އައްޑޫއިން މާލެއަށް ދަތުރުކުރަމުން ދިޔަ ބޯޓަކުން މީހަކުން ގެއްލިގެން ހޯދަނީ

އައްޑޫއިން ފުރައިގެން މާލެއަށް ދަތުރުކުރަމުން ދިޔަ ބޯޓަކުން މީހަކުން ގެއްލިގެން ހޯދަން ފަށައިފި އެވެ.

ފުލުހުން މިއަދު ބުނީ އައްޑޫ ސިޓީއިން ފުރައިގެން މާލެ ދަތުރުކުރަމުންދިޔަ ސީމެކްސް ބޯޓުގައި ފަޅުވެރިއެއްގެ ގޮތުގައި މަސައްކަތް ކުރާ ނޭޕަލް ރައްޔިތެއް ކަމަށްވާ ރާޖް ކުމާރު ގެއްލިފައިވާ ކަމުގެ މައުލޫމާތު ރޭގެ ވަގުތެއްގައި ފުލުހުންނަށް ރިޕޯޓު ކޮށްފައިވާ ކަމަށެވެ.

އަދި ރާޖް ކުމާރު ބޯޓުގައި ނެތްކަން އެނގިފައިވަނީ އައްޑޫ ސިޓީއާއި ފުވައްމުލައް ސިޓީ އާއި ދެމެދު ކަނޑުމަތިން ފުވައްމުލައް ސިޓީ އާ 8 މޭލަށް ކައިރިވެފައި ވަނިކޮށް ކަމަށެވެ. މިގޮތުން ބޯޓު އައްޑޫ ސިޓީއިން ރޭ 11:30 ހާއިރު ފުރިހަ އިރު ރާޖް ކުމާރު ބޯޓުގައި ހުރި ކަމަށާއި އަދި ރޭ 01:15 ހާއިރު ކެޕްޓަން އާއި ވާހަކަ ދެއްކިކަން މިހާތަނަށް ލިބިފައިވާ މައުލޫމާތު އެނގޭ ކަން ފުލުހުން ވަނީ ހާމަކޮށްފައެވެ.

ރާޖް ކުމާރު ހޯދުމުގެ މަސައްކަތް އެމްއެންޑީއެފުން މިހާރު ކުރަމުންދާއިރު އޭނާ ގެއްލުނު މައްސަލައިގެ ތަހުގީގެއް ފުލުހުން މިހާރު ވަނީ ފަށާފައި އެވެ.