ވެމްކޯގެ ވިލިމާލެ މުވައްޒަފުންނަށް އަރުތަ ޕްރޮގްރާމް ކުރިއަށް ގެންގޮސްފި

'އަރުތަ' ޕްރޮގްރާމް ވޭސްޓު މެނޭޖްމަންޓުގެ ވިލިމާލެ މުވައްޒަފުންނަށް ކުރިއަށް ގެންގޮސްފިއެވެ.

މިއީ ކުށްމަދު އަމާން ރައްކާތެރި މުޖުތަމައެއް ބިނާކުރުމަށްޓަކައި ފަރުދީގޮތުން އަދާކުރެވިދާނެ ޒިންމާ އަދާކުރުމަށް ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުން ހޭލުންތެރިކުރުވުމަށް ކުރިއަށްގެންދާ ޕްރޮގްރާމެކެވެ.

ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި މާލެ ސިޓީ ކައުންސިލު ގުޅިގެން މި މަހު 29ވަނަ ދުވަހު ވިލިމާލޭގައި ކުރިއަށް ގެންދިޔަ މި ޕްރޮގްރާމުގައި އެކި ދާއިރާތަކުން މައުލޫމާތު ހިއްސާކޮށްފައިވެއެވެ.

އެގޮތުން ދިރިއުޅުމުގެ އަދަބުތަކާއި އޮފީސް މާހައުލުގައި ދިމާވާ ކަންކަމާ ކުރިމަތިލައި މައްސަލަތައް ހައްލުކުރުމަށް މަސައްކަތްކުރާނެ ގޮތްތަކުގެ މައުލޫމާތާއި ލީޑަރެއްގެ ގޮތުގައި މަސައްކަތްކުރާނެ ގޮތްތަކުގެ މައުލޫމާތު ހިއްސާކޮށްފައިވެއެވެ.

އަދި އޮފީސް މާހައުލުގައި ދިމާވާ މައްސަލަތައް ހައްލުކުރާނެ ގޮތްތަކާއި އަމިއްލަ ނަފުސު ދެނެގަނެ އިތުބާރުކުރާނެ ގޮތްތަކުގެ މައުލޫމާތު ހިއްސާކޮށްފައިވެއެވެ. އަދި ގެވެށި އަނިޔާ، ޖިންސީ ފުރައްސާރަ ނުވަތަ ޖިންސީ ގޯނާގެ އަމަލެއް ދިމާވެއްޖެނަމަ އަމަލުކުރާނެ ގޮތްތަކާއި މިފަދަ ކަންކަން ސިއްރުނުކުރުމަށާއި މިފަދަ ކަންކަމުން ރައްކާތެރިވުމުގެ މުހިންމުކަމާ ގުޅޭގޮތުން ވެސް މައުލޫމާތު ހިއްސާކޮށްފައިވެއެވެ.

އޭގެ އިތުރުން، އެއްގަމު ދަތުރުފަތުރުގެ ގާނޫނާއި ގަވާއިދުތަކާއި އެއްގަމު އުޅަނދު ދުއްވުމުގައި ސަމާލުކަންދޭންޖެހޭ ކަންކަމާއި އެކްސިޑެންޓުތަކުން ރައްކާތެރިވުމަށާއި، މަގުމަތީގައި ދިމާވާ އެހެނިހެން ހާދިސާތައް މަދުކުރަން މަސައްކަތްކުރާނެ ގޮތްތަކުގެ މައުލޫމާތު ހިއްސާކޮށްފައިވެއެވެ.

ހަމައެހެންމެ ދަރީން ތަރުބިއްޔަތުކުރުމުގައި ސަމާލުކަންދޭންޖެހޭ ކަންކަމާއި ނަމޫނާ ބެލެނިވެރިޔަކަށްވުމަށް، ބެލެނިވެރިޔާގެ ކިބައިގައި ހުންނަންވާނެ ސިފަތަކާއި ރަނގަޅު ބެލެނިވެރިއެއްގެ ދައުރަކީ ކޮބައިކަން އަދި އެކި ގޮތްގޮތުން ކުރިމަތިވާ ނޭދެވޭ ކަންކަމުން ރައްކާތެރިވުމަށް މަސައްކަތްކުރާނެ ގޮތްތަކުގެ މައުލޫމާތު ވެސް ހިއްސާކޮށްފައިވެއެވެ.

އަދި ބުއްދިވެރި އިންސާނެއްގެ ސިކުނޑިން ވިސްނާނެ ގޮތްތަކުގެ މައުލޫމާތާއި ތޫނުފިލި ވިސްނުމުގައި ދިމާވާ ގޮންޖެހުންތަކުގެ މައުލޫމާތުގެ އިތުރުން ތޫނުފިލި ވިސްނުން ތަރައްގީކުރާނެ ގޮތްތަކުގެ މައުލޫމާތު ހިއްސާކޮށްފައިވެއެވެ.

މި ޕްރޮގްރާމް ނިންމައިލާފައިވަނީ މުވައްޒަފުންގެ މެދުގައި ގުޅުން ބަދަހިކޮށް އެކުވެރިކަން އާލާކުރުމަށް ކުރިއަށް ގެންދިޔަ ޓީމް ބިލްޑިންގ ހަރަކާތްތަކަކާ އެކުގައެވެ. މި ޕްރޮގްރާމުގައި 37 މުވައްޒަފުން ބައިވެރިވިއެވެ.