އިންތިޚާބީ ގާނޫނާ ހިލާފުވި ކަމުގެ ކުށް ސާބިތުވެ، ދެކުނު ކޮރެއާގެ އިދިކޮޅު ލީޑަރަށް އެއް އަހަރު ދުވަހުގެ ޖަލު ހުކުމެއް!

ދެކުނު ކޮރެއާގެ އިދިކޮޅު ލީޑަރު ލީ ޖޭ-މިޔުންގް އަށް ކުރިޔަށް އޮތް ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލިއްޖެ އެވެ.

2027 ވަނަ އަހަރު ބާއްވާ ދެކުނު ކޮރެއާގެ ރިޔާސީ އިންތިހާބުގައި ވާދަކުރުމުގެ ފުރުސަތު ލީ ޖޭ-މިޔުންގް އަށް ގެއްލުނީ އެގައުމުގެ އިންތިޚާބީ ގާނޫނާ ހިލާފުވި ކަމުގެ ކުށް ސާބިތުވެ، އެއް އަހަރު ދުވަހުގެ ޖަލު ހުކުމެއް އިއްވުމާއި ގުޅިގެންނެވެ.

2022 ވަނަ އަހަރުގެ ރިޔާސީ އިންތިހާބުގެ ކުރިން ޕަބްލިކް އޮފިޝަލް އިންތިހާބާ ބެހޭ ގާނޫނާ ހިލާފަށް ދޮގު ވާހަކަތަކެއް ދެއްކެވި ކަމަށް ޑިމޮކްރެޓިކް ޕާޓީ (ޑީޕީ)ގެ ލީޑަރުގެ މައްޗަށް ކުށް ސާބިތުވާ ކަމަށް ސޯލް ސެންޓްރަލް ޑިސްޓްރިކްޓް ކޯޓުން ހުކުމްކުރީ މިއަދު އެވެ.

އެ ހުކުމް ދަމަހައްޓައިފިނަމަ ލީއަށް މަޖިލީހުގެ ގޮނޑި ގެއްލޭނެ ކަމަށާއި ކުރިއަށް އޮތް ފަސް އަހަރަށް ލީއަށް އާންމު މަގާމަށް ވާދަނުކުރެވޭނެ ކަމަށް ގާނޫނުގައި ބުނެފައިވާތީ، 2027 ވަނަ އަހަރު ބާއްވާ ރިޔާސީ އިންތިހާބުގައި ލީ އަށް ވާދަނުކުރެވޭނެ އެވެ.

ހުކުމް އިއްވި އަޑުއެހުމަށް ފަހު ނޫސްވެރިންނަށް މައުލޫމާތު ދެއްވަމުން ލީ ވިދާޅުވީ ކޯޓުގެ ނިންމުން އިސްތިއުނާފު ކުރައްވާނެ ކަމަށެވެ.

"އަޅުގަނޑު މިއަދު އިއްވި ހުކުމް އިސްތިއުނާފު ކުރާނަން. އަސާސީ ހަގީގަތްތަކުން ފަށައިގެން މިއީ ގަބޫލުކުރަން ދަތި ނިންމުމެއް،" ނޫސްވެރިންނާ ވާހަކަ ދައްކަވަމުން އޭނާ ވިދާޅުވި އެވެ.

ލީއަށް ތާއީދުކުރާ މީހުންނާއި ފާޑުކިޔާ ފަރާތްތަކުން ކޯޓު ކައިރީގައި ވަނީ ހުކުމް އިއްވި ވަގުތު ބޮޑެތި މުޒާހަރާތަކެއް ކުރިޔަށް ގެންގޮސްފައި އެވެ.

2022 ވަނަ އަހަރުގެ އިންތިޚާބުގައި ރައީސް ޔޫން ސުކް-ޔޯލް އަތުން ކުޑަ ފަރަގަކުން ބަލިވި ލީގެ މައްޗަށް ރިޝްވަތާއި ކޮރަޕްޝަންގެ ބޮޑެތި ޖިނާއީ ދައުވާތަކެއް އުފުލުމަށް ފަހު އޭނާގެ މައްޗަށް މަދުވެގެން ހަތަރު ޝަރީއަތެއް ކުރިއަށް ގެންދަން ވަނީ ނިންމައިފަ އެވެ.

ހުކުރު ދުވަހު ކޯޓުން ކުރި ހުކުމުގައި ބުނެފައި ވަނީ ތަރައްގީގެ މަޝްރޫއެއް ހިންގެވުމާ ހަވާލުވެ ހުންނެވި ސިޓީގެ އޮފިޝަލަކާ ނޭނގޭ ކަމަށް ބުނެ 2021 ވަނަ އަހަރު ރިޔާސީ ކެންޑިޑޭޓެއްގެ ހައިސިއްޔަތުން ލީ ދޮގު ވާހަކަތަކެއް ދައްކަވައި އިންތިހާބާ ބެހޭ ގާނޫނާ ހިލާފުވެފައިވާ ކަމަށެވެ.