ނިރުބަވެރި އިޒްރޭލުން ލުބުނާނާއި ދެކޮޅަށް ކުރަމުންދާ ހަނގުރާމަ ހުއްޓާލަނީ

ލުބުނާނާއި ދެކޮޅަށް ކުރަމުންދާ ހަނގުރާމަ ހުއްޓާލަން އިޒްރޭލުގެ ސެކިއުރިޓީ ކެބިނެޓުން ހުށަހެޅި ޕްރޮޕޯސަލް އެކެބިނެޓުން ފާސްކޮށްފި އެވެ.

މިކަން ރަސްމީކޮށް އިއުލާނުކުރީ މިހާރު ކުރިޔަށްދާ ނޫސްވެރިންގެ ބައްދަލުވުމުގައި އިޒްރޭލުގެ އިނުޔާވެރި ބޮޑުވަޒީރު ބެންޖަމިން ނަތަންޔާހޫ އެވެ.

ސެކިއުރިޓީ ކެބިނެޓާއެކު ގަޑިއިރެއްހާއިރު ވަންދެން ބޭއްވި ބައްދަލުވުމަށްފަހު، ނަތަންޔާހޫ ބުނީ ހިޒްބުالله އާއި އެކު ހަނގުރާމަ ހުއްޓާލުމުގެ ހުށަހެޅުމަށް އެކެބިނެޓުގެ ފުރިހަމަ ތާއީދު ލިބިފައިވާ ކަމަށާއި އެ ހުށަހެޅުމާއި މެދު ގޮތެއް ނިންމާނީ ސަރުކާރުގެ މައި ކެބިނެޓުން ކަމަށެވެ.

ހިޒްބުالله އިން ވެސް ތާއީދު ކޮށްފައިވާ ހަނގުރާމަ ހުއްޓާލުމުގެ އެއްބަސްވުމުގެ ސަބަބުން ލިޓާނީ ކޯރުގެ ދެކުނުން އޮންނަ ބޯޑަރު ސަރަހައްދުގައި ހިޒްބުالله ގެ ހަތިޔާރުއެޅި ސިފައިން ތިބުން ނިމުމަކަށް އަންނާނެ ކަމަށާއި ލުބުނާނުގެ ދެކުނުން އިސްރާއީލު ސިފައިންވެސް ފައިބާނެ ކަމަށް ނަތަންޔާހޫ ވަނީ ބުނެފައި އެވެ.

ނަތަންޔާހޫ އިތުރަށް ބުނީ މިހާރު ހިޒްބުالله އަކީ ހަނގުރާމަ ފެށި އިރު އޮތް ވަރުގެ ވަރުގަދަ ޖަމާއަތެއް ނޫން ކަމަށާއި އިސްރާއީލު ސިފައިން އެ މީހުން އެތައް ޒަމާނެއް ފަހަތަށް ޖައްސާފައިވާ ކަމަށެވެ. އެގޮތުން ނަތަންޔާހޫ އިޝާރާތް ކުރީ ފާއިތުވި ދުވަސްތަކުގައި ހިޒްބުالله އާއި ދެކޮޅަށް ދިން ހަމަލާތަކުގައި އެޖަމާއަތުގެ އެންމެ އިސްވެރިން ޝަހީދުވެގެން ދިޔަ ދިޔުމަށެވެ.

ނަތަންޔާހޫ ބުނީ އިސްރާއީލު ސިފައިން އެ ޖަމާއަތުގެ ލީޑަޝިޕްގެ ބޮޑު ބައެއް ނައްތާލާފައިވާ ކަމަށާއި އެ މީހުންގެ އިންފްރާސްޓްރަކްޗާ ހަލާކުކޮށްލާފައިވާ ކަމަށެވެ.