ސީދާ ތިން ސެޓުން ކޫޑީގޯޅިޔާ ބަލިކޮށް ގެމަނަފުށިން ލީގުބުރު ނިންމާލީ މޮޅަކާއެކު

ގައްދޫގައި މިހާރު ކުރިޔަށްދާ " ބީ ބޯލްޑް ހުވަދޫ ވަތަބަނޑޭރި ވޮލީބޯލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅުނު ދެވަނަ މެޗުގައި ފަސޭހަކަމާއެކު ސީދާ ތިން ސެޓުން ކޫޑީގޯޅިޔާ ބަލިކޮށް ގެމަނަފުށިން ލީގުބުރު ނިންމާލީ މޮޅަކާއެކުގައެވެ.

މުބާރާތުގައި ގެމަނަފުށި ކުޅުނު ފުރަތަމަ މެޗުގައި ދާންދޫ އަތުން 3-2 ގެ ނަތީޖާއަކުން މޮޅުވި ނަމަވެސް، ދެވަނަ މެޗުގައި ކުލަބު ބޮއްކުރާ އަތުން އެޓީމު ބަލިވީ ސީދާ ތިން ސެޓުންނެވެ. އަދި އެޓީމުގެ ތިންވަނަ މެޗުގައި ވާދޫ އަތުން ބަލިވީ ވާދަވެރި ކުޅުމަކަށްފަހު 3-2 ގެ ނަތީޖާއަކުންނެވެ. އަދި މުބާރާތުގައި ކޫޑީގޯޅިއާ އިން ވާދޫ، ކުލަބު ބޮއްކުރާ އަދި ދާންދޫ އާއި ދެކޮޅަށް ކުޅުނު ތިން މެޗުން ވެސް ބަލިވެފައިވަނީ ސީދާ ތިން ސެޓުންނެވެ.

މެޗުގެ ފުރަތަމަ ސެޓް 12 ޕޮއިންޓްގެ ބޮޑު ލީޑަކާއެކު 13-25 ގެ ތަފާތުބޮޑު ނަތީޖާއަކުން ގެމަނަފުށި ކާމިޔާބުކުރިއިރު، މެޗުގެ ދެވަނަ ސެޓާއި ތިންވަނަ ސެޓް އެޓީމުން ކާމިޔާބުކުރީ ހަތް ޕޮއިންޓްގެ ލީޑަކާއެކު 18-25 ގެ ނަތީޖާއަކުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ގެމަނަފުށީގެ އަލީ އަސަދު އެވެ.

މިނަތީޖާއެކު ލީގު ބުރުގައި ކުޅުނު ހަތަރު މެޗުން ލިބުނު ހަ ޕޮއިންޓާއެކު ގެމަނަފުށިން ލީގުބުރު ނިންމާލީ ތާވަލުގެ ތިންވަބައިގައި އޮވެއެވެ. އަދި މިމެޗުން ބަލިވި ކޫޑީގޯޅިޔާ ލީގު ބުރުގައި ކުޅުނު ހަތަރު މެޗުން ވެސް ބަލިވެފައިވާއިރު، އެޓީމުން މުބާރާތް ނިންމާލީ ޕޮއިންޓެއް ނުލިބި ލީގު ތާވަލުގެ ފުލުގައި އޮވެއެވެ.

ގައްދޫ ކައުންސިލްގެ ފަރާތުން އިންތިޒާމްކޮށް މުޅި ހުވަދު އަތޮޅަށް ހުޅުވާލައިގެން ބާއްވާ މިމުބާރާތުގެ ފިރިހެން ޑިވިޝަނުގައި މިއަހަރު ފަސް ޓީމަކުން ވާދަކުރަމުން އަންނައިރު، މި ޑިވިޝަނުގެ މެޗުތައް ކުރިއަށްދަނީ ބައިވެރިވި ފަސް ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗުކުޅެ ލީގުބުރުގެ އެއްވަނަ ހޯދާ ޓީމަކަށް މުބާރާތުގެ ފައިނަލްގެ ފުރަތަމަ ޖާގަ ލިބޭގޮތަށެެވެ.

މީގެ އިތުރުން ލީގުބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބިގެންދާނެއެވެ.

23 ޑިސެންބަރު 2024 އިން 1 ޖެނުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 55،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައި ވާއިރު، މުބާރާތުގެ ޓައިޓަލް ސްޕޮންސަރ އަކީ ބީ ބޯލްޑް ޕްރައިވެޓް ލިމިޓެޑެވެ. އަދި މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރުމަށް ހަމަޖެހިފައިވާއިރު، މުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.