މޮނިއުމެންޓު ޑިޒައިން މުބާރާތުން އެއްވަނަ ލިބުނު ހުށަހެޅުމާއި މެދު ސުވާލު އުފެދުމުން އަލުން ރިވިއު ކުރަނީ

ހުޅުމާލޭގެ އެކި ސަރަހައްދުތަކުގައި މޮނިއުމެންޓުތައް ތަރައްޤީކުރުމަށްޓަކައި އެ މޮނިއުމެންޓުތައް ޑިޒައިން ކުރުމަށް އާންމުކޮށް ހުޅުވާލި މުބާރާތުން އެއްވަނަ ލިބުނު ހުށަހެޅުމާއި މެދު ސުވާލު އެފެދުމާއި ގުޅިގެން ވަނަ ލިބުނު ހުށަހެޅުން އަލުން ރިވިއު ކުރަން ހައުސިންގ ޑިވެލޮޕްމެންޓު ކޯޕަރޭޝަނުން ނިންމައިފި އެވެ.

ހުޅުމާލެއަކީ ހިތްފަސޭހަ ތަނަކަށް ހެދުމަށް އެޗްޑީސީން ކުރަމުން އަންނަ މަސައްކަތުގެ ތެރެއިން ހުޅުމާލޭގެ އެކި ސަރަހައްދުތަކުގައި ބަހައްޓާ މޮނިއުމެންޓުތައް ޑިޒައިން ކުރުމަށްޓަކައި އެއް ލައްކަ ރުފިޔާގެ ފައިސާ އިނާމެއް އެއްވަނަ ޑިޒައިންއަކަށް ލިބޭ މުބާރާތެއް އެޗްޑީސީން އިއުލާނުކުރީ މިދިޔަ ސެޕްޓެމްބަރު މަހުގެ 24 ވަނަ ދުވަހު އެވެ. އެގޮތުން މިދިޔަ އޮކްޓޯބަރު މަހުގެ 30 ވަނަ ދުވަހުގެ ނިޔަލަށް މުބާރާތަށް ހުށަހެޅުން ހުށަހެޅުމުގެ ސުންގަޑި ހަމަވި އިރު 7 ފަރާތަކުން ޑިޒައިން ހުށަހަޅާފައިވާ ކަމަށް އެޗްޑީސީން މިއަދު ވަނީ ބުނެފައި އެވެ.

މި މުބާރާތުގެ އެއްވަނަ ހޯދި ފަރާތް އިއްޔެ އެޗްޑީސީން އިއުލާނުކުރުމާއި އެކު އެއްވަނަ ހޯދި ޑީޒައިންތަކަކީ އޭއައި ޖެނެރޭޓެޑް އިމޭޖްތަކެއް ކަމަށް ގިނަ ބަޔަކު ވަނީ ތުހުމަތުކޮށްފައި އެވެ. މިއާއި އެކު މިއަދު އެޗްޑީސީން ނެރުނު ބަޔާނެއްގައި ބުނީ މުބާރާުތުގެ ހުށަހެޅުންތަކުގެ މެދުގައި ވަނަ ހޮވާފައިވަނީ އެކަމައްޓަކައި ކަނޑައެޅިފައިވާ ޕްރޮފެޝަނަލް ސްޓާފުންގެ ޖަޖުންގެ ޕެނަލަކުން ހުށަހެޅުންތައް އިވެލުއޭޓް ކުރުމަށްފަހުގައި ކަމަށެވެ.

ނަމަވެސް މުބާރާތުން އެއްވަނައަށް ދިޔަ މޮނިއުމެންޓު ޑިޒައިންތަކަކީ އެއައި ޖެނެރޭޓެޑް ޑިިިިޒައިންތަކެއް ކަމަށްބުނެ އާންމުންގެ ޝަކުވާ އެކުންފުންޏަށް ލިބުމާއި ގުޅިގެން އެ ޝަކުވާތައް އިތުރަށް ބަލައި ވަނަ ލިބުނު ޑިޒައިންތައް ރިވުއު ކުރުމުގެ މަސައްކަތް ކުރުމަން ނިންމައި އެމަސައްކަތް ކުރަމުންދާ ކަމަށް އެޗްޑީސީގެ ބަޔާނުގައި ވަނީ ބުނެފައި އެވެ.

އެޗްޑީސީން ބުނީ މި މުބާރާތުގެ މަގްސަދަކީ ހުޅުމާލޭގެ ތަރައްޤީއަށް އެ ކޯޕަރޭޝަނުން ކުރަމުން އަންނަ މަސައްކަތްުތަކުގައި ދިވެހި ފަންނުވެރިންގެ ހުޔާލާއި ވިސްނުން ހިމެނުން ކަމުގައި ވާތީ މިފަދަ މުބާރާތްތަކުގައި ދިވެހި ފަންނުވެރިންނަށް ފުރުސަތު ނުލިބޭ ގޮތަކަށް އެ ކޯޕަރޭޝަނުން އަމަލުނުކުރާނެ ކަމަށެވެ. އަދި ރައްޔިތުންނާއި ގުޅޭ މިފަދަ ކަންކަމުގައި ރައްޔިތުންގެ ހިޔާލާއި މަޝްވަރާއަށް އެކޯޕަރޭޝަނުން އަބަދުވެސް މަރުހަބާ ދަންނަވާ ކަމަށް ވަނީ ބުނެފައި އެވެ.