާއިރު، އެޓީމުތަކުގައި އައްޑޫ ސިޓީއާއި ފުވައްމުލައް ސިޓީގެ އިތުރުން މާލޭ ސިޓީ އިން ފާހަގަކޮށްލެވޭ ހުނަރުވެރި މޮޅު ކުޅުންތެރިންތަކެއް ހިމަނާފައިވެއެވެ. އަދި މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.

މީގެ އިތުރުން މިމުބާރާތުގެ ޗެމްޕިއަން ޓީމަށް 25،000 އަދި ރަނަރަޕް ޓީމަށް 15,000 ރުފިޔާގެ ފައިސާގެ އިނާމެއް ކަޑައަޅާފައިވާއިރު، މުބާރާތުގައި ބައިވެރިވެފައިވާ ހަތަރު ޓީމުންކުރެ ކޮންމެ ޓީމަކަށް 2000 ރުފިޔާގެ ފައިސާގެ އިނާމެއް ދިނުމަށް ހުވަދޫ ބެޑްމިންޓަން ކުލަބުން ވަނީ ނިންމާފައެވެ.

މިމުބާރާތުގެ ޑިޖިޓަލް ޕާޓްނަރަކަށް އުރިދޫ މޯލްޑިވްސް ހަމަޖައްސާފައިވާއިރު، ބޭންކިންގް ޕާޓްނަރަކީ ބޭންކް އޮފް މޯލްޑިވްސް އެވެ. އަދި މެޑިކަލް ޕާޓްނަރަކަށް އަބްދުއްސަމަދު މެމޯރިއަލް ހޮސްޕިޓަލް ހަމަޖައްސާފައިވާއިރު، ބޭވަރެޖް ޕާޓްބަރުންނަކީ ހަތްތަރި ކެފޭ އަދި ޒިމަމަން ރެސްޓޯރެންޓެވެ. މީގެ އިތުރުން މުބާރާތުގެ ޓަރަވަލް ޕާޓްނާއަކަށް ވިލާ އެއަރ ހަމަޖައްސާފައިވާއިރު، މިމުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.