ތިނަދޫގެ ގިނަ މުވައްސަސާތަކާއި ކުންފުނިތަކާއި ގުޅިގެން ތިނަދޫ ސިޓީ ޑަބްލިއުޑީސީގެ ގެ އާއިލީ ފެސްޓިވަލް ބާއްވައިފި

ތިނަދޫ ސިޓީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން އެރަށުގައި ޚާއްސަ އާއިލީ ފެސްޓިވަލެއް ކުރިޔަށް ގެންގޮސްފި އެވެ.

ނޮވެމްބަރު މަހުގެ 29 އަދި 30 ވަނަ ދުވަހު ކުރިޔަށް ގެންދިޔަ މި އާއިލީ ހަވީރު ބާއްވާފައިވަނީ ތިނަދޫ ސިޓީ ސްޓޭޓިއަމްގައި އެވެ.

ތިނަދޫ ސިޓީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން މައުލޫމާތު ދޭގޮތުގައި މި އާއިލީ ހަވީރަކީ ކުޑަކުދިންނަށް ކުރާ އަނިޔާ ހުއްޓުވުމާއި އަންހެނުންނަށް ކުރާ އަނިޔާ ހުއްޓުވުމަށް ބައިނަލަގްވާމީ ފެންވަރުގައި ފާހަގކުރާ ދެ ދުވަސް ފާހަގަ ކުރުމުގެ ގޮތުން ރަށުގެ ކުދިބޮޑު އެންމެހާ ބޭފުޅުން އެއްތަނަކުން ބައްދަލުވެ ގުޅުން ބަދަހިކުރުމުގެ މަގްސަދުގައި ކުރިޔަށް ގެންދިޔަ ޕްރޮގްރާމެކެވެ.

އެގޮތުން މި އާއިލީ ތިނަދޫގައި ގިނަ އަދަދެއްގެ މުވައްސަސާތަކާއި ތިނަދޫގައި ހަރަކާތްތެރިވާ ސަރުކާރު ހިއްސާ ވާ އަދި އަމިއްލަ ކުންފުނިތަކާއި ޖަމިއްޔާތަކުން ވަނީ އަމަލީ ގޮތުން ބައިވެރިވެފައި އެވެ. އޭގެ ތެރޭގައި ހިމެނެނީ ތިނަދޫ ސިޓީ ބިޒްނަސް ސެންޓަރ , ތިނަދޫ ސިޓީ ޕޮލިސް , އެމް.އެން.ޑީ.އެފް , ތިނަދޫ ސިޓީ ސްޓޭޑިއަމް , ނޯވާ ޓެކް , ތިނަދޫ ސިޓީ ކައުނސިލް , ތެނަދޫ ރޯވަރުންނެ , ގދ. ފެމިލީ އެންޑް ޗިލްޑްރެން ސާރވިސް ސެންޓަރ , ވެމްކޯ , އާރު.ޑީސީ , ދިރާގު , ބީ.އެމް.އެލް , އެމް.އައި.ބީ , ތިނަދޫ ސްކޫލް , އަބޫބަކުރު ސްކޫލް , ގދ. އަތޮޅު ތަޢުލީމީ މަރުކަޒު , އިސްލާމިކް ޔުނިވަރސިޓީ , އުރީދޫ , ވީޓް ޖަމިއްޔާ އެމް.އެން.ޔޫ އަދި ޑރ. އަބްދުލް ސަމަދު މެމޯރިއަލް ހޮސްޕިޓަލެވެ.

މި އާއިލީ ހަވީރުގައި ޚާއްސަ ލަކީޑްރޯއެއް ވަނީ ކުރިޔަށް ގެންގޮސްފައި އެވެ. އެގޮތުން ލަކީ ޑްރޯއިން ހޮވުނު ނަސީބުވެރިންނަށް ތިނަދޫގެ 3 ރެސްޓުއަރެންޓްއަކުން ޚާއްސަ ވައުޗަރުގެ އިތުރުން 50 ގިފްޓް ޕެކް ވަނީ ދީފައި އެވެ. އަދި ފެސްޓިވަލުގައި ކުރިޔަށް ގެންދިޔަ ޚާއްސަ އޮބްސްޓެކަލް ރޭހުން ވަނަތަކަށް ދިޔަ ފަރާތްތަކަށްވެސް ވަނީ ޚާއްސަ ފައިސާގެ އިނާުތަކެއް ދީފައި އެވެ. އެގޮތުން ރޭހުން އެއްވަނަ ހޯދި ފަރާތަށް 3000 ރުފިޔާ, ދެވަނައަށް 1500 ރުފިޔާ އަދި ތިން ވަނައަށް 1000 ރުފިޔާގެ ފައިސާގެ އިނާމު ވަނީ ދީފައި އެވެ.

މީގެ އިތުރުން ފެސްޓިވަލުގައި ތަފާތު ސްޓޭޖް ހަރަކާތްތަކާ، މަޢުލޫމާތްދޭ ސްޓޯލްތަކާ، ގިނަ ކުޅިވަރުތަކާ އަދި ރަށުގެ ހީވާގި ކަނބަލުންގެ ތަފާތު ކާބޯތަކެތީގެ މަސައްކަތް ދައްކުވައިދޭ ސްޓޯލްތައް ވަނީ ޑިސްޕްލޭކޮށްފައެވެ. އަދި ވަކީން ޚާއްސަކޮށް ޑރ. އަބްދުލް ސަމަދު މެމޯރިއަލް ހޮސްޕިޓަލް އިން ވަނީ 18 އަހަރުން މަތީގެ ހުރިހާ ފަރާތްތަކަށް ހާއްސަކުރެވިގެން ޚާއްސަ ސްކްރީނިންގ ޕްރޮގްރާމެއް ވެސް ކުރިޔަށް ގެންގޮސްފައެވެ. އެ ޕްރޮގްރާމުގައި ހެލްތް ސްކްރީނިންގ ކުރުމާއި ލޭގެ ޕްރެޝަރު ބެލުމުގެ އިތުރުން ބޮޑީ މާސް އިންޑެކްސް (BMI) ބެލޭނެ އިންތިޒާމު ހަޖައްސާފައި ވެއެވެ. އަދި ގައިގައިން ނާރާ ބަލިތައް ޖެހުމުގެ ފުރުސަތުއޮތް މިންވަރު ދެނެގަތުންވެސް ހިމެނެއެވެ.