ކަނޑުގެ ރާޅުން ހަކަތަ އުފައްދުމަށްޓަކައި ސްޓެލްކޯއިން މަޝްރޫއުއެއް ފަށައިފި

ކަނޑުގެ ރާޅުން ހަކަތަ އުފެއްދުމަށްޓަކައި ބޭނުންވާ މައުލޫމާތު އެއްކުރުމަށް ސްޓެލްކޯ އިން މަޝްރޫއެއް ފަށައިފި އެވެ.

މި މަޝްރޫއު ފެށިކަން ހާމަކުރެއްވީ އެކުންފުނީގެ މެނޭޖިންގ ޑިރެކްޓަރު ހުސެއިން ފަހުމީ މިއަދު އެކްސްގައި ކުރެއްވި ޕޯސްޓެއްގައި އެވެ.

އެގޮތުން ފަހުމި ވިދާޅުވީ މިއީ ރާއްޖޭގެ އިއާދަކުރަނިވި ހަކަތައިގެ އިންސައްތަ 33 އިންސައްތަ އަށް އުފުލުމަށް ރައީސް ޑރ. މުޢިއްޒު ކުރައްވާފައިވާ ވައުދު ފުއްދުމަށް އެ ކުންފުނިން ފަށާފައިވާ މަޝްރޫއެއް ކަމަށެވެ.

ފަހުމީ ވިދާޅުވީ މިއީ އިރުގެ އަލިން އުފައްދާ ހަކަތައިގެ އިތުރުން އިޔާދަކުރަނިވި ހަކަތަ އުފެއްދޭނެ އިތުރު ގޮތްތައް ހޯދުމުގެ ގޮތުން ކުރާ ދިރާސާއެއް ކަމަށާއި މި ދިރާސާގައި ރާޅުން ހަކަތަ އުފެއްދުމަށް ބޭނުންވާ މައުލޫމާތު އެއްކުރާނެ ކަމަށެވެ.

"ވޭވް އެނަރޖީގެ ސަބަބުން ގިނަ ފައިދާތަކެއް ލިބިގެންދާއިރު، އޭގެ ތެރޭގައި، ކަނޑުގެ ރާޅުތަކަކީ އިރުގެ ހަކަތައަށްވުރެ މޫސުމުގެ ޙާލަތުގެ އަސަރު ކުޑަ ރާޅުތަކަކަށްވާތީ، ހަކަތައިގެ ސަޕްލައި މިހާރަށްވުރެ ހަރުދަނާގޮތެއްގައި ފޯރުކޮށްދިނުން ހިމެނޭ. " ފަހުމީ ވިދާޅުވީ އެވެ.

ފަހުމީ އިތުރަށް ވިދާޅުވީ މި ދިރާސާގެ ޒަރިއްޔާއިން ސްޓެލްކޯގެ އަމާޒަކީ ވޭވް އެނަރޖީގެ ސަބަބުން މިހާރު ހުރި އިއާދަކުރަނިވި ވަސީލަތްތައް ފުރިހަމަކުރެވިދާނެ ގޮތް ދެނެގަނެ، މިހާރަށްވުރެ ހަރުދަނާ އަދި އިތުބާރު ކުރެވޭ ހަކަތައިގެ ގްރިޑެއް އުފެއްދުން ކަމަށެވެ.

އަދި މި މަސައްކަތުން ސްޓެލްކޯއިން އައު ކަންތައްތައް ތައާރަފުކުރުމަށް ކުރާ މަސައްކަތް ހާމަވެ، ރާއްޖޭގެ ސާފު އަދި ދެމެހެއްޓެނިވި މުސްތަގްބަލަކަށް ކުރާ މަސައްކަތަށް އެހީތެރިވެދޭނެ ކަމަށާއި އަދި ރާއްޖޭގެ އިއާދަކުރަނިވި ހަކަތައިގެ ލަނޑުދަނޑިތައް ހާސިލުކުރުމަށް މަގުފަހިވެގެންދާނެކަން ފަހުމީ ފާހަގަކުރެއްވި އެވެ.