އަލިފާނުގެ ޙާދިސާއިން ލިބުނު ގެއްލުން ފޫބެއްދުމުގެ މަސައްކަތްދަނީ ކުރަމުން - އާޒިމް

އަލިފާނުގެ ޙާދިސާއިން ލިބުނު ގެއްލުން ފޫބެއްދުމުގެ މަސައްކަތް މާލެ ސިޓީގެ ވެރިންނާއެކު ކުރައްވަމުންގެންދަވާކަމަށް، މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.

އާޒިމް މި ފަދައިން ވިދާޅުވީ، 12 ޑިސެމްބަރ 2024 ގައި، މާލޭގައި ހުރި، ތިން މިނިސްޓްރީއެއް ހިނގަމުން ދިޔަ ޢިމާރާތް އަދާ ހުލިވި އަލިފާނުގެ ޙާދިސާގައި، އެ ގޯތިރޭގައި ހުރި މާލެ ސިޓީގެ ދެ ސެކްޝަން ހިނގަމުންދިޔަ ޢިމާރާތަށް ލިބުނު ގެއްލުމާ ބެހޭ ގޮތުން، ރާއްޖެ ޓީވީއަށް ދެއްވި އިންޓަވިއުއެއްގައި އެވެ.

​​އާޒިމް ވިދާޅުވީ، މި ހާދިސާއަކީ ވަރަށް ދެރަ އަދި ކަންބޮޑުވެ ވަޑައިގަންނަވާ ޙާދިސާއެއް ކަމަށާއި ލިބުނު ގެއްލުންތަކުން އަރައިގުތަމަށް ކުރަންވީ މަސައްކަތްތަކާ ގުޅޭގޮތުން މާލެ ސިޓީ ކައުންސިލަރުންނާއި ވެރިންނާއެކު މަޝްވަރާ ކުރައްވަމުން ގެންދަވާކަން އެ މަނިކުފާނު ހާމަކުރެއްވިއެވެ. އެ މަނިކުފާނު ވިދާޅުވީ، މި ވަގުތު ކުރަމުންދަނީ، ސަލާމަތް ކުރެވުނު މަޢުލޫމާތު ދެނަގަތުމުގެ މަސައްކަތްކަމަށާއި އޭރުން އަނދައިގެން ދިޔަ ރިކޯޑްތައް ދެނެގަނެވޭނެ ކަމަށެވެ. އަދި އަލިފާނުގެ ޙާދިސާއާ ގުޅިގެން، ނެތިގެންދިޔަ ރެކޯޑްތައް ހޯދުމުގައި، އަންމުރައްޔިތުނާއި ޑިޕާޓްމަންޓް އޮފް ނެޝަނަލް ރެޖިސްޓްރޭޝަނާއި ކޯޓްތަކުގެ އެހީތެރިކަމާއި އެއްބާރުލުން ބޭނުންވާނެކަމަށެވެ.

ޢާޒިމް އިތުރަށް ވިދާޅުވީ މާލެ ސިޓީ ކައުންސިލްގެ ލޭންޑް އެންޑް އިންފްރާންސްޓްރެކްޗަރ އާއި ވައިޓަލް ރަޖިސްޓްރޭޝަން ސެކްޝަނުން، މާލޭގެ ރައްޔިތުންނަށް ދެމުންދިޔަ ޚިދުމަތްތައް މެދު ނުކެނޑި ކުރިޔަށް ގެންދިއުމަށް ވަރަށް ބޮޑަށް މަސައްކަތްކުރައްވާ ކަމަށާއި، 15 ޑިސެމްބަރ 2024 ވާ އާދީއްތަ ދުވަހު ވެސް، މި ދެ ސެކްޝަނުން ކުރިން ވެސް ދެމުންދިޔަ ޚިދުމަތްތައް ދެއްވާނެކަމަށެވެ.

ޢާޒިމް ވިދާޅުވީ، މާލެ ސިޓީ ކައުންސިލްގެ މަސައްކަތް މިހާރު ހިނގަމުންދަނީ މާލޭގެ އެކި ހިސާބުގައި ހުރި 7 ޢިމާރާތެއްގައި ކަމަށާއި، މި ކަމުގެ ސަބަބުން ރައްޔިތުންނަށް ޚިދުމަތްތައް ފޯރުކޮށް ދިނުމަށް އިންތިހާއަށް ދަތިވާ ކަމަށެވެ. އެހެން ކަމުން، މި ދަތިތައްކުން އަރައިގަތުމަށް، މާލެ ސިޓީ ކައުންސިލްގެ ޚިދުމަތްތައް އެއް ތަނަކުން ދިނުމަށް ޓަކައި، އެ ކަމަށް ބޭނުންވާ ޢިމާރާތެއް އެޅުމުގެ ޢަމަލީ މަސައްކްތް ފެމުމަށް ތައްޔާރުވެފައިވާކަން އެ މަނިކުފާނު ވިދާޅުވިއެވެ.

މޭޔަރ ވިދާޅުވީ، އެ މަނިކުފާނުގެ މެޔަރުކަމުގެ ދައުރު ނިމޭއިރު، މާލޭ ސިޓީ ކައުންސިލްގެ ޚިދުމަތްތައް ދޭނެ ޢިމާރާތެއް ބިނާކޮށް، މާލެ ސިޓީގެ ހުރިހާ ލިޔެކިޔުންތައް ޑިޖިޓަލް ކުރައްވާނެ ކަމަށެވެ.