ރާމޯސްއަށް ރެއާލް މެޑްރިޑުން ދެވަނަ ފުރުސަތެއް ނުލިބުނު

ސްޕެއިންގެ ތަޖުރިބާކާރު ޑިފެންޑަރު ސާޖިއޯ ރާމޯސް ފްރީ އެޖެންޓެއްގެ ގޮތުގައި ކުރީގެ ކުލަބު ރެއާލް މެޑްރިޑާއި ގުޅުމަށް އެދި ހުށަހެޅުމުން ރެއާލް މެޑްރިޑުން އެހުށަހެޅުން ގަބޫލްނުކޮށް ރާމޯސްއަށް ދެވަނަ ފުރުސަތެއް ދިނުމަށް ދެކޮޅުހަދާފައިވާކަމަށް ސްޕެއިންގެ މީޑިއާތަކުން ރިޕޯޓްކޮށްފިއެވެ.

ރެއާލް މެޑްރިޑާއެކު ގިނަ ކާމިޔާބީތަކެއް ހޯދާފައިވާ އުމުރުން 38 އަހަރުގެ ޑިފެންޑަރު މިދިޔަ އަހަރު ކުޅުނު ސެވިއްޔާއެކު ހަދާފައިވާ އެއްބަސްވުން ޖުލައި އެކަކަށް ހަމަވެފައިވާއިރު، މިވަގުތު ރާމޯސް ހުރީ ފްރީ އެޖެންޓެއްގޮތުގައި ކުލަބެއް ނެތިއެވެ. އަދި ކުލަބުގެ ލެޖެންޑުންނާއި ސަޕޯޓަރުން އެދެމުންދަނީ ރާމޯސް އަލުން ރެއާލް އާއި ގުޅުމަށެވެ.

މިވަގުތު ރެއާލް މެޑްރިޑަށް އަނިޔާގެ ގިނަ މައްސަލަތަކެއް ކުރިމަތިވެފައިވާއިރު، އޭގެތެރޭގައި ފުރަތަމަ އެގާރައިގައި ހިމެނޭ މުހިންމު ހަތަރު ޑިފެންޑަރުން ކަމަށްވާ، އެޑާ މިލީޓޯ، ޑެނީ ކަވަހާލް އަދި މެންޑީގެ އިތުރުން ޑޭވިޑް އަލަބާ ވެސް ހުރީ އަނިޔާގައެވެ. އަދި މީގެ އިތުރުން ރެއާލް އެންމެފަހުން ކުޅުނު މެޗުގައި ލޫކަސް ވަސްކޭޒްއަށް ވެސް ވަނީ އަނިޔާވެ މަހެއްހާ ދުވަހު ކުޅުމައި ދުރުގައި ހުންނަންޖެހިފައެވެ.

ރެއާލް މެޑްރިޑް ސްކޮޑުގައި މިވަގުތު ސީނިއާ ޑިފެންޑަރަކަށް ހުރި ހަމައެކަނި ކުޅުންތެރިއަކީ އެންޓޯނިއޯ ރުޑިގާ އެވެ. މިއާއެކު ޖެނުއަރީ ޓްރާންސްފާ މާކެޓުގައި ސްކޮޑް ވަރުގަދަކުރުމުގެ ގޮތުން އެޓީމުން އަންނަނީ އިތުރު ދެ ޑިފެންޑަރުން ހޯދުމުގެ މަސައްކަތް ކުރަމުންނެވެ. އެގޮތުން ރެއާލް މެޑްރިޑުން ފާރަލަމުން އަންނަ ކުޅުންތެރިންގެ ތެރޭގައި ލިވަޕޫލްގެ އެލެގްޒެންޑާ އާނޯލްޑްގެ އިތުރުން، ބަޔާން މިޔުނިކްގެ އަލްފަންސޯ ޑޭވިސް ހިމެނޭކަމަށް ސްޕެއިންގެ މީޑިއާތަކުން ރިޕޯޓްކޮށްފައިވެއެވެ.