ޔަންމާގެ އާރްއެސްޑަބްލިއު ނިޒާމް އެމްޓީސީސީން ރާއްޖެއަށް ތަޢާރަފުކޮށްފި

އޮޑިފަހަރުގައި މަސް ފިނިކޮށް ތާޒާކޮށް ބަހައްޓައިދޭ ނިޒާމް ނުވަތަ, އާރްއެސްޑަބްލއިު ރެފްރިޖެރެޓެޑް ސީވޯޓާރ ނުވަތަ ލޮނުފެން ފިނިކުރާ ނިޒާމް އެމްޓީސީސީން ރާއްޖެއަށް އަލަށް ތަޢާރަފު ކޮށްފިއެވެ.

މި ނިޒާމް ރާއްޖެއަށް ތަޢާރަފު ކުރެވުނީ ޔަންމާއިން ރާއްޖޭގައި ހަރަކާތްތެރިވާތާ 50 އަހަރު ފާހަގަކުރުމަށްޓަކައި ޑިސެމްބަރު 8 ވަނަ ދުވަހު ބޭއްވުނު ޙާއްޞަ ހަފްލާއެއްގައެެވެ.

މި ނިޒާމް ރާއްޖެއަށް ތަޢާރަފުކުރެވުނީ ދިވެހި ސަރުކާރުގެ އިސްނެންގެވުމުގެ މަތިން, އެމްޓީސީސީއާއި ޔަންމާގެ ބައިވެރިވުމާއެކުއެވެ. މިކަމަށްޓަކައި މަސްވެރިންނަށް ބޭނުންވާ ފައިސާ ފޯރުކޮށްދިނުމުގެ އިންތިޒާމު ހަމަޖެއްސުމަށް ސަރުކާރުން ނިންމާފައިވަނީ މަސްވެރިކަމާބެހޭ ވުޒާރާގެ ގްރާންޓް ޕްރޮގްރާމްގެ ދަށުންނެވެ.

ޔަންމާއިން އުފެއްދާފައިވާ އާރްއެސްޑަބްލިއު ނިޒާމަކީ އިންޖީނަކާއި ޖަނަރޭޓަރއެއްގެ އިތުރުން ލޮނުފެން ފިނުކުރާ އައު އީޖާދީ ޓެކްނޮލެޖީގެ އެހީގައި މަސްފިނިކޮށް ބަހައްޓަދޭ ތަފާތު ނިޒާމެކެވެ. އަދި މި ނިޒާމް ފަރުމާކުރެވިފައިވަނީ ދެމެހެއްޓެނިވި އިތުބާރުހުރި ފެންވަރު ރަނގަޅު ހައްލެއް މަސްވެރިންނަށް ހޯދައިދިނުމުގެ ގޮތުންނެވެ. މިގޮތުން މި ނިޒާމްގެ ސަބަބުން މަސްވެރިން ބާނާ މަސް ތާޒާކޮށް އޭގެ ފެންވަރު ދަށް ނުވާނެހެން ބެހެއްޓުމަށް މަގުފަހިކޮށްދޭނެއެވެ. އަދި މިކަމުގެ ސަބަބުން މަސްވެރިންނަށް މަހުގެ ހަމަ އަގު ލިބި އާމްދަނީ އިތުރުވެގެންދާނެއެވެ.

އާރްޑަބްލިއުއެސް ސިސްޓަމްއިން މަސް ފިނިކޮށް ބެހެއްޓުމަށްޓަކައި ބޭނުންކުރާ ޓެކްނޮލޮޖީއިން ވަރަށް ހައި ޕްރެޝަރގައި ކާބަންޑައި އޮކްސައިޑް ދޫކޮށްދިނުމުގެ ސަބަބުން މި ނިޒާމުން ވަރަށް އަވަހަށް ލޮނުފެން ފިނިކޮށްދީ ފިނި ހިފަހައްޓައިދެއެވެ. އާރްއެސްޑަބްލިއު ނިޒާމަކީ ކުޑަ ހަކަތައެއް ބޭނުންކޮށްގެން މަސައްކަތްކުރެވޭ ގޮތަށް ފަރުމާކޮށްފައިވާ ނިޒާމެއްކަމުން, ހިންގުމުގެ ޚަރަދު ވަރަށް ބޮޑަށް ކުޑަކޮށްދެއެވެ. އަދި މި ނިޒާމަކީ ޖާގަ ކުޑަ ދޯނިތަކުގައިވެސް ބ ނުންކުރުމަށް އެކަށީގެންވާ ގޮތަށް ފަރުމާކުރެވިފައިވާ ނިޒާމެކެވެ.

މީގެ އިތުރުން, އާރްޑަބްލިއުއެސް ނިޒާމު ކޮންޓްރޯލް ކުރުމަށްޓަކައި ހަރުކުރެވިފައިވާ ވީއެސްޑީ ކޮންޓްރޯލް ސިސްޓަމްގެ އިންޓަރފޭސް ފަރުމާކުރެވިފައިވަނީ ކަސްޓަމަރުންނަށް މި ނިޒާމު ފަސޭހަކަމާއެކު ބޭނުންކުރެވޭނެހެންނެވެ.

އާރްޑަބްލިއުއެސް ނިޒާމުގައި ފިނިކުރުމަށް ބޭނުންކުރާ އާރްސެވަންފޯފޯ ރެފްރިޖަރަންޓްއަކީ ސީއޯޓޫ ރެފްރިޖެރަންޓް ގޮތުގައި ބޭނުންކުރާ ރެފްރިޖަރަންޓްގެ ތެރެއިން ތިމާވެށްޓާ އެންމެ ރަށްޓެހި އެއް ރެފްރި ޖެރަންޓެވެ. އެހެންކަމުން, މި ނިޒާމުގެ ސަބަބުން މަސް ފިނިކޮށް ބެހެއްޓުމުގެ ޤާބިލްކަމާއި ފެންވަރު އިތުރުވެގެންދާއިރު, މިފަދަ ނިޒާމެއް ބޭނުންކުރުމުގެ ސަބަބުން އަޅުގަނޑުމެންގެ ނާޒުކު ތިމާވެއްޓަށް ކުރާ އަސަރު ކުޑަކުރެވިގެން ދިޔުމަކީވެސް ވަރަށް ބޮޑު ކާމިޔާބީއެކެވެ.

ޔަންމާ އާރްޑަބްލިއުއެސް ނިޒާމަކީ ލުއިފަސޭހަކަމާއެކު މަސްވެރިން ބާނާ މަސް ތާޒާކޮށް ރަނގަޅު ފެންވަރުގައި ބަހައްޓައިދިނުމަށް އެހީތެރިވެދޭނެ އިތުބާރު ހިފޭ ބައިވެރިއެކެވެ. އާރްއެސްޑަބްލިއު ނިޒާމާއި އެކަމަށް ބޭނުންކުރާ އިންޖީނު އަދި ޖަނަރޭޓަރަކީ ޔަންމާ ޓޯޓަލް ސޮލިއުޝަންސްގެ އުފެއްދުމެކެވެ. އަދ،ި މިއީ މަސްވެރިކަމުގެ ސިނާޢަތަށް ހާއްޞަކޮށްގެން ފަރުމާކުރެވިފައިވާ އީޖާދެކެވެ. ޔަންމާ އާރްޑަބްލިއުއެސް ނިޒާމް މަސައްކަތްކުރާގޮތާއި ގުޅޭގޮތުން ހޭލުންތެރިކަން އިތުރު ކުރުމަށްޓަކައ،ި މަސްވެރިންގެ ދުވަހާ ގުޅުވައިގެން މި މަހުގެ 10 ވަނަ ދުވަހު އެމްޓީސީސީން ބޭއްވި "އޮޑިވެރިޔާ ފޯރަމް" ގައި ކަމާގުޅޭ ޙާއްސަ ޕްރެޒެންޓޭޝަންއެއް ވަނީ ހުށަހަޅައިދެވިފައެވެ. އަދި މި މަޢުލޫމާތު އެ ކުންފުނީގެ މީސްމީޑިއާ މަންސަތަކުގައިވެސް ވަނީ ހިއްޞާކޮށްފައެވެ.