އިމާރާތް ތަޅައިދިނުގެ ޚިދުމަތް ވެމްކޯއިން ފަށަނީ

ވޭސްޓް މެނޭޖަމެންޓް ކޯޕަރޭޝަން (ވެމްކޯ)ގެ ހިދުމަތްތައް އިތުރަށް ފުޅާކުރުމަށްޓަކައި އިމާރާތް ތަޅައިދިނުގެ ޚިދުމަތް ފަށަން ތައްޔާރުވަމުންދާ ކަމަށް އެެ ކުންފުނިން ހާމަކޮށްފި އެވެ.

އައު ސަރުކާރާއި އެކު އެންމެ ހިންގުންތެރި އަދި ހިދުމަތްތައް ފުޅާކުރުމުގެ މަސައްކަތް އެންމެ ބޮޑަށް ކުރަމުންދާ ކުންފުންޏަކީ ވެމްކޯއެވެ. އެގޮތުން މިއަހަރުގެ ތެރޭގައި އެކަނިވެސް ވެމްކޯއިން ވަނީ އެކުންފުނީގެ ވޭސްޓް ކަލެކްޝަންގެ ހިދުމަތް އިތުރު ރަށްތަކަކަށް ފުޅާކޮށް ރިސޯޓު ވޭސްޓް ކަލެކްޝަން އާއި ފޮޅާ ސާފު ކުރުމަށް "ހޮބާ" ގެ ނަމުގައި ހިދުމަތްތަކެއް ތައާރަފްކޮށްފައެވެ.

މިހާރު އެކުންފުނިން ތައްޔާރުވަމުންދަނީ އަންނަ އަހަރުގެ ކުރީ ކޮޅު ޑިމޮލިޝިންގ ހިދުމަތް ނުވަތަ އިމާރާތްތައް ތަޅައިދިނުމުގެ ދިނުމަށް ފެށުމަށް ތައްުޔާރުވަމުންނެވެ.

މި ހިދުމަތާއި ގުޅޭގޮތުން މައުލޫމާތު ދެމުން އެކުންފުނީގެ އިސް އޮފިޝަލަކު ވިދާޅުވީ ކުންފުނީގެ ހިދުމަތްތައް އިތުރަށް ފުޅާކުރުމުގެ ގޮތުން ޑިމޮލިޝިންއަށް ޚާއްސަ ޑިޕާޓްމެންޓެއް ހަދައި ހިދުމަތް ދިނުމަށް ވާންޖެހޭ ފަހުގެ ތައްރާރީތައް މިހާރު ވަމުންދާ ކަމަށެވެ. އެގޮތުން ޑިމޮލިޝިން ޑިޕާޓްމެންޓަށް ކުންފުނީގައި ތިބި ތަޖުރިބާ ހުރި، ކަމަށް އެކަށީގެންވާ މުވައްޒަފުން ބަދަލުކުރުމަށް ހަމަޖެހިފައިވާ ކަމަށް އޮފިޝަލް ވިދާޅުވިއެވެ.

އޮފިޝަލް އިތުރަށް ވިދާޅުވީ މިހާރު ކުރަމުންދަނީ އެމަަސައްކަތް ފެށުމަށް ވާންޖެހޭ އިދާރީ ބައެއް މަސައްކަތްތައް ކަމަށާއި އެކަމަށް އަގު ކަނޑައެޅުންވެސް އެމަސައްކަތްތަކުގެ ތެރޭގައި ހިމެނޭ ކަމަށެވެ. އަދި އިދާރީ މަސައްކަތްތައް ނިމުނުހާ އަވަހަކަށް އަގުތައް އާންމުކުރާނެކަންވެސް ވަނީ ހާމަކޮށްފައެވެ.

އިމާރާތްތައް ތަޅާލުމުން، ގައުކުނޑިއާއި ކުނިބުނި އުކާލުމުގެ ޚިދުމަތް މިހާރުވެސް އެކުންފުނިން ދެމުންދާއިރު އަލަށް ފަށާ ހިދުމަތާއި އެކު އެދާއިރާގެ ހުރިހާ ހިދުމަތެއް ކުންުފުނިން ދެވި ކުންފުނީގެ މާލީ ހާލަތްވެސް އިތުރަށް ރަނގަޅު ވެގެންދާނެ ކަމަށް އޮފިޝަލް ވިދާޅުވިއެވެ.