ރާއްޖޭގެ ބޮޑު ސަރަހައްދަކަށް ނެރުނު ހުދު ސަމާލު ދަންމާލައިފި

މޫސުން ގޯސްވާނެ ކަމަށް ލަފާކޮށް ރާއްޖޭގެ ބޮޑު ސަރަހައްދަކަށް ނެރުނު ހުދު ސަމާލު ދަންމާލައިފި އެވެ.

މޫސުމާއި ބެހޭ ގައުމީ އިދާރާއިން މިއަދު މެންދުރު ހުދު ސަމާލު ނެރުނީ ހއ އަތޮޅުން ފެށިގެން ލ އަތޮޅާއި ހަމައަށެވެ. އެގޮތުން މެންދުރު 14:00 ގައި ނެރުނު ހުދު ސަމާލުގެ މުައްދަތު މިރޭގެ 20:00 އަށް ހަމަވުމާއި އެކު އެ ސަމާލު ވަނީ މިރޭ ދަންވަރު 02:00 ގެ ނިޔަލަށް ދަންމާލާފައި އެވެ.

މޫސުމާއި ބެހޭ ގައުމީ އިދާރާއިން ލަފާކުރާގޮތުގައި އެމުއްދަތުގައި އެސަރަހައްދަށް ބޯކޮށް ވާރޭވެހި ގުގުރުން އެކަށީގެންވެއެވެ.

ފާއިތުވި ހަތަރު ދުވަހުވެސް ރާއްޖޭގެ ބޮޑު ސަރަހައްދަކަށް ވަނީ މޫސުން ގޯސްވެފައި އެވެ. އެގޮތުން ބޯކޮށް ވާރޭވެހުމުގެ ސަބަބުން ބައެއް ރަށްތަކަށް ބޮޑެތި ގެއްލުންތަކެއް ލިބިފައިވާއިރު ނެޝަނަލް ޑިޒާސްޓަރ މެނޭޖްމެންޓުން ދަނީ ރަށްތަކުގެ ހާލަތުން ގާތުން ބަލަމުންނެވެ.