އެޗްވައިސީ ބަލިކޮށް ގުރޫޕްގެ އެއްވަނަ ޓީމުގެ ގޮތުގައި ޒެފްރޯލް ކުއާޓާ ފައިނަލަށް

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ހަތަރެއްގައި މިއަދު ހަވީރު ކުޅުނު ފުރަތަމަ މެޗުގައި ހުޅުމާލޭ ޔޫތް ކުލަބު (އެޗުވައިސީ) އާއި ޒެފްރޯލް ސްޕޯޓްސް ކުލަބު ކުޅުނު މެޗު ވާދަވެރި ކުޅުމަކަށްފަހު 13-20 ގެ ނަތީޖާއަކުން ކާމިޔާބުކޮށް ގުރޫޕްގެ އެއްވަނަ ޓީމުގެ ގޮތުގައި ޒެފްރޯލް މުބާރާތުގެ ކުއާޓާ ފައިނަލުން ޖާގަހޯދައިފިއެވެ.

މުބާރާތުގައި ޒެފްރޯ ކުޅުނު ފުރަތަމަ މެޗުގައި ހަސްކީސް ސްޕޯޓްސް ކުލަބު އަތުން 41-3 ގެ ތަފާތުބޮޑު ނަތީޖައަކުން މޮޅުވިއިރު، ދެވަނަ މެޗުގައި ޕްރޯ އެސްއޭ އަތުން އެޓީމު މޮޅުވީ 21-8 ގެ ނަތީޖާއަކުންނެވެ. އަދި އެޗުވައިސީގެ ފުރަތަމަ މެޗުގައި ޕްރޯ އެސްއޭ އަތުން 15-14 ގެ ނަތީޖައަކުން މޮޅުވިއިރު، ދެވަނަ މެޗުގައި ހަސްކީސް އަތުން އެޓީމު މޮޅުވީ 4-48 ގެ ތަފާތުބޮޑު ނަތީޖާއަކުންވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ފޯރިގަދަ އަވަސް ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ އަށް ލަނޑުގެ ލީޑަކާއެކު 5-13 ގެ ނަތީޖާއަކުން ޒެފްރޯލް ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ހަތް ލަނޑު ކާމިޔާބުކުރިއިރު، މިހާފުގައި އެޗުވައިސީ އިން ވަނީ އިތުރު އަށް ލަނޑު ކާމިޔާބުކޮށްފައެވެެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޒެފްރޯލްގެ ފާތުމަތު ލީމް ބިންތް ޔާސިރު އެވެ. އޭނާ ވަނީ މިމެޗުގައި އެޓީމަށް ހަ ލަނޑު ކާމިޔާބުކޮށްދީފައެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ތިން މެޗުން ލިބުނު 9 ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި ޒެފްރޯލުން މުބާރާތުގެ ކުއާޓާ ފައިނަލުން ޖާގަހޯދާފައެވެ. އަދި މިމެޗުން ބަލިވި އެޗްވައިސީ ކުޅުނު ތިން މެޗުން ލިބުނު ހަ ޕޮއިންޓާއެކު އެޓީމު މިވަގުތު އޮތީ ގުރޫޕްގެ ދެވަނައިގައެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.