އަރްޕިތާ ޚާން ރެސްޓޯރެންޓެއް ހުޅުވާފި

ބޮލީވުޑްގެ ސުޕަސްޓާ ސަލްމާން ޚާންގެ އެންމެ ހަގު އަދި ހަމައެކަނި އަންހެން ކޮއްކޮ އަރްޕިތާ ޚާން މުމްބާއީގައި އޭނާގެ އަމިއްލަ ރެސްޓޯރެންޓެއް ހުޅުވާފިއެވެ.

އަރްޕިތާ ބުނިގޮތުގައި އޭނާގެ އާއިލާއަކީ އަބަދުވެސް އުފާވެރި ވަގުތުތަކުގައި ކާބޯތަކެތީގެ ޒަރިއްޔާއިން އުފާ ފާޅުކުރާ ބައެއްކަމަށާއި އަދި ރެސްޓޯރެންޓް ހުޅުވުމަށް ހިތްވަރު ލިބުނީ އެކަމުގެ ސަބަބުން ކަމަށެވެ.

އަމިއްލަ ރެސްޓޯރެންޓެއް ކަމަށްވާ "މާރސީ" ހުޅުވުމާ ބެހޭ ގޮތުން އަރްޕިތާ އިންޑިޔާގެ ނޫހަކަށް ދީފައިވާ އިންޓަވިއުއެއްގައި ބުނެފައިވާ ގޮތުން އޭނާގެ ގެއަކީ އަބަދުވެސް މީހުންނަށް މެހެމާންދާރީއާއި އެކު މީރު ކާބޯތަކެތި ދޭ ބައެކެވެ.

އޭނާ އިތުރަށް ބުނި ގޮތުގައި ރެސްޓޯރެންޓްގެ ނަން މާރސީ އަކީ އޭނާއަށް ހާއްސަ މާނައެއް އޮންނަ ނަމެއްކަމަށެވެ. އެއީ ފަރަންސޭސި ބަހުން "ޝުކުރިއްޔާ" އެވެ. އަދި ކަންކަމުގައި ޝުކުރުވެރިވުމަކީ އަބަދުވެސް އޭނާއަށް ވަރަށް މުހިންމުކަމެއްކަމަށެވެ. އޭނާ ބުނިގޮތުގައި ބައެއް ފަހަރު ޝުކުރުއަދާކުރަން ހަނދާން ނައްތާލެވޭއިރު މާރސީގެ ޒަރީއާއިން އޭނާ ބޭނުންވަނީ އެކަމުގެ މުހިންމުކަން ހަނދާންކޮށްދޭންށެވެ.

ރެސްޓޯރެންޓްގެ މެނޫއާއި ބެހޭގޮތުން ވާހަކަދައްކަމުން އޭނާ ބުނީ "ޕޮޓޭޓޯ މިލޭ-ފިއުއިލް ވިތު ޕެރިގޯޑް ޓްރަފްލް" އަކީ ކޮންމެހެން އަޖުމަ ބަލާލަންޖެހޭއެއްޗެއް ކަމަށެވެ. އަދި އޭނާގެ އަމިއްލަ ފޭވަރިޓްސްގެ ތެރޭގައި ރިގަޓޯނީ އަރަބިޓާ ޕާސްތާ އާއި މީރު ފޯ ޗީޒް ޕިއްޒާ އަދި ކޮކޯ ލޮބްސްޓާ ހިމެނޭކަމަށެވެ.

އެކްޓަރު އާޔޫޝް ޝަރުމާއާ ކައިވެނިކޮށްގެން އުޅޭ އަރްޕިތާ ބުނީ އޭނާގެ މި ރެސްޓޯރެންޓާއި އެކު ތަފާތު ކެއުންތަކާއި ކަލިނަރީ ޓެކްނިކްތައް ދަސްވެފައިވާ ކަމަށާއި އަދި އެތަކެއްޗަށް ވަރަށް ލޯބިޖެހިފައިވާކަމަށެވެ.