ބައިޑަންއާއި ޓްރަމްޕު ބައްދަލުކުރައްވައިފި

އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް އާއި މިހާރުގެ ރައީސް ޖޯ ބައިޑެން ބައްދަލުކުރައްވައިފި އެވެ.

ބުދަ ދުވަހު އެމެރިކާގެ ރިޔާސީ ގަނޑުވަރު, ވައިޓް ހައުސްގެ އޯވަލް އޮފީހުގައި ޖޯ ބައިޑަންއާއި ޓްރަމްޕު ބައްދަލުކުރައްވާފައިވަނީ ވެރިކަމުގެ ޓްރާންސިޝަން މަރުހަލާތައް ކުރިޔަށްދާ ދަނޑިވަޅެއްގައި އެވެ. މީގެ ކުރިންވެސް އިންތިހާބި ރައީސުން ވަނީ މިފަދައިން ވެރިކަމުން ފައިބާވަޑައިގަންނަވާ ރައީސުންނާއި އެކު ރަސްމީ ބައްދަލުވުންތައް ބާއްވާފައި އެވެ.

"ސުލްހަވެރި ޓްރާންސިޝަނަކަށް" އުއްމީދު ކުރައްވާ ކަމަށް ބައިޑަން ޓްރަމްޕަށް ވިދާޅުވި އިރު، ކެމެރާތަކުގެ ކުރިމަތީގައި އެ ދެ ބޭފުޅުން ވަނީ އެކަކު އަނެކަކަށް ސަލާމްކުރައްވާފައި އެވެ.,

"އަޅުގަނޑު އުންމީދު ކުރަނީ ސްމޫތު ޓްރާންސިޝަނެއް އޮންނާނެ ކަމަށް، އަޅުގަނޑުމެންނަށް ކުރެވެން ހުރި ހުރިހާ މަސައްކަތެއް ކޮށް، ތިޔަބޭފުޅުންނަށް ޖާގަ ދެވޭތޯ، ބޭނުންވާ ކަންކަން ހަމަޖެއްސުމަށް. އޭގެ ތެރެއިން ބައެއް ވާހަކަތައް ދެއްކުމުގެ ފުރުސަތު މިއަދު ލިބޭނެ،" ބައްދަލުވުން ފެށުމުގެ ކުރިން ބައިޑެން ވިދާޅުވި އެވެ.

އަންނަ ޖެނުއަރީ މަހުގެ 20 ވަނަ ދުވަހު އިންތިހާބީ ރައީސް ހުވާ ކުރެއްވުމުގެ ގާތްގަނޑަކަށް ދެ މަހެއްހާ ދުވަސް ކުރިން ބައިޑަން އާއި ޓްރަމްޕް ގެ ބައްދަލުވުމުގައި މުހިންމު ގިނަ ކަންތައްތަކާ ބެހޭ ގޮތުން މަޝްވަރާ ކުރައްވާފައިވާ ކަމަށް ރިޕޯޓުތައް ބުނެއެވެ.

ބައިޑެންގެ ނޭޝަނަލް ސެކިއުރިޓީ އެޑްވައިޒަރު ޖޭކް ސުލިވަން މި ބައްދަލުވުމުގެ ކުރިން ވިދާޅުވީ ޔޫރަޕާއި އޭޝިއާ އަދި މެދުއިރުމަތީގެ ގައުމުތަކުގައި ހިނގަމުންދާ ކަންކަމުގެ އިތުރުން ދާޚިލީ އަދި ހާރިޖީ ސިޔާސަތުގެ އެންމެ އިސް މައްސަލަތަކާ އެ ބޭފުޅުން މަޝްވަރާކުރައްވާނެ ކަމަށެވެ.

ބައިޑަން އާއި ޓްރަމްޕު ފާހަގަކުރެވިގެން ގޮސްފައިވަނީ ވެރިކަމުގެ ދުވަސްވަރު އެންމެ ބޮޑު ވާދަވެރިންނަށެވެ. އެގޮތުން ބައިޑެންގެ ސަރުކާރަށް ޓްރަމްޕު ވަނީ ބޮޑެތި ފާޑުކިޔުންތަކެއް ރައްދުކުރައްވާފައި އެވެ. އަދި ބައިޑެން ވަނީ ރިޔާސީ ކެމްޕެއިންގައި ޓްރަމްޕާއި ދެކޮޅަށް ބޮޑެތި އެންޓި ކެމްޕެއިންތަކެއް ކުރައްވާފައި އެވެ.

ނިމިދިޔަ ރިޔާސީ އިންތިހާބުގައި ބައިޑެން ވާދަނުކުރެއްވި ނަމަވެސް ބައިޑެންގެ ތާއީދާއި ވާދަކުރެއްވީ އެގައުމުގެ އަދި ބައިޑެންގެ ހިނގަމުންމިދާ ވެރިކަމުގެ ނައިބު ރައީސް ކަމަލާ ހެރިސް އެވެ. ކަމަލާ އާއި ވާދަކުރައްވައި ޓްރަމްޕު އިންތިހާބު ކާމިޔާބުކުރީ ފަސޭހަ ކަމާއި އެކުގައި އެވެ.