އޭޝިއާގެ އިންޑަސްޓްރީ ޗެމްޕިއަންސް އޮފް ދަ އިޔާގެ އެވޯޑު ސްޓެލްކޯއަށް!

އޭޝިއާ ބައްރުގެ ކުންފުނިތަކުގެ ތެރެއިން އެންމެ ފާހަގަކޮށްލެވޭ ކުންފުނިތަކަށް ދެމުންދާ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑް ރާއްޖޭގެ ހަކަތައިގެ މައި ކުންފުނި ސްޓެލްކޯއަށް ލިބިއްޖެ އެވެ.

އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް (އޭސީއީއެސް) އަކީ އޭޝިއާގެ ވިޔަފާރިތައް އެވެލުއޭޓްކޮށް އެކުންފުނިތަކުގެ އަގު ވަޒަން ކުރުމުގެ ގޮތުން 2014 ވަނަ އަހަރުން ފެށިގެން އޭސެސް އެވޯޑުގެ ނަމުގައި ދެމުން އަންނަ އެވޯޑެކެވެ.

މިއަހަރުގެ އެވޯޑު ހަފްލާ މިމަހުގެ 14 ވަނަ ދުވަހާއި 15 ވަނަ ދުވަހު ބާއްވާފައިވަނީ ތައިލެންޑުގެ ބެންކޮކުގައި އެވެ. މިއަހަރުގެ އެވޯޑް ހަފްލާ ވެގެންގޮސްފައިވަނީ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް (އޭސީއީއެސް) ގެ 11 ވަނަ އެވޯޑް ހަފްލާއަށެވެ.

މިއަހަރުގެ އެވޯޑު ހަފްލާވެސް ކުރިޔަށް ގެންގޮސްފައިވަނީ ދެ ބަޔަކަށް ބަހާލައިގެންނެވެ. އެގޮތުން މިމަހުގެ 14 ވަނަ ދުވަހު ކުރިޔަށް ގެންގޮސްފައިވަނީ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް ލިބޭ ކުންފުނިތަކަށް އެވޯޑު ދިނުމުގެ ހަފްލާއެވެ. އަދި 15 ވަނަ ދުވަހުގެ ހަފްލާ ޚާއްސަކުރީ އޭޝިއާއިން ފާހަގަކޮށްލެވޭ ވިޔަފާރިވެރިންގެ އަގު ވަޒަން ކުރުމަށެވެ.

އެގޮތުން އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް ލިބޭ ކުންފުނިތަކަށް އެވޯޑު ދިނުމުގެ ހަފްލާގައި ސްޓެލްކޯއަށް ލިބުނީ އަހަރުގެ އޭޝިއާގެ އަންޑަސްޓްރީ ޗެމްޕިއަންސްގެ އެވޯޑެވެ. މިއީ ހަކަތައިގެ ދާއިރާއިން އޭޝިއާގައި އެންމެ ފާހަގަކޮށްލެވޭ ކުންފުނީގެ ގޮތުގައި ސްޓްލްކޯއަށް ލިބުނު އެވޯޑެކެވެ. ހަކަތައިގެ ދާއިރާއިން މިއަހަރު މި އެވޯޑް ލުބުނީ ސްޓެލްކޯއަށް އެކަންޏެވެ.

މި އެވޯޑް ސްޓެލްކޯއަށް ދިނުމުގައި ބަލާފައިވަނީ ހަކަތައިގެ ދާއިރާއިން ސްޓެލްކޯއިން ރާއްޖެއަށް ހޯދައިދީފައިވާ ކާމިޔާބުތަކާއި އެކުންފުނިން ރާއްޖޭގެ ހަކަތައިގެ ދާއިރާ ކުރިއެރުވުމަށް ކުރަމުން ގެންދާ މަސައްކަތްތަކަށް ކަމަށް އޭސީއީއެސްއިން ބުނެއެވެ.

މިއަހަރުގެ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސްގެ އިންސްޕިއަރިން އެގްޒެކެޓިވްސް ގެ އެވޯޑު ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީއަށްވެސް ވަނީ ލިބިގެންގޮސްފައި އެވެ.

މިއީ މި ދެ އެވޯޑު ރާއްޖޭގެ ކުންފުންޏަކަށާއި ރާއްޖޭގެ އެމްޑީއަކަށް ލިބިގެން ދިޔަ ފުރަތަމަ އަހަރެވެ.

މެލޭޝިއާގެ މޯސް ގްރޫޕުން އިންތިޒާމްކޮށްގެން 2014 ވަނަ އަހަރުން ފެށިގެން ދެމުން އަންނަ ”އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް، ވޭތުވެދިޔަ އަހަރުތަކުގައި ދުނިޔޭގެ ފާހަގަކޮށްލެވޭ ބޮޑެތި ކުންފުނިތަކަށް ލިބިފައިވެ އެވެ. އޭގެ ތެރޭގައި ކޮކާކޯލާ, ސެމްސަންގް، އެއާ އޭޝިއާ، ޓާޓާ ގްރޫޕް، ޑީއެޗްއެލް، ކެސްޕާސްކީގެ އިތުރުން، ނެސްލޭ ފަދަ ބޮޑެތި ކުންފުނިތަކުން ވަނީ އެކި ކެޓަގަރީތަކުން މި އެވޯޑް ހޯދައިފަ އެވެ.