ރާއްޖޭގައި ޒަކާތާއި ގުޅޭ ބައިނަލަގްވާމީ މަހާސިންތާއެއް ބާއްވަނީ

ޒަކާތާއި ގުޅޭ ބައިނަލަގްވާމީ މަހާސިންތާއެއް ރާއްޖޭގައި ބޭއްވުމަށް ތައްޔާރުވެއްޖެ އެވެ.

ރާއްޖޭގެ އިސްލާމީ ކަންތައްތަކާއި ބެހޭ ވުޒާރާ އާއި ރާއްޖޭގެ ޒަކާތު ހައުސްއިން އިސްނަގައިގެން ބާއްވާ މި މަހާސިންތާއަކީ ބައިނަލަގްވާމީ ޒަކާތު މަހާސިންތާ ނުވަތަ އިންޒެކް 2024 ގެ ނަމުގައި ބާއްވާ މަހާސިންތާއެކެވެ.

މި މަހާސިންތާ ބޭއްވުމަށް ނިންމާފައިވަނީ މިމަހުގެ 28 ވަނަ ދުވަހު މާލޭގައި ހުންނަ އިސްލާމީ މަރުކަޒުގެ ޖަލްސާކުރާ މާލަމުގައި އެވެ.

ޒަކާތު ހައުސްއިން މިއަދު ބުނީ މި މަހާސިންތާއަކީ ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމާއި، ޒަކާތުގެ މަންފާ އޭގެ ޙައްޤުވެރިންނަށް ފުޅާ ދާއިރާއެއްގައި ލިބޭނެގޮތްތަކާމެދު މަޝްވަރާ ކުރުމާއި، ދެމެހެއްޓެނިވި ތަރައްޤީއަށް ފަހިވާނެހެން ޒަކާތު ފަންޑު ތަރައްޤީ ކުރުމާ ގުޅޭގޮތުން މަޝްވަރާކުރުމަށް ބޭއްވޭ މަހާސިންތާ އެއް ކަމަށެވެ.

މި މަހާސިންތާގައި ރާއްޖެއިން ބޭރުގެ ބައެއް ޒަކާތާއި ގުޅޭ ކަންކަމުގައި މަސައްކަތްކުރާ ތަޖުރިބާކާރުންނާއި އެކި ގައުމު ތަކުގެ ސަރުކާރުގެ އިސްވެރިންވެސް ބައިވެރިވެވަޑައިގަތުމަށް ވަނީ ނިންމާފައި އެވެ.