ތަފާތުބޮޑު ނަތީޖާއަކުން ނައިސް ބަލިކޮށް ޓީރެކްސް އިން މުބާރާތް ނިންމާލީ ގުރޫޕްގެ ތިންވަނައިގައި

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ހައެއްގައި މިރޭ ކުޅުނު ދެވަނަ މެޗުގައި ނައިސް ސްޕޯޓްސް ކުލަބާއި ޓީރެކްސް ވާދަކުރި މެޗު ފަސޭހަކަމާއެކު 30-7 ގެ ތަފާތުބޮޑު ނަތީޖާއަކުން ޓީރެކްސް ކާމިޔާބުކޮށްފިއެވެ.

މުބާރާތުގައި ނައިސް ކުޅުނު ފުރަތަމަ މެޗުގައި ހިޔާ ސްޕޯޓްސް ކުލަބު އަތުން 5-29 ގެ ނަތީޖައަކުން ބަލިވިއިރު، ދެވަނަ މެޗުގައި އީގަލްސް އަތުން އެޓީމު ބަލިވީ 19-7 ގެ ނަތީޖާއަކުންނެވެ. އަދި އެޓީމުގެ ތިންވަނަ މެޗުގައި ގަލަކްޓިކޯ އަތުން ބަލިވީ 30-2 ގެ ތަފާތުބޮޑު ނަތީޖާއަކުންނެވެ.

މީގެ އިތުރުން ޓީރެކްސްގެ ފުރަތަމަ މެޗުގައި ގަލަކްޓިކޯ އަތުން 10-16 ގެ ނަތީޖާއަކުން ބަލިވިއިރު، ދެވަނަ މެޗުގައި ހިޔާ އަތުން އެޓީމު ބަލިވީ 6-25 ގެ ތަފާތުބޮޑު ނަތީޖާއަކުންވެ. ނަމަވެސް ތިންވަނަ މެޗުގައި އެޓީމުން ވަނީ 17-14 ގެ ނަތީޖާއަކުން އީގަލްސް ބަލިކޮށްފައެވެ.

މުޅި މެޗުގައި ވެސް މޮޅަށްކުޅެ ޓީރެކްސް އިން މެޗު ޑޮމިނޭޓްކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 13 ލަނޑުގެ ލީޑަކާއެކު 16-3 ގެ ތަފާތުބޮޑު ނަތީޖާއަކުން ޓީރެކްސް ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު 14 ލަނޑު ކާމިޔާބުކުރިއިރު، މިހާފުގައި ނައިސްއަށް ކާމިޔާބިކުރެވުނީ އެންމެ ހަތަރު ލަނޑެވެ. އަދި މިމެޗުގެ މޮޅުކުޅުންތެރިއަކަށް ހޮވުނީ ޓީރެކްސްގެ އައުޝާ ނޫރުލް ސޮބާހް އެވެ. އޭނާ ވަނީ މިމެޗުގައި އެޓީމަށް 11 ލަނޑު ކާމިޔާބުކޮށްދީފައެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ލިބުނު ހަ ޕޮއިންޓާއެކު ޓީރެކްސް އިން މުބާރާތް ނިންމާލީ ގުރޫޕްގެ ތިންވަނައިގައެވެ. އަދި މިމެޗުން ބަލިވި ނައިސް ކުޅުނު ހަތަރު މެޗުން ވެސް ބަލިވެފައިވާއިރު، އެޓީމުން މުބާރާތް ނިންމާލީ ޕޮއިންޓެއް ނުލިވި ގުރޫޕްގެ ފުލުގައި އޮވެއެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.