ޔަހޫދީން ދިމިޝްގަށް ވައިގެ ހަމަލާއެއްދީފި

މެދުއިރުމަތީގެ ކޮންޓްރޯލް ނެގުމަށް މަސައްކަތްކުރަމުން އަންނަ އަނިޔާވެރި ޔަހޫދީ އިސްރާއީލުން ދާހިލީ ހަމަނުޖެހުމެއްގެ ތެރޭގައި މިވަގުތު އޮތް ސީރިއާގެ ވެރިރަށަށް ވައިގެ ހަމަލާތަކެއް ދީފި އެވެ.

ރިޕޯޓުތައް ބުނާގޮތުގައި ދިމިޝްގަށް ވައިގެ ހަމަލާތަކެއް ދިނުމުގެ ސަބަބުން އިމާރާތެއްގައި ވަރަށް ބޮޑަށް ވަނީ އަލިފާން ރޯވެފައި އެވެ. އަދި އެމަންޒަރު ފެންނަ ފޮޓޯޓަކެއްވެސް މިހާރު ދަނީ ދައުރުވަމުންނެވެ.

ބެލެވޭ ގޮތުގައި އިޒްރޭލުން މި ހަމަލާދިނީ ސީރިއާގެ މައި އެއާޕޯޓު ކައިރީގައި ހުރި މިއުނިޝަން ޑިޕޯއެއް ކަމަށް ބެލެވޭ ތަނަކަށެވެ.

އިސްރާއީލުގެ މީޑިއާތަކުން މީގެ ކުރިން ރިޕޯޓްކޮށްފައިވާ ގޮތުގައި އިސްރާއީލުގެ ވައިގެ ސިފައިން ވަނީ ސީރިއާގެ ދެކުނުގެ ސަރަހައްދުތަކާއި ދިމިޝްގުގައި ހުރި ހަތިޔާރު ޑިޕޯތަކަށް ބޮން އަޅައި، އިދިކޮޅު ޖަމާއަތްތަކުން އެ ތަކެތި އަތުލުން ހުއްޓުވާފަ އެވެ.

ޔަހޫދީން ސީރިއާއަށް ހަމަލާދިން އިރު މިއަދު ސީރިއާގެ ހަނގުރާމަވެރިން ވަނީ އެގައުމުގައި 24 އަހަރުގެ ދިގު ވެރިކަމެއް ކުރި ރައީސް ބަޝްހާރު އަލް އައްސަދު ވެރިކަމުން ބާލާފައި އެވެ.

ސީރިއާއަކީ އިޒްރޭލުން ގެންގުޅޭ "ގްރޭޓާ އިސްރާއީލް " ގެ ނަމުގައި ހަދާފައިވާ މެދުއިރުމަތީގެ ގައުމުތައް ހިފުމުގެ ޕްލޭނުގައި ހިމެނޭ މުހިންމު ގައުމެކެވެ.