ގްލޯބަލް ޓްރޮޕިކަލް އެގްރިކަލްޗަރ އިނޮވޭޝަން ކޮންފަރެންސްގައި ރާއްޖެއިން ބައިވެރިވެއްޖެ

ޗައިނާގެ ހައިނާން ޕްރޮވިންސްގެ ސަންޔާގައި ބޭއްވި ގްލޯބަލް ޓްރޮޕިކަލް އެގްރިކަލްޗަރ އިނޮވޭޝަން ކޮންފަރެންސްގައި މިނިސްޓްރީ އޮފް އެގްރިކަލްޗަރ، އެންޑް އެނިމަލް ވެލްފެއަރގެ ޓީމެއް ބައިވެރިވެއްޖެއެވެ.

ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށްދިޔަ މި ކޮންފަރެންސްގައި 29 ޤައުމަކާއި 13 ބައިނަލްއަޤްވާމީ ޖަމްޢިއްޔާއެއްގެ 300އާ ގާތްކުރާ އަދަދަކަށް މަންދޫބުން ބައިވެރިވިއެވެ.

މިނިސްޓްރީގެ ޑެޕިއުޓީ މިނިސްޓަރ އިސްމާޢީލް މުޙައްމަދު ކޮންފަރެންސްގެ އިފްތިތާޙީ ޖަލްސާގައި ވާހަކަ ދެއްކެވިއެވެ. އެމަނިކުފާނު ވިދާޅުވީ މި ބައިނަލްއަޤްވާމީ މަސައްކަތުގައި ބައިވެރިވުމުން މޫސުމީގޮތުން ހޫނު ސަރަހައްދުގެ ޤައުމުތަކުގެ އެންމެ ރަނގަޅު އާދަތަކުން ދަސްކޮށް، އެކަންކަން ދިވެހިރާއްޖޭގެ ހާލަތާ ގުޅޭގޮތަށް ބަދަލުކުރުމުގެ ފުރުޞަތު ލިބިގެންދާނެ ކަމަށެވެ.

މިނިސްޓްރީގެ ޑިރެކްޓަރ އަލްފާޟިލް ޢަލީ ޢާމިރު، ކޮންފަރެންސްގައި ދިވެހިރާއްޖޭގެ ދަނޑުވެރިކަމުގެ މިހާރުގެ ހާލަތާއި ހިނގަމުންދާ ޕްރޮގްރާމްތަކާ ބެހޭ ގޮތުން ޕްރެޒެންޓޭޝަނެއް ހުށަހެޅުއްވިއެވެ. އަދި މިނިސްޓްރީގެ ވަފުދުން ޗައިނީޒް އެކަޑަމީ އޮފް ޓްރޮޕިކަލް އެގްރިކަލްޗަރ ސައިންސްގެ (ސީއޭޓީއޭއެސް) އިސްވެރިންނާ ބައްދަ

ލުކުރައްވައި، ދެ މުއައްސަސާގެ ދެމެދުގައި އިތުރަށް ގުޅުން ބަދަހިކުރުމާ ބެހޭ ގޮތުން މަޝްވަރާކުރެއްވިއެވެ.

އެގޮތުން، މި ކޮންފަރެންސްގެ މައިގަނޑު މަޤްޞަދަކީ މޫސުމީގޮތުން ހޫނު ސަރަހައްދުގެ ދަނޑުވެރިކަމުގައި ބޭނުންކުރާ އުފެއްދުންތެރިކަން ކުރިއެރުވުމަށް ޓެކްނޮލޮޖީ ބޭނުންކޮށްގެން ކުރެވޭ މަސައްކަތްތައް ހަރުދަނާކުރުމެވެ. އަދި މި ދާއިރާގައި ޓެކްނޮލޮޖީ ބަދަލުކުރުމާއި ސިނާޢަތްތައް އެއްކޮށްލުމުގެ ތެރެއިން ބައިނަލްއަޤްވާމީ ފެންވަރުގައި ބަނޑުހައިހޫނުކަމާއި ފަޤީރުކަން ނައްތާލުމަށް ކުރެވޭ މަސައްކަތްތައް ވަރުގަދަކުރުމެވެ.

މިނިސްޓްރީގެ ވަފުދުން ކޮންފަރެންސްގެ އިތުރުން ޗައިނާގެ ހައިނާން ޕްރޮވިންސްގެ ވަންނިންގގައި ހުންނަ ސްޕައިސް އެންޑް ބެވަރެޖް ރިސަރޗް އިންސްޓިޓިއުޓް (ސީއޭޓީއޭއެސް) އަށް ޒިޔާރަތްކޮށް، އެތަނުގެ ޑިރެކްޓަރ ޕްރޮފެސަރ ޑރ. ޓޭންގ ބިންގއާ ބައްދަލުކުރެއްވިއެވެ. މި ޒިޔާރަތުގައި އެކުވެރިކަން ބަދަހިކުރުމަށާއި، މަޢުލޫމާތު ބަދަލުކުރުމަށާއި، މޫސުމީ ގޮތުން ހޫނު ސަރަހައްދުގެ ދަނޑުވެރިކަމަށް ދިމާވެފައިވާ ގޮންޖެހުންތަކަށް އައު އީޖާދީ ހައްލުތައް ހޯދުމާ ބެހޭ ގޮތުން މަޝްވަރާކުރެވުނެވެ.

މި ކޮންފަރެންސްގައި ދިވެހިރާއްޖޭގެ ބައިވެރިވުމަކީ މޫސުމީ ގޮތުން ހޫނު ސަރަހައްދުގެ ދަނޑުވެރިކަމުގެ ދާއިރާގައި ބައިނަލްއަޤްވާމީ ފެންވަރުގައި ކުރެވޭ މަސައްކަތްތަކުގައި ރާއްޖޭގެ ހިއްސާ އިތުރުކުރުމަށް އެޅުނު މުހިންމު ފިޔަވަޅެކެވެ. އަދި މިފަދަ ބައްދަލުވުންތަކުގައި ބައިވެރިވުމުން ދިވެހިރާއްޖޭގެ ދަނޑުވެރިކަމުގެ ދާއިރާ ތަރައްޤީކުރުމަށް ބޭނުންވާ އައު ޓެކްނޮލޮޖީތަކާއި އީޖާދުތަކާ ބެހޭ މަޢުލޫމާތު ލިބި، އެހެން ޤައުމުތަކާ ގުޅުން ބަދަހިކުރުމުގެ ފުރުޞަތު ލިބިގެންދާނެއެވެ.

މިނިސްޓްރީގެ ވަފުދުން ޗައިނާގެ ހައިނާންގައި ހުރި މުހިންމު އެކި މުއައްސަސާތަކަށް ކުރި ޒިޔާރަތްތަކުގެ ތެރޭގައި ސެންޓަރ އޮފް އެންވަޔަރަންމަންޓް އެންޑް ޕްލާންޓް ޕްރޮޓެކްޝަން އިންސްޓިޓިއުޓް (ކާޓަސް) އަދި ޓްރޮޕިކަލް ނެޗުރަލް އެނެމީ ރިސޯސަސް ބްރީޑިންގ ބޭސްއަށް ކުރި ޒިޔާރަތްތައް ހިމެނެއެވެ. މި ޒިޔާރަތްތަކުން ފާހަގަކޮށްދެނީ ތިމާވެށި ސައިންސް، ގަސްގަހާގެއްސާއި ފަތްޕިލާވެލި ރައްކާތެރިކުރުން، އަދި ދެމެހެއްޓެނިވި ދަނޑުވެރިކަމުގެ ދާއިރާގައި އެންމެ ފަހުގެ ދިރާސާތަކާއި އަމަލީ މަސައްކަތްތައް ބަލައި ދެނެގަތުމަށް ވަފުދުން ކުރަމުންދާ މަސައްކަތެވެ.

ކޮންފަރެންސްގައި ބައިވެރިވި މިނިސްޓްރީގެ އިސްވެރިން ފާހަގަކުރެއްވި ގޮތުގައި މި ބައްދަލުވުމުގައި ބައިވެރިވުމުގެ ސަބަބުން ދިވެހިރާއްޖޭގެ ދަނޑުވެރިކަމުގެ ދާއިރާ ކުރިއެރުވުމަށް އިތުރު ފުރުޞަތުތަކެއް ހުޅުވިގެންދާނެއެވެ. އަދި ހޫނު ސަރަހައްދުގެ ދަނޑުވެރިކަމުގެ ދާއިރާގައި ކުރިއަރާފައިވާ ޤައުމުތަކުގެ ތަޖުރިބާއިން ފައިދާ ހޯދައި، އެ ތަޖުރިބާތައް ރާއްޖޭގެ ހާލަތާ ގުޅޭގޮތަށް ތަރައްގީ ކުރުމުގެ ފުރުޞަތު ލިބިގެންދާނެކަމަށެވެ.