އެންދެރި މަޝްރޫޢުގެ ދަށުން އޯޝަން އެކައުންޓިންގް ސިމްޕޯޒިއަމެއް ބާއްވައިފި

ދިވެހިރާއްޖޭގައި ޤުދުރަތީ ރައުސްމާލު ހިސާބުކިތާބުކުރުން ތަޢާރަފް ކުރުމަށް އެންދެރި މަޝްރޫޢުން ކުރިއަށްގެންދާ މަސައްކަތުގެ ދަށުން އޯޝަން އެކައުންޓިންގް ސިމްޕޯޒިއަމެއް ބާއްވައިފިއެވެ.

ޝީ ބިލްޑިންގްގައި ބޭއްވުނު މި ސިމްޕޯޒިއަމްގައި ޤުދުރަތީ ރައުސްމާލު ފައިސާއިން އަގުކުރާނޭ ގޮތްތަކާއި، ރާއްޖޭގައި މަޢުލޫމާތު އެއްކުރުމަށް ރިމޯޓް ސެންސިންގ ބޭނުންކުރުމާއި، މާޙަޢުލީ ނިޒާމުތަކުގެ މަޢުލޫމާތު އެއްކުރުމުގައި ކުރީގެ ތާރީޙުތަކުގެ މަޢުލޫމާތުގެ ބޭނުންތެރިކަމުގެ މައްޗަށް އަލިއަޅުވާލެވުނެވެ. މި ސެޝަންތައް ނަންގަވައިދެއްވީ މި މަސައްކަތުގައި އިސްކޮށް އުޅުއްވާ ޔުނިވަރސިޓީ އޮފް ނިއު ސައުތް ވޭލްސްގެ ޓީމާއި، މޯލްޑިވްސް ރެޒިލިއަންޓް ރީފްސް، މޯލްޑިވްސް ސްޕޭސް ރިސަރޗް އޯގަނައިޒޭޝަން އަދި ދިވެހި ރާއްޖޭގެ ޤައުމީ ޔުނިވަރސިޓީގެ ބޭފުޅުންނެވެ.

މި ސިމްޕޯސިއަމްގައި ތިމާވެއްޓާ ބެހޭގޮތުން ކިޔަވާ ދަރިވަރުން ކަނޑުގެ ޤުދުރަތީ ވަޞީލަތްތަކާގުޅޭގޮތުން ކޮށްފައިވާ ދިރާސާތަކެއްވެސް ހުށަހަޅައިދިނެވެ.

އިއްޔެ ކުރިޔަށް ގެންދިޔަ މި ސިމްޕޯސިއަމްގައި ކަމާބެހޭ ގިނަ އިދާރާތަކާއި ލާމު އަތޮޅާއި، ބޮޑުތިލަދުންމައްޗާއި ނައިފަރާއި ފުވައްމުލަކު ސިޓީ ކައުންސިލްގެ ފަރާތުން ބައިވެރިވިއެވެ.