ގުރޫޕްގެ އެއްވަނަ އެލްކިޔު ހޯދިއިރު، ޕޮލިސް ކުލަބަށް އަމިއްލަ ބާރު ގެއްލިއްޖެ

މިހާރު ކުރިއަށްދާ ގައުމީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް އެކެއްގައި މިއަދު ހަވީރު ކުޅުނު ދެވަނަ މެޗުގައި އެލްކިޔު ސްޕޯޓްސް ކުލަބާއި ޕޮލިސް ކުޅުނު މެޗު ވާދަވެރި ކުޅުމަކަށްފަހު 10-12 ގެ ނަތީޖާއަކުން ކާމިޔާބުކޮށް އެލްކިޔު ގުރޫޕްގެ އެއްވަނަ ޓީމުގެ ގޮތުގައި ކުއާޓާ ފައިނަލް ޔަގީންކޮށްފިއެވެ

މުބާރާތުގައި ޕޮލިސް ކުޅުނު ފުރަތަމަ މެޗުގައި ކުޑަހުވަދޫ ސްޕޯޓްސް ކުލަބު އަތުން 14-13 ގެ ނަތީޖާއަކުން ބަލިވި ނަމަވެސް ދެވަނަ މެޗުގައި ޕާރލްސް ސްޕޯޓްސް ކުލަބު އަތުން އެޓީމު ވަނީ 8-19 ގެ ނަތީޖާއަކުން މޮޅުވެފައެވެ. އަދި އެލްކިޔުގެ ފުރަތަމަ މެޗުގައި ޕާރލްސް އަތުން 14-17 ގެ ނަތީޖާއަކުން މޮޅުވިއިރު، ދެވަނަ މެޗުގައި ކުޑަހުވަދޫ އަތުން އެޓީމު މޮޅުވީ 11-23 ގެ ނަތީޖާއަކުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގެ ކުޅުން ނިމިގެންދިޔައީ އެއްލަނޑުގެ ލީޑަކާއެކު 4-5 ގެ ނަތީޖާއަކުން އެލްކިޔު ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ހަތް ލަަނޑު ކާމިޔާބުކުރިއިރު، މިހާފުގައި ޕޮލިސް ޓީމަށް ކާމިޔާބުކުރެވުނީ ހަ ލަނޑެވެ.

އެގޮތުން މިމެޗުގައި އެލްކިޔުގެ އާމިނަތު ރާއިދަ އަދި އައިޝަތު އަމާނާ މިއިން ކޮންމެ ކުޅުންތެރިއަކު ހަތަރު ލަނޑު ކާމިޔާބުކުރިއިރު، އެޓީމުގެ ފާތިމަތު ރަމްޒިއްޔާ ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ ސިއްތި ސަމީނާ އެވެ.

މީގެ އިތުރުން މިމެޗުގައި ޕޮލިސް ޓީމުގެ އައިޝަތު ފައިހާ މުސާ ފަސް ލަނޑު ކާމިޔާބުކުރިއިރު، އެޓީމުގެ އައިޝަތު ސަހުޝަން ވަނީ ތިން ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ އައިޝަތު ހަމްޒާ ނިޔާޒު އަދި ޝަހުމާ މުހައްމަދު ރަޝީދު މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެލްކިޔުގެ އާމިނަތު ރާއިދާ އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ ނުވަ ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި އެލްކިޔު ކުއާޓާ ފައިނަލުން ޖާގަހޯދިއިރު، މިމެޗުން ބަލިވި ޕޮލިސް ކުލަބު ގުރޫޕް ސްޓޭޖުގައި ކުޅުނު ތިން މެޗުން ލިބުނު ތިން ޕޮއިންޓާއެކު އެޓީމު މިވަގުތު އޮތީ ގުރޫޕްގެ ދެވަނައިގައެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގައި 26 ޓީމަކުން ބައިވެރިވެފައިވާއިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 26 ޓީމު ހަ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ޓީމުގެ އިތުރުން ،ހަ ގުރޫޕްގެ ދެވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށް ވެސް މުބާރާތުގެ ކުއާޓާ ފައިނަލުން ފުރުސަތު ލިބިގެންދާނެއެވެ.