އަންނަ އަހަރު ނިމުމުގެ ކުރިން ސްޓެލްކޯގެ ހުރިހައި ކަސްޓަމަރުންނަށް ސްމާރޓް މީޓަރގެ ޚިދުމަތް ފޯރުކޮށްދެވޭނެ - ފަހުމީ

ސްޓެލްކޯގެ އަމާޒަކީ އެކުންފުނީގެ ހުރިހާ ކަސްޓަމަރުންނަށް އަންނަ އަހަރު ނިމުމުގެ ކުރިން ސްމާޓް މީޓަރުގެ ހިދުމަތް ފޯރުކޮށްދިނުން ކަމަށް އެކުންފުނީގެ މެނޭޖިންގ ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.

ފަހުމީ މިފަދައިން ހާމަކުރެއްވީ ރައީސް މުއިއްޒުގެ ސަރުކަރުގެ 52 ހަފްތާ ފުރުން ފާހަގަކުރުމަށް ދައުލަތުގެ މީޑީއާއިން ގެނެސްދެމުންދާ ޚާއްސަ ކަވަރޭޖުގައި ދެއްވި ޚާއްސަ އިންޓަވިއުއެއްގައި އެވެ.

އެގޮތުން ފަހުމީ ވަނީ ފާއިތުވި އެއް އަހަރު ދުވަހުގެ ތެރޭގައި އެކުންފުނިން ކުރެވުނު ބައެއް މަސައްކަތްތައް ހާމަކުރައްވާފައި އެވެ. އެގޮތުން ސްމާޓް މީޓަރުގެ ހިދުމަތް ފެށުމުގެ ތައްޔާރީތައް އެކުންފުނިން ކުރަމުންދާ ކަން ފާހަގަކުރައްވައި ފަހުމީ ވިދާޅުވީ ސްޓެލްކޯގެ އަމާޒަކީ ޒަމާނީ ހިދުމަތްތަކެއް ރައްޔިތުންނަށް ފޯރުކޮށްދިނުން ކަމަށާއި އެގޮތުން އެކުންފުނިން ހިދުމަތް ދެމުންދާ ހުރިހާ ކަސްޓަމަރުންނަށް ސްމާޓް މީޓަރުގެ ހިދުމަތް ދިނުޔަށް ދާދި އަވަހަށް މަޝްރޫއުއެއް ފެށޭނެ ކަމަށެވެ.

މި މަޝްރޫއު ފެށި އަންނަ އަހަރު ނިމުމުގެ ކުރިން ސްޓެލްކޯގެ ހުރިހައި ކަސްޓަމަރުންނަށް ސްމާރޓް މީޓަރގެ ޚިދުމަތް ފޯރުކޮށްދޭނެ ކަމަށާއި މިއަހަރު ނިމުމުގެ ކުރިން ހުޅުމާލޭ 2 ވަނަ ފިޔަވަހީގައި ސްމާރޓް މީޓަރ ހަރުކުރުމުގެ މަސައްކަތް ފަށާނެކަމަށް އޭނާ ވިދާޅުވިއެވެ.

ފަހުމީ އިތުރަށް ވިދާޅުވީ ސްމާރޓް މީޓަރ ޕްރޮޖެކްޓާއިއެކު ކަރަންޓް ބިލް ބޮޑުވެގެން ކަސްޓަމަރުންގެ ފަރާތުން އަންނަ ކަންބޮޑުވުންތަކަށް ހައްލު ލިބިގެންދާނެކަމަށެވެ.