މަތީ ތަޢުލީމުގެ ފުރުޞަތުތައް ފަހިކޮއްދިނުމަށް ހަޔާ އެޑިއުކޭޝަންގެ ޓީމެއް މެލޭޝިއާގައި!

އެޑިޔުކޭޝަން މެލޭޝިޔާ ގްލޯބަލް ސަރވިސެސް (އީއެމްޖީއެސް)ގެ ދަޢުވަތަކަށް މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އިން މެލޭޝިޔާއަށް ޒިޔާރާތްކޮއްފިއެވެ.

މި ދަތުރުގެ މައިގަނޑު މަޤްސަދަކީ މެލޭޝިޔާގެ ޔުނިވާސިޓީތަކުގައި ހުރި ފެސިލިޓީތަކާއި އެކި ކަހަލަ ޚިދުމަތްތަށް ދެނެގަނެ ،ދިވެހި ދަރިވަރުން މެލޭޝިޔާއަށް ކިޔަވަން އަންނައިރު، ރަނގަޅު ޔުނިވާސިޓީތަށް ޚިޔާރުކުރުމަށް މިނިސްޓްރީގެ ފަރާތުން އެހީތެރިކަން ފޯރުކޮއްދިނުމެވެ. އެގޮތުން މި ދަތުރުގައި، މެލޭޝިޔާގެ ސަންވޭ ޔުނިވާސިޓީ ،އައިއެމްޔޫ ޔުނިވާސިޓީ އަދި އޭޕީޔޫ ޔުނިވާސިޓީއަށް ޒިޔާރާތްކޮށް، އެ ޔުނިވާސިޓީގެ ޕްރޮގްރާމްތަކާއި އެ ޕްރޮގްރާމްތަށް ކިޔަވައިދިނުމަށް ބޭނުންކުރާ ފެސިލިޓީތަށް ބަލާލުމަށް ވަނީ ހަމަޖެހިފައެވެ.

މީގެ އިތުރުން، އީއެމްޖީއެސް އިން ވަނީ "ފެސްޓިވަލް އޮފް އައިޑިޔާސް" ގެ ނަމުގައި އެ އިދާރާއިން އިންތިޒާމްކޮއްގެން ބާއްވާ ފެއަރގައި ބައިވެރިވުމަށް މިނިސްޓްރީއަށް ދަޢުވަތު ދެއްވާފައެވެ. މި ފެއަރގައި ބައިވެރިވެ، މެލޭޝިޔާގައި މަތީ ތަޢުލީމުގެ ފުރުޞަތުތަށް ފަހިކޮއްދިނުމަށް މަސައްކަތްކުރަމުންދާ އެންމެހާ ފަރާތްތަކާއި ބައްދަލުކޮށް، ގުޅުން ބަދަހިކުރުމުގެ އިތުރުން އެ ފަރާތްތަށް މެދުވެރިކޮށް ދިވެހިރާއްޖޭގެ މަތީ ތަޢުލީމު ކުރިއެރުވުމަށް ލިބެންހުރި ފުރުޞަތުތަކާއި ގުޅޭގޮތުން މަޝްވަރާކުރުމަށް މިނިސްޓްރީގެ ފަރާތުން ވަނީ ތައްޔާރުވެފައެވެ.

އީއެމްޖީއެސް އަކީ މެލޭޝިޔާގެ މަތީ ތަޢުލީމުގެ ފުރުޞަތުތަށް އެހެން ޤައުމުތަކަށް ފަހިކޮއްދިނުމުގެ ގޮތުން އެ ޤައުމުގެ މަތީ ތަޢުލީމާއި ބެހޭ ވުޒާރާގެ ދަށުން މަސައްކަތްކުރަމުން އަންނަ އިދާރާއެކެވެ.

2017 ވަނަ އަހަރުން ފެށިގެން އީއެމްޖީއެސް އިން ވަނީ ދިވެހި ރާއްޖޭގެ މަތީ ތަޢުލީމަށް ފައިދާ ހުރި އެކި އެއްބަސްވުންތަކުގައި ސޮއިކޮއްފައެވެ.