--
ފަރުކޮޅުފުށީގައި ޕްރައިވެޓް ލަގްޒަރީ ދިރިއުޅުމަށް ހާއްސަ ވިލާތަކެއް ތަރައްޤީ ކުރުމުގެ މަޝްރޫއެއް ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ) އިން އިފްތިތާހުކޮށްފިއެވެ.
އެޗްޑީސީ އިން މި މަޝްރޫއު އިފްތިތާހު ކުރީ އެ ކުންފުނިން ކުރިޔަށް ގެންދިޔުމަށް ނިންމާފައިވާ ބޮޑެތި މަޝްރޫތަކެއް އިފްތިތާހު ކުރުމަށް ރޭ ހުޅުމާލޭގެ ސެންޓްރަލް ޕާކުގައި ބޭއްވި ހާއްސަ ރަސްމިއްޔާތެއްގައެވެ.
”ޓްރާންސްފޯމިން ޓުމޯރޯ“ މަޝްރޫއު ގެ ދަށުން ފަރުކޮޅު ފުށީގައި ތަރައްޤީ ކުރާ ގޭޓެޑް ކޮމިއުނިޓީ އަކީ، ލަގްޒަރީ ދިރިއުޅުން ތަޖުރިބާ ކޮށްލަން ބޭނުންވާ ފަރާތްތަކަށް ހާއްސަކޮށްގެން ޒަމާނީ ވަސީލަތްތަކާއިއެކު ތަރައްޤީ ކުރާ މަޝްރޫއުއެއް ކަމަށް އެޗްޑީސީ އިން ބުންޔެވެ.
އެޗްޑީސީ އިން ބުނީ ފަރުކޮޅުފުށި ގޭޓެޑް ކޮމިއުނިޓީއަކީ ޕްރައިވެޓް ލަގްޒަރީ ލިވިންގް ތަޖުރިބާ ކޮށްލަން ބޭނުންވާ މީހުންނަށް ޒަމާނީ ވަސީލަތްތަކާއެކު ތަރައްގީކުރާ މަޝްރޫއެކެވެ. އެގޮތުން އެތަނުގައި 20 ބީޗް ވިލާ އާއި 60 ގާޑަން ވިލާ އާއި 26 އާބަން ވިލާ އަދި 230 ސާވިސް އެޕާޓްމަންޓް ތަރައްގީ ކުރުމަށް އެޗްޑީސީން ވަނީ ނިންމާފައި އެވެ. މި ހައުސިންގ މަޝްރޫއުގެ ތެރެއިން ފަރުކޮޅުފުށީގެ ވަށައިގެން ޕްލާޒާ އާއި އިންޑޯ ސްޕޯޓްސް ކޮމްޕްލެކްސް އާއި ކްލަބްހައުސް އާއި ރެސްޓޯރަންޓް އަދި ލެޕް ޕޫލް ފަދަ ހިތްގައިމު ވަސީލަތްތައް ގާއިމުކުރާނެ ކަމަށް އެޗްޑީސީ އިން ބުނެ އެވެ. އަދި އިވެންޓް ސްޕޭސްވެސް ގާއިމުކުރަން ވަނީ ނިންމާފަ އެވެ.
އެޗްޑީސީ އިން ބުނީ ފަރުކޮޅުފުށީގައި ފަސް ފަންގިފިލާގެ ހޮޓަލެއް އިމާރާތްކުރާނެ އެވެ. 85 ކޮޓަރި ހިމެނޭ އެ ހޮޓަލުގައި ޕޫލް އާއި އިވެންޓް ހޯލް އަދި ވީއައިޕީ ޕާކިން ހިމެނޭނެ އެވެ.
ފަރުކޮޅުފުށީގައި ތަރައްޤީ ކުރާ މި ލަގްޒަރީ ވިލާތަކަކީ ރައީސް ޑރ. މުހައްމަދު މުއިއްޒުގެ ވިސްނުންފުޅާއި އެއްގޮތަށް، ހައުސިން ގެ އިތުރުން، ލަގްޒަރީ ދިރިއުޅުން ތަޖުރިބާ ކޮށްލުމުގެ ފުރުސަތު ފަހިކޮށްދިނުމަށް ފެށޭ މުހިންމު މަޝްރޫއެއް ކަމަށް އެޗްޑީސީ އިން ބުންޔެވެ. އަދި މި މަޝްރޫއު ގެ ސަބަބުން ވަޒީފާގެ ފުރުސަތުތައް އިތުރުވެ، އިޤްތިސާދު އިތުރަށް ފުޅާވެގެންދާނެ ކަމަށް އެ ކުންފުނިން މައުލޫމާތު ދިނެވެ.
ފަހުގެ
