ސީބިޓް މޯލްޑިވްސް ޕްރޮޖެކްޓްގެ ދަށުން ބޭއްވުނު ލީޕް ތަމްރީނު ޕްރޮގްރާމް ނިންމާލައިފި

ސީބިޓް މޯލްޑިވްސް ޕްރޮޖެކްޓްގެ ދަށުން ކުރިއަށްގެންދެވުނު ލޯ އެމިޝަންސް އެނަލިސިސް ޕްލެޓްފޯމް (ލީޕް) އަށް އަމާޒުކޮށްގެން ބޭއްވުނު 5 ދުވަހުގެ ތަމްރީނު ޕްރޮގްރާމް ކާމިޔާބުކަމާއެކު ނިންމާލައިފިއެވެ.

މި ތަމްރީނު ޕްރޮގްރާމްގައި ބައިވެރިވި ފަރާތްތަކަށް ހަކަތައިގެ ޑިމާންޑާއި ސަޕްލައި މޮޑެލްކުރުމާއި، ހަކަތައާ ގުޅުންހުރި އެމިޝަންތައް ވަޒަންކުރުމާއި، އަދި ހަކަތައިގެ ނިޒާމުތަކުގެ ޚަރަދުތަކާއި ފައިދާތައް ދިރާސާކުރުމަށް ލީޕް ބޭނުންކުރުމުގެ މުހިންމު ހުނަރުތައް ލިބިގެންދިޔައެވެ.

މި ތަމްރީނު ޕްރޮގްރާމްގެ ސެޝަންތައް ކުރިއަށް ގެންދެވުމުގައި އެސްއީއައި އިން ޑރ. ޝާލޮޓް ވެގްނަރ އާއި އެމްއާރްވީހަބް/ޖީއެޗްޖީއެމްއައި އިން ބެނިސް ޖޯސެފް ވަނީ މަޢުލޫމާތާއި އިރުޝާދު ދެއްވާފައެވެ. މި ދެ ފަރާތުގެ ތަޖުރިބާކާރު އެހީތެރިކަމާއި މަގުދެއްކުމަށް ޚާއްޞަ ޝުކުރެއް ރައްދުކުރެއެވެ.

ސީބިޓް މޯލްޑިވްސް ޕްރޮސް ޕްރޮޖެކްޓަކީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) އިން ފަންޑުކޮށްގެން، ޔޫއެން އެންވަޔަރަންމަންޓްގެ އެހީތެރިކަމާއެކު މިނިސްޓްރީ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނަރޖީން ތަންފީޒުކުރަމުންދާ މަޝްރޫޢެކެވެ.

މި ތަމްރީނު ޕްރޮގްރާމް ކާމިޔާބުކަމާއެކު ފުރިހަމަކުރި އެންމެހާ ބައިވެރިންނަށް މިނިސްޓްރީގެ ފަރާތުން މަރުޙަބާ ދަންނަވައި، ލިބިގަތް މުހިންމު ހުނަރުތައް ޤައުމުގެ ތަރައްޤީއަށް ބޭނުންކުރުމަށް އިލްތިމާސްކޮށްފައިވެއެވެ.