ދެކުނު ކޮރެއާގައި އެމެޖެންސީ މާޝަލް ލޯ އިއުލާނުކޮށްފި

ދެކުނު ކޮރެއާގައި އެމެޖެންސީ މާޝަލް ލޯ އިއުލާނުކޮށްފި އެވެ.

ރިފޯޓުތައް ބުނާގޮތުގައި ދެކުނު ކޮރެއާގެ ރައީސް އެގައުމުގައި މާޝަލް ލޯ އިއުލާނުކުރެެއްވީ އުތުރު ކޮރެއާއި ގުޅިގެން އެގަމުމުގެ ބައެއް ޕާޓީތކުން ދައުލަތާ ދެކޮޅު ހަރަކާތްތައް ހިންގަމުންދާކަމުގެ މައުލޫމާތު ލިބުމާއި ގުޅިގެން ކަމަށެވެ.

ރައީސް ޔޫން ސުކް ޔޯލް މިކަން އިއުލާނުކުރައްވައި ދެއްވި ތަގުރީރެއްގައި ވިދާޅުވީ މާޝަލް ލޯގެ ތެރެއިން މިނިވަން ޑިމޮކްރެޓިކް ގައުމެއް އަލުން އާރާސްތު ކުރައްވާނެ ކަމަށެވެ.

"އުތުރު ކޮރެއާއަށް ވާގިވެރިޔާ ދެކުނު ކޮރެއާގައި ތިބި ކޮމިއުނިސްޓް ބާރުތަކުން ކުރިމަތިކުރަމުންދާ ނުރައްކަލުން ސައުތު ކޮރެއާ ސަލާމަތްކުރުމަށާއި ދައުލަތާ ދެކޮޅު ފަރާތްތައް ނައްތާލުމަށް... ކުއްލި މާޝަލް ލޯ އިއުލާނު ކުރަން،" ޓީވީ މެދުވެރިކޮށް ގައުމާ މުހާތަބު ކުރައްވާ ދެއްވި ލައިވް ތަގުރީރުގައި ޔޫން ވިދާޅުވި އެވެ.

މި ނިންމުމާއި އެކު މާޝަލް ލޯ ކޮމާންޑަރު ޖެނެރަލް ޕާކް އެން-ސޯ ވަނީ އެ އިއުލާނުގެ ދަށުން ގިނަ ފިޔަވަޅުތަކެއް އިއުލާނު ކުރައްވާފައި އެވެ. އެގޮތުން އެގައުމުގައި ގައުމީ މަޖިލީހާއި ލޯކަލް ކައުންސިލްތަކާއި ސިޔާސީ ޕާޓީތަކާއި ސިޔާސީ އެސޯސިއޭޝަންތަކުގެ އިތުރުން އެސެމްބްލީ [އަދި] މުޒާހަރާތައް ހިމެނޭ ގޮތަށް ސިޔާސީ ހުރިހާ ހަރަކާތެއް ހިންގުން މަމިހާރު ވަނީ މަނާކޮށްފައެވެ.

އެ އަމުރުގައި ވަނީ މަސައްކަތްތެރިންގެ ހަޅުތާލުތަކާއި އިޖުތިމާއީ ހަމަނުޖެހުން އުފެދޭ ގޮތަށް އެއްވުންތައް ބޭއްވުން މަނާކޮށްފަ އެވެ. އަދި މާޝަލް ލޯ ކޮމާންޑްގެ ބެލުމުގެ ދަށަށް ހުރިހާ މީޑިއާތަކެއްވެސް ވަނީ މިހާރު ގެނެސްފައި އެވެ.

"ލިބަރަލް ޑިމޮކްރެޓިކް ނިޒާމަށް އިންކާރުކޮށް ނުވަތަ ވައްޓާލަން މަސައްކަތް ކުރާ ފަދަ އެއްވެސް އަމަލެއް ހިންގުމާއި ދޮގު ހަބަރު ފެތުރުމާއި އާންމުންގެ ހިޔާލު އޮޅުވާލުން ނުވަތަ ދޮގު ޕްރޮޕެގެންޑާ ކުރުން ފަދަ އަމަލުތައް ހިންގާ ފަރާތްތަކާއި މެދުވެސް ފިޔަވަޅު އަޅާނަން،" އަމުރުގައިވެ އެވެ.

އަދި މިހާރު އެގައުމުގައި ހަޅުތާލު ކުރަމުންދާ ޑޮކްޓަރުން ހިމެނޭ ގޮތަށް ސިއްހީ ހިދުމަތްތެރިން 48 ގަޑިއިރުގެ ތެރޭގައި މަސައްކަތަށް ނިކުންނަން އަމުރުކޮށް ނުނިކުމެފި ނަމަ އަދަބު ދޭނެ ކަންވެސް ވަނީ އިއުލާނުކޮށްފައި އެވެ.

"މި އިއުލާނާ ހިލާފުވާ ފަރާތްތައް ހައްޔަރުކުރުމާއި ބަންދުކުރުމާއި، އަމުރަކާ ނުލައި ބަލައި ފާސްކޮށް ހިފެހެއްޓުމުގެ ފުރުސަތު އޮންނާނެ،" ކޮމާންޑަރު އެންގެވި އެންގެވުމުގައި ވިދާޅުވި އެވެ.