ފިއޮންޓީ ބަލިކޮށް ލަޔަންސް އިން މުބާރާތް ނިންމާލީ މޮޅަކާއެކު

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ފަހެއްގައި މިރޭ ކުޅުނު ފުރަތަމަ މެޗުގައި ލަޔަންސް ރެކްރިއޭޝަން ކުލަބާއި ފިއޮންޓީ ސްޕޯޓްސް ކުލަބު ވާދަކުރި މެޗު 17-7 ގެ ނަތީޖާއަކުން ލަޔަންސް ކާމިޔާބުކޮށްފިއެވެ.

މުބާރާތުގައި ލަޔަންސް ކުޅުނު ފުރަތަމަ މެޗުގައި ޔުނިޓީ ސްޕޯޓްސް ކުލަބު އަތުން 2-18 ގެ ނަތީޖައަކުން ބަލިވިއިރު، ދެވަނަ މެޗުގައި ފުލައިން އީގަލް ސްޕޯޓްސް އެކަޑަމީ އަތުން އެޓީމު ބަލިވީ 8-7 ގެ ނަތީޖާއަކުންނެވެ. އަދި އެޓީމުގެ ތިންވަނަ މެޗުގައި ނޯވާ ސްޕޯޓްސް ކުލަބު އަތުން ބަލިވީ 12-9 ގެ ނަތީޖާއަކުންނެވެ.

މީގެ އިތުރުން ފިއޮންޓީގެ ފުރަތަމަ މެޗުގައި ނޯވާ އަތުން 10-16 ގެ ނަތީޖާއަކުން ބަލިވިއިރު، ދެވަނަ މެޗުގައި ޔުނިޓީ އަތުން އެޓީމު ބަލިވީ 6-30 ގެ ތަފާތުބޮޑު ނަތީޖާއަކުންވެ. އަދި އެޓީމުގެ ތިންވަނަ މެޗުގައި ފެސާ އަތުން ބަލިވީ 1-20 ގެ ތަފާތުބޮޑު ނަތީޖާއަކުންނެވެ.

މެޗުގެ ފުރަތަމަ ހާފުގައި މޮޅަށް ކުޅެ ލަޔަންސް އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުންނިމިގެންދިޔައީ ހަތް ލަނޑުގެ ލީޑަކާއެކު 10-3 ގެ ނަތީޖާއަކުން ލަޔަންސް ކުރީގައި އޮވެގެންނެވެ. އަދި ދެވަނަ ހާފުގައި އެޓިމުން އިތުރު ހަތް ލަނޑު ކާމިޔާބުކުރިއިރު، މިހާފުގައި ފިއޮންޓީއަށް ކާމިޔާބުކުރެވުނީ ހަތަރު ލަނޑެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ލަޔަންސްގެ އައިޝަތު ޝިއުރާ ނަސީރު އެވެ. އޭނާ ވަނީ މިމެޗުގައި އެޓީމަށް 10 ލަނޑު ކާމިޔާބުކޮށްދީފައެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ލިބުނު ތިން ޕޮއިންޓާއެކު ލަޔަންސް އިން މުބާރާތް ނިންމާލީ ގުރޫޕްގެ ހަތަރުވަނައިގައެވެ. އަދި މިމެޗުން ބަލިވި ފިއޮންޓީ ކުޅުނު ހަތަރު މެޗުން ވެސް ބަލިވެފައިވާއިރު، އެޓީމުން މުބާރާތް ނިންމާލީ ޕޮއިންޓެއް ނުލިވި ގުރޫޕްގެ ފުލުގައި އޮވެއެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.