--
ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން އުސޫލުން ބޭރުން ގޯތިތަކެއް ދޫކުރި މައްސަލަ ބަލައިދޭން ރައްޔިތުން މަޖިލީހަށް ހުށަހަޅައިފި އެވެ.
މިވަގުތު މަޖިލިސް ޗުއްޓީގައި އޮތް ނަމަވެސް އަވަސް މައްސަލައެއްގެ ގޮތުގައި މި މައްސަލަ ބެލުމަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) އެވެ.
މެމްބަރު ކުޑޫ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީގައި ވިދާޅުވީ މިހާތަނަށް ހާމަވެފައިވާ ގޮތުގައި އުސޫލުން ބޭރުން 50 ގޯތި ދޫކޮށްފައިވާކަން ހާމަވެފައިވާ ކަމަށއި އެ ގޯތިތަކުގެ ޖުމްލަ އަގު 400 މިލިއަނަށްވުރެ މަތިވާނެ ކަމަށް ލަފާކުރެވޭ ކަމަށެވެ. އަދި އެޗްޑީސީން މިކަން ކުރާކަން ހައުސިން މިނިސްޓްރީއަށް އެނގޭތާ ވެސް ފަސް މަސް ދުވަސް ފާއިތުވެފައިވާ ކަމަށާއި ނަމަވެސް އެ ކަމުގައި މިނިސްޓްރީން ނުވަތަ ސަރުކާރުން ވެސް ފިޔަވަޅެއް އަޅައިފައިނުވާ ކަމަށް ވިދާޅުވި އެވެ.
މިއީ ދައުލަތަށް އެއްވެސް މަންފާއެއް ނުވާ ގޮތަށް، ދައުލަތުގެ އަގުހުރި ބިންތަކެއް ވިއްކައިލައިފައިވާ މައްސަލައަކަށް ވާތީ، އެ ކަން ސީރިއަސް މައްސަލައެއްގެ ގޮތުގައި ބަލަންޖެހޭކަމަށް ދެކިވަޑައިގަންނަވާކަމަށް ކުޑޫ ވިދާޅުވި އެވެ. އަދި އެކަން ހިނގި ގޮތް ބެލުމަށާއި، އެ ކަމުގައި ޝާމިލުވާ މީހުން ދެނެގަނެ، އެކަން އިތުރަށް ހިނގައިދިޔަ ނުދިނުމަށް އަޅަން ޖެހޭ ފިޔަވަޅުތައް އަޅަން ކަމާބެހޭ މުއައްސަސާތަކަށް އެންގުމަށް މަޖިލިސް މެދުވެރިކޮށް މައްސަލަ ބަލައިދިނުމަށް އޭނާ ވަނީ ހުށަހަޅުއްވައިފަ އެވެ.
ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތި ދިން މައްސަލައެއް ފެންމަތިވުމާއި ގުޅިގެން ފުލުހުން މިހާރު ވަނީ ޖިނާއީ ތަހުގީގެއް ފަށާފައި އެވެ. ފުލުހުން މިއަދު މީޑިއާތަކަށް ފޮނުވި މެސެޖެއްގައި ވިދާޅުވީ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް އެޗްޑީސީ އިން ގޯތިތަކެއް ދީފައިވާ ކަމަށް ވެލެވޭ މައްސަލައެއް ފެންމަތިވުމާއި ގުޅިގެން އެމައްސަލައިގެ ޖިނާއީ ތަހުގީގެއް ފުލުހުން ފަށާފައިވާ ކަމަށެވެ.
ފަހުގެ
