އިތުރު 3 ރިސޯޓެއްގެ ކުނި އުކުން ވެމްކޯ އަށް!

ރިސޯޓުތަކުން ކުނި މެނޭޖު ކުރުމަށް ވެމްކޯ އިން ތަޢާރަފުކުރި ”ފަތުރުވެށި“ ރިސޯޓު ވޭސްޓު ކަލެކްޝަން ހިދުމަތް ހޯދުމަށް އިތުރު ތިން ރިސޯޓަކާއެކު އެއްބަސްވުން ގާއިމްކޮށްފި އެވެ.

ވެމްކޯ އިން އެންމެ ފުރަތަމަ “ފަތުރުވެށި’’ ހިދުމަތް ތައާރަފު ކޮށްފައިވަނީ މިއަހަރުގެ ޖުލައި މަހުގެ 1 ވަނަ ދުވަހުގައެވެ. އެއީ ޒޯން 2 ގައި ހިމެނޭ ނ.، ރ.، ބ. އަދި ޅ. އަތޮޅުގެ ކޮރާކޮރާ ރިސޯޓާއި، އަލިލާކޮޓެއިފަރު އަދި ނޮކް މޯލްޑިވްސް އާއެކުގައެވެ.

މިއަދު ވެމްކޯގެ ފަރާތުން މި ހިދުމަތް ތަޢާރަފުކޮށްފައިވަނީ ޒޯން 3 ގައި ހިމެނޭ އއ.، އދ.، ކ. އަދި ވ. އަތޮޅުގެ ރިސޯޓުތަކަށެވެ.

އެގޮތުން ”ފަތުރުވެށި“ ހިދުމަތް ވެމްކޯގެ ފަރާތުން ދިނުމަށް މިއަދު ސޮއިކުރެވުނު ރިސޯޓުތަކަކީ މަލާހިނި ކުޑަބަނޑޮސް މޯލްޑިވްސް، ޖުމައިރާ އޮޅަހަލި މޯލްޑިވްސް، އަދި މޫވްއެންޕިކް ކުރެދިވަރު މޯލްޑިވްސް އެވެ. މީގެ އިތުރުން އިތުރު ދެ ރިސޯޓެއްގައި މި ހިދުމަތް ތަޢާރަފް ކުރުމަށް ސޮއި ކުރުމަށް ހަމަޖެހިފައިވަނީ އެ ރިސޯޓުތަކުގައެވެ.

މިއަދު ސޮއިކުރެވުނު ރިސޯޓުތަކާއެކު ޖުމްލަ އަށް ރިސޯޓަކަށް ވެމްކޯގެ މި ހިދުމަތް ވަނީ ފުޅާކުރެވިފައެވެ. އަދިވެސް އިތުރު ރިސޯޓްތަކާއެކު މި ހިދުމަތް ދިނުމަށް މަޝްވަރާކުރެވެމުން އަންނަކަމަށްވެސް ވެމްކޯއިން ބުނެފައިވެއެވެ.

ވެމްކޯ އިން ބުނީ މި ހިދުމަތަކީ އެކުންފުނިން މާލީ ގޮތުން ސަރުކާރަށް ބަރޯސާނުވެ ފައިދާވާ ކުންފުންޏަކަށް ހެދުމަށް ކުރަމުން އަންނަ މަސައްކަތުގެ ދަށުން ބޮޑު އާމްދަނީއެއް ހޯދޭނެ ހިދުމަތެއް ކަމަށެވެ.