ހިންމަފުށީގައި ވެމްކޯގެ ހިދުމަތް ރަސްމީކޮށް ފަށައިފި

ކ ހިންމަފުށީގައި ވެމްކޯގެ ހިދުމަތް ރަސްމީކޮށް ފަށައިފި އެވެ.

މި ހިދުމަތް އެރަށުގައި ރަސްމީކޮށް ފައްޓަވައިދެއްވީ ރާއްޖޭގެ ރައީސުލްޖުމްހުރިއްޔާ ޑރ މުހައްމަދު މުއިއްޒު އެވެ.

ވެމްކޯ އިން ބުނީ މި ހިންމަފުށީގައި އެ ކުންފުނީގެ ހިދުމަތްތައް ފެށިގެން އަންނާނީ ގޭބިސީތަކުން އުފައްދާ ދުވަހު ކުނި ނަގައިގެން ކަމަށެވެ. ވެމްކޯގެ ވެބްސައިޓް މެދުވެރިކޮށް އެރަށުގެ ގޭބިސީތަކުން ކުނި ނެގުމުގެ ހިދުމަތަށް ރަޖިސްޓްރީ ކުރެވޭނެ އެވެ. ކުރިއަށް އޮތް ދުވަސްތަކުގައި ބަރުކުނީގެ ބާވަތްތައް އުކާލުމަށް ދޭ ޚިދުމަތް ކަމަށްވާ ކެޕްސް އަދި ކެޕްސް ލައިޓްގެ ޚިދުމަތްވެސް އެރަށުގައި ފެށިގެންދާނެ ކަމަށް ވެމްކޯއިން ބުނެއެވެ.

ވެމްކޯގެ ހިދުމަތް އެރަށުގައި ފެުށުމަށް ބޭނުންވާ ވެހިކަލްތަކާއި އެހެނިގެން މުހިންމު ވަސީލަތްތައް ފާއިތުވި ދުވަސްތަކުގައި އެރަށަށް ވަނީ ގެންގޮސްފައި އެވެ. އަދި މިއަދު ހިދުމަތް ރަސްމީކޮށް ފެށިނަމަވެސް އަމަލީ ގޮތުން މަސައްކަތްތައް ފެށިގެންދާނީ ކުރިޔަށް އޮތް 10 ވަރަކަށް ދުވަހުގެ ތެރޭގައި ކަމަށް ވެމްކޯއިން ބުނެއެވެ.

މިއީ ރައީސް ޑރ މުހައްމަދު މުއިއްޒުގެ ޒައާމަތުގައި ވެމްކޯގެ ހިދުމަތް ފެށިގެން ދިޔަ 6 ވަނަ ރަށެވެ. އެގޮތުން ވެމްކޯއިން މިއަހަރުގެ ތެރޭގައި ވަނީ ތިނަދޫ ސިޓީ , ކުޅުއްދުއްފުށީ ސިޓީ , ކ މާފުށި , ލ ގަން , ލ ފޮނަދޫގައި ވެމްކޯގެ ހިދުމަތް ފަށާފައި އެވެ.