އޭޝިއާގެ އެންމެ އިންސްޕަޔަރިން އެގްޒެކެޓިވްސް ގެ އެވޯޑު ފަހުމީއަށް!

އޭޝިއާ ބައްރުގެ ކުންފުނިތަކުގެ ތެރެއިން އެންމެ ފާހަގަކޮށްލެވޭ ކުންފުނިތަކާއި ވެރިންނަށް ދެމުންދާ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑް ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީއަށް ލިބިވަޑައިގެންފި އެވެ.

އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް (އޭސީއީއެސް) އަކީ އޭޝިއާގެ ވިޔަފާރިތައް އެވެލުއޭޓްކޮށް އެކުންފުނިތަކުގެ އަގު ވަޒަން ކުރުމުގެ ގޮތުން 2014 ވަނަ އަހަރުން ފެށިގެން އޭސެސް އެވޯޑުގެ ނަމުގައި ދެމުން އަންނަ އެވޯޑެކެވެ.

މިއަހަރުގެ އެވޯޑު ހަފްލާ މިމަހުގެ 14 ވަނަ ދުވަހާއި 15 ވަނަ ދުވަހު ބާއްވާފައިވަނީ ތައިލެންޑުގެ ބެންކޮކުގައި އެވެ. މިއަހަރުގެ އެވޯޑް ހަފްލާ ވެގެންގޮސްފައިވަނީ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް (އޭސީއީއެސް) ގެ 11 ވަނަ އެވޯޑް ހަފްލާއަށެވެ.

މިއަހަރުގެ އެވޯޑު ހަފްލާވެސް ކުރިޔަށް ގެންގޮސްފައިވަނީ ދެ ބަޔަކަށް ބަހާލައިގެންނެވެ. އެގޮތުން މިމަހުގެ 14 ވަނަ ދުވަހު ކުރިޔަށް ގެންގޮސްފައިވަނީ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް ލިބޭ ކުންފުނިތަކަށް އެވޯޑު ދިނުމުގެ ހަފްލާއެވެ. އަދި 15 ވަނަ ދުވަހުގެ ހަފްލާ ޚާއްސަކުރީ އޭޝިއާއިން ފާހަގަކޮށްލެވޭ ވިޔަފާރިވެރިންގެ އަގު ވަޒަން ކުރުމަށެވެ.

މި އެވޯޑް ހަފްލާގައި ރާއްޖޭގެ ހަކަތައިގެ މައި ކުންފުނި ކަމަށްވާ ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީއަށް ލިބިވަޑައިގެންނެވީ އޭޝިއާގެ އެންމެ އިންސްޕަޔަރިން އެގްޒެކެޓިވް ގެ އެވޯޑެވެ. މިއީ ރާއްޖޭގެ ކުންފުންޏެއްގެ އިސްވެރިއަކަށް މި އެވޯޑު ލިބުނު ފުރަތަމަ ފަހަރެވެ.

އެވޯޑަށްފަހު ފަހުމީއާއި ގުޅޭ ގޮތުން އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސްއިން ޝާއިރުކުރި ލިޔުމެއްގައި ބުނެފައިވަނީ ފަހުމީ ވަނީ ސްޓެލްކޯގެ ފައުންޑިން އުޞޫލުތައް ފުރިހަމައަށް ޤަބޫލުކުރައްވައި، ކުންފުނީގެ ވިޔަފާރީގެ އުފެއްދުންތެރިކަމާއި، އޮޕަރޭޝަނަލް އެފިޝަންސީ އަދި ދެމެހެއްޓެނިވި ކުރިއެރުމަށް މަގުފަހިކޮށްދެއްވާފައި ކަމަށެވެ. އަދި ފަހުމީގެ ލީޑަރޝިޕުން ދައްކުވައިދެނީ އެއްބާރުލުމާއި، އެޑަޕްޓޭބިލިޓީ އާއި ޓްރާންސްޕޭރެންސީގެ މައިގަނޑު އަސާސްތައް ކަމަށާއި ކަސްޓަމަރ ސެންޓްރިކް އެޕްރޯޗެއް ޕްރޮމޯޓްކޮށްގެން މުވައްޒަފުންނަކީ ކުންފުނީގެ ސްޓްރެޓެޖިކް މަގްސަދުތަކާ ގުޅިފައިވާ ބައެއްކަން އޭނާ ކަށަވަރުކުރައްވާ ކަމަށެވެ.

އަދި ފަހުމީގެ ޒަޢާމަތުގައި ސްޓެލްކޯއިން ވަނީ މުވައްޒަފުންގެ ބައިވެރިވުން އިތުރުކުރުމަށާއި މާނަހުރި އުފެއްދުންތައް އުފެއްދުމަށް ޕްރޮފެޝަނަލް ޑިވެލޮޕްމަންޓް ފުރުޞަތުތައް ފަހިކޮށްދީ، ދެމެހެއްޓެނިވި ގޮތެއްގައި އުނގެނުމުގެ ސަގާފަތެއް ޤާއިމުކޮށްފައިކަންވެސް ވަނީ ފާހަގަކޮށްފައެވެ.

މިއަހަރުގެ އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސްގެ ލީޑަރޝިޕް އެވޯޑު ފަހުމީގެ އިތުރުން އޭޝިއާގެ 13 ގައުމެއްގެ ވިޔަފާރިވެރިންނަށް ވަނީ ލިބިފައި އެވެ. މީގެ އިތުރުން މިއަހަރު އޭޝިއާގެ އިންޑަސްޓްރީ ޗެމްޕިއަންސްގެ އެވޯޑް ސްޓެލްކޯއަށްވެސް ވަނީ ލިބިގެން ގޮސްފައި އެވެ.

މެލޭޝިއާގެ މޯސް ގްރޫޕުން އިންތިޒާމްކޮށްގެން 2014 ވަނަ އަހަރުން ފެށިގެން ދެމުން އަންނަ ”އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް، ވޭތުވެދިޔަ އަހަރުތަކުގައި ދުނިޔޭގެ ފާހަގަކޮށްލެވޭ ބޮޑެތި ކުންފުނިތަކަށް ލިބިފައިވެ އެވެ. އޭގެ ތެރޭގައި ކޮކާކޯލާ, ސެމްސަންގް، އެއާ އޭޝިއާ، ޓާޓާ ގްރޫޕް، ޑީއެޗްއެލް، ކެސްޕާސްކީގެ އިތުރުން، ނެސްލޭ ފަދަ ބޮޑެތި ކުންފުނިތަކުން ވަނީ އެކި ކެޓަގަރީތަކުން މި އެވޯޑް ހޯދައިފަ އެވެ.