ކެއަރ ވޯކަރުންގެ ހުނަރު އިތުރުކުރުމުގެ ތަމްރީން ޕްރޮގްރާމެއް ފަށައިފި

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިސްނަގައިގެން އަމާން ވެށި، އަމާން ހިޔާ، ފިޔަވަތި އަދި އިޖުތިމާޢީ ޚިދުމަތްކުރާ މަރުކަޒުތަކުގެ ކެއަރ ވޯކަރުންނަށް އަމާޒުކޮށްގެން 05 ދުވަހުގެ ތަމްރީން ޕްރޮގްރާމެއް ފަށައިފިއެވެ.

މި ތަމްރީން ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 15 ޑިސެމްބަރ 2024 ން 19 ޑިސެމްބަރ 2024 އަށެވެ.

މި ޕްރޮގްރާމުގެ ބޭނުމަކީ ދައުލަތުގެ ބެލުމުގެ ދަށުގައިވާ ސްޓޭޓް ކެއަރތަކުގައި މަސައްކަތްކުރާ ކެއަރ ވޯކަރުންނަކީ ދައުލަތުގެ ބެލުމުގެ ދަށުން ބަލަހައްޓާ ފަރާތްތަކަށް ލޯތްބާއި ކުލުނާއެކު، ގާތުން އެހީތެރިކަން ފޯރުކޮށްދޭ ބަޔަކަށް ހެދުމަށް ބާރުއަޅައި، އެފަރާތްތަކަށް ބޭނުންވާ އިލްމާއި ތަމްރީނާއި ހުނަރު ފޯރުކޮށްދިނުމެވެ. އަދި ޚިދުމަތުގެ ފެންވަރު ރަނގަޅުކޮށް، ހަރުދަނާ ގޮތެއްގައި ދައުލަތުގެ ބެލުމުގެ ދަށުގައިވާ ފަރާތްތައް ރައްކާތެރިކަމާއެކު ބެލެހެއްޓުމަށް ބާރުއެޅުމެވެ.

މިގޮތުން ކެއަރ ވޯކަރުން މިހާރު ކުރަމުން ގެންދާ މަސައްކަތްތައް އިތުރަށް ހަރުދަނާވެ، މިހާރު ދެވޭ ޚިދުމަތުގެ ފެންވަރު ރަނގަޅުވެ، ހަރުދަނާ ގޮތެއްގައި ޚިދުމަތްތައް ފޯރުކޮށްދިނުމަށް މި ތަމްރީނުގެ ސަބަބުން މަގުފަހި ވެގެންދާނެއެވެ.

ބ، ހދ، ލ، ނ، ދ، ށ، ހއ އަދި ގދ އަތޮޅުގެ އަމާންވެށީގެ ކެއަރ ވޯކަރުންނާއި ޅ، މ އަދި ތ ފެމެލީ އެންޑް ޗިލްރެންޑް ސަރވިސް ސެންޓަރުގެ ކެއަރ ވޯކަރުންނާއި ފިޔަވަތި، އަދި ވިލިނގިލީ އިޖުތިމާޢީ ޚިދުމަތްދޭ މަރުކަޒުގެ ކެއަރ ވޯކަރުކަރުން ހިމެނޭހެން މި ތަމްރީނުގައި ޖުމްލަ 24 މުވައްޒަފުން ވަނީ ބައިވެރިވެފައެވެ.