ރާއްޖޭގެ ބޮޑު ސަރަހައްދެއް ހުދު ސަމާލުގައި!

މޫސުން ގޯސްވާނެކަމަށް ލަފާކޮށް ރާއްޖޭގެ ބޮޑު ސަރަހައްދަކަށް ހުދު ސަމާލު ނެރެފި އެވެ.

މޫސުމާ ބެހޭ ގައުމީ އިދާރާއިން ހުދުސަމާލު ނެރެފައިވަނީ، ހއ. އަތޮޅުން ފެށިގެން ތ. އަތޮޅާ ހަމައަށެވެ. އެގޮތުން މި ސަމާލު ނެރެފައިވަނީ 13:30 އިން ފެށިގެން އިރުއޮއްސި 18:30 ގެ ނިޔަލަށެވެ.

މި މުއްދަތުގައި މި ސަރަހައްދަށް ބޯކޮށް ވާރޭވެހި ގުގުރާނެ ކަމަށް އެއިދާރާއިން ލަފާކުރެއެވެ.

މޫސުމާބެހޭ ޤައުމީ އިދާރާއިން މިއަދު ވަނީ އިއްޔެގެ ހެނދުނު 08:00 އިން މިއަދުގެ 08:00 އާއި ހަމައަށް އެކި ސަރަހައްދުތައް ވާރޭވެހިފައިވާ މިންވަރު ދައްކުވައިދޭ ތަފާސް ހިސާބުތައް އާއްމުކޮށްފައެވެ. ތަފާސް ހިސާބުތައް ދައްކާގޮތުން އެމުއްދަތުގެ ތެރޭގައި އައްޑޫ ސިޓީ ހިތަދޫއަށް އިއްޔެ 110 މިލިލީޓަރުގެ ވާރޭވެހިފައި ވެއެވެ. އަދި އައްޑޫ ސިޓީގެ ގަމަށް 106 މިލިމީޓަރުގެ ވާރޭ ވެހިފައިވެއެވެ.

މޫސުމާއި ބެހޭ ގައުމީ އިދާރާއިން ވަނީ ކުރިޔަށް އޮތް 3 ދުވަހުވެސް ރާއްޖޭގެ ބޮޑުސަރަހައްދަކަށް ބޯކޮށް ވާރޭވެހޭނެ ކަމަށް ލަފާކޮށްފައެވެ. އަދި މިއަދު މިވަގުތާއި ހަމައަށްވެސް ރާއްޖޭގެ ގިނަ ސަރަހައްދުތަކެއް އޮތީ މޫސުމީ ސަމާލުތަކުގައި އެވެ.