--
ރައީސް ޑރ މުހައްމަދު މުއިއްޒުގެ ވެރިކަމުގެ އެންމެ ބޮޑު ތަރައްޤީގެ މަޝްރޫއު ކަމަށްވާ ރަސްމާލެ މަޝްރޫއުއަށް ފުޅިދިއްގަރު ފަޅު އަލުން ހިއްކަން ފަށައިފި އެވެ.
ރަސްމާލެ މަޝްރޫއުގެ ނަމުގެ ހިންގާ ތަރައްޤީގެ މި ބިޔަ މަޝްރޫއުއަށް ފުށިދިއްގަރު ފަޅު ހިއްކުމުގެ މަސައްކަތް ސަރުކާރުން ފުރަތަމަ ފެށީ މިދިޔަ އަހަރުގެ ޑިސެމްބަރު މަހުގެ 18 ގައެވެ. ނަމަވެސް ރަސްމާލެ މަޝްރޫއު ހަވާލުކުރީ ކޮންޓްރެކްޓާ ފައިނޭންސް އުސޫލުން ކަމަށާއި އެ މަސައްކަތް ހަވާލުކޮށްފައިވާ ކުންފުނިން މަސައްކަތް ފެށުމަށް ފަހު، މަޝްރޫއު ކުރިއަށް ގެންދަން ބޭނުންވާ ފައިސާ ނުހޯދިގެން މަޝްރޫއު މަޑުޖެހުނު ކަމަށް ސަރުކާރުން ވަނީ ހާމަކޮށްފައެވެ. މި މަޝްރޫއު ސަރުކާރުން ހަވާލުކުރީ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާއި އެވެ.
މި މަޝްރޫއު ކުރިޔަށް ގެންދިޔުމަށް ދިމާވި ދަތިތައް ހައްލުކޮށް ފުށިދިއްގަރު ފަޅު ހިއްކުމުގެ މަޝްރޫއު އަލުން ފެށީ މިއަދު އެވެ. މިކަން ހައުސިންގ ޑިވެލޮޕްމެންޓު ކޯޕަރޭޝަނުން މިއަދު ވަނީ ހާމަކޮށްފައެވެ. އަދި ފަޅު ހިއްކުމުގެ މަސައްކަތް ފެށިގެން ކުރިޔަށްދާގޮތުގައި ފޮޓޯއާއި ވީޑިއޯވެސް ވަނީ ހިއްސާކޮށްފައި އެވެ.
ރަސްމާލެ މަޝްރޫއުއަށް ފުޅިދިއްގަރު ފަޅުން، 1153 ހެކްޓަރުގެ ބިން (ހުޅުމާލޭގެ ގާތްގަޑަކަށް ތިން ގުނަ ބޮޑު ސަރަޙައްދެއް) ހިއްކާނެއެވެ. މިއީ މިހާތަނަށް ރާއްޖޭގައި ހިންގާ އެންމެ ބޮޑު ބިން ހިއްކުމުގެ މަޝްރޫޢެވެ.
ރަސްމާލެ ވެގެންދާނީ ރާއްޖެއަށް ދިމާވެފައިވާ އެންމެ ބޮޑު މައްސަލަ ކަމަށްވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނެވޭނެ މަޝްރޫއުއަކަށް ކަމަށް ރައީސް މުއިއްޒު ވަނީ ވިދާޅުވެފައި އެވެ. އަދި މި މަޝްރޫޢު ނިމިގެން ދާއިރު ގޯއްޗާއި ފްލެޓް ހިމެނޭގޮތަށް 65,000 ހައުސިންގ ޔުނިޓް ތަރައްޤީ ކުރުމަށް ސަރުކާރުން ރާވާފައިވެއެވެ.
ފަހުގެ
